9
Djisu kula uan masebu ojogo
1 Se Djisu subili ba liba uan batelu se ëli tan vla ba benda sala domali,
se ëli ba tuludöguë loso dëli.
2 Se zhugan nna napai ma uan masebu ojogo ku bi sa liba uan maka ba da ëli.
Se ta ëli bë jonfa shi sa ku ineñ,
se Djisu faa ojogo sai:
«¡Ma añimu,
mina amu!
Pekadu bo tudu sa padadu».
3 Tadashi se zhugan nna meeth dalë bi ska faa dantu dëneñ me:
«¡Ëli ska faa fala zhogoveadu!».
4 Se Djisu bi sëbë mazhnamentu dëneñ,
se ëli pongota ineñ:
«¿Jama fë namsëdji ja ska mazhna fëiu dantu kusan namsëdji?
5 ¿Kë ja sa levu mashi,
pa faa:
“Pekadu bo tudu sa padadu” ö pa faa:
“Lanta,
pa bo nda”?
6 Mandji se valadji pa namsëdji sëbë fa Mina Napai Dösë të pödë liba tela sai valadji pa ëli pada pekadu tudu».
Tadashi se ëli faa masebu ojogo se:
«Lanta,
ma maka bo,
ku pa bo ba jadji bo».
7 ¡Se masebu sai lanta ja sata se ëli ba jadji dëli!
8 Se ta möi pöjödölö ineñ sai ba bë jö sai,
se mendu ma ineñ,
se ineñ da Nashian ilö dajantu ku ëli da nna pöjödölö uan pödë ngandji shi.
Djisu sama Matë
9 Se ta Djisu pasa ala,
se ëli bë uan masebu ku a ja sama ëli Matë ku bi ska tusan liba uan banku ja ma tesu.
Se ëli faa ëli:
«Lë amu».
Se Matë lanta se lë ëli.
10 *Se bi fë,
se Djisu bi sa dantu jadji Matë liba mezha ja kumu,
se uan sapa nna nguë ma tesu,
ku nna pekadölö,
se ineñ tudu ku Djisu ku nna balë dëli bi sa liba mezha.
11 Se ta nna fariseo bë jö sai,
se ineñ pongota nna balë dëli:
«¿Jama fë meeth namsëdji ja kumu ku nna nguë ma tesu ku nna pekadölö?».
12 Ta Djisu tëndë jö sai,
se ëli faa ineñ:
«Nna nguë ineñ shi ja sa lizhu na ja fë ineñ fata babëluf,
shina nna nguë ineñ shi ja ska danchi».
13 *Zha se ëli tan faa:
«Öseshi namsëdji ja bai pa namsëdji shina jö shi sa jö sai:
“Amu ngongo ku mindjikodji,
na sa pa fë saklifisuf”.
Pakë amu na bi pa amu bi sama nna nguë dëtuf,
shina a nna pekadölö».
Pufia tëjantu ku zhedu böjö
14 Uan djia se nna balë Zhuan Bachita ba toja Djisu se ineñ pongota ëli:
—¿Jama fë no ku nna fariseo ja ta shin chila zhedu böjö uan sapa vëdji,
se nna balë bo ja ska chila zhedu böjöf?
15 Se Djisu kundji ineñ:
—¿Sa fa nna nguë ineñ shi pai jazhadu sama ba uan jazha,
ineñ paadji sa luto öshi ontolo ëli sa ku ineñ?
Mandji se ske da djia shi a ske ma pai jazhadu bai,
se djia sai se ineñ ske ta ku zhedu böjö.
16 »Zhugan nguë na ja ta uan menda ku dasu panu novu pë bitidu veiuf,
pakë panu shi novu ja të bitidu shi veiu të baga,
se bagadu dëli tan ja ngandji mashi.
17 »Ñi zhugan nguë na ten ja ta vian novu pë dantu mataku peli veiuf,
pakë vian novu ja fë se peli ja labenta,
se vian ja buka se peli ten ja dana.
Dajantu shi se ta pa vian novu pa ja ta pë mataku peli novu,
valadji pa ineñ dödösu ja tada.
Uan mina miela mölidu ku uan mooso ska danchi
18 Se öshi ontolo ëli bi ska faa jö ineñ sai,
se bi uan masebu ku sa jasa jasa pövu,
se ëli dajözhöiö deenchi dëli ja faa:
«Mina naamain amu sa san ja mölë,
mandji se bo ja bi pa bo pë öma bo liba dëli,
pa ëli tan ngaia vida».
19 Se ta Djisu lanta,
se ëli ku nna balë dëli lë ëli.
20 Se ten öshi ku uan mooso ku ska danchi amea deshi danu ku dösu ja ska ta sangui se ëli iaba tashi dëli se ëli fala bodo panu dëli,
21 pakë ëli bi ska faa ku öguë dëli:
«Shi amu ja fala panu dëli moso,
amu ske sa kuladu».
22 Mandji se Djisu da voto,
se bë ëli se faa ëli:
«¡Ma añimu,
mina amu!
Jonfa bo se kula bo».
Se mooso sai vla kuladu fo ola sai.
23 Se ta Djisu lantela jadji masebu shi sa jasa jasa jadji Nashian nna judio iai,
se ëli bë uan möi pöjödölö ku tomenta fala sula ku ja da fala pandë ku janta mölë.
24 Se ëli faa ineñ:
«¡Namsëdji së fo iai!
Mina miela sai na sa möliduf;
ëli ska djuni».
Tadashi se ineñ jomesa ja li ëli.
25 Mandji se,
öshi moso ku a jölë ineñ tudu ba öluia,
se Djisu lantela se fala öma mina miela sai,
¡se mina miela sai ta mdjadu!
26 Se monova ja ngandji sai jölë pasa jamian loso loso se tudu.
Djisu kula nna nguë sebu ku nna nguë na ja faa falaf
27 Ta Djisu së fo ala,
se napai sebu dösu bi ska lë ëli,
ja ta kidëlë:
«¡Të mindjikodji no,
Mina alë David!».
28 Se ineñ lantela dantu jadji shi Djisu bi ja ta,
se ëli pongota ineñ:
—¿Namsëdji këlë fa amu paadji fë jö sai?
Se ineñ kundji ëli:
—Shiën,
Shiölö,
no këlë.
29 Tadashi se Djisu fala ineñ öiö se faa ineñ:
—Dajantu jonfa namsëdji,
amea sai se ske sa.
30 Tadashi se öiö dëneñ tudu bla,
¡se ineñ paadji bë kuzhu!
Se Djisu da ineñ odji:
«Namsëdji na ja da zhugan nguë lazhanf».
31 Mandji se ineñ fë amea patadu,
ta ineñ së fo ala se ineñ jomesa ja panta monova gavu pachi loso loso dala tudu,
ja da lazhan jö shi Djisu bi fë ineñ.
32 Ta ineñ bai,
se uan masebu ku na bi paadji faa falaf,
dajantu ku ëli bi sa ku damono,
se a ma ëli ba da Djisu.
33 Tadashi se Djisu chila damono se folo se masebu sai jomesa ja faa fala.
Se möi pöjödölö ineñ sai gua ku böjö betu.
Se ineñ bi ska faa:
«¡Zhugan djia a na sa bë zhugan ja shimafan jö sai dantu Israel ie zhaf!».
34 *Mandji se nna fariseo bi ska faa:
«Ëli ja chila nna damono amea mina dalë nna damono».
Nna tabaiadölö na ja dagolif
35 *Se Djisu bi ska be ja pasa dantu palea palea ku loso loso,
ja shina nguë kuzhu dantu jadji Nashian nna judio dëneñ,
ja pegua evanjelio gövöndölö dösë,
ja kula nguë klase danchi tudu ku duadu tudu.
36 *Se ta ëli bë möi pöjödölö ineñ sai,
se ëli të dölö dëneñ,
pakë ineñ bi sa tavadji ku jansadu,
shimafan nna jabala shin ludjadölö.
37 *Se tadashi se ëli faa nna balë dëli:
«Anta vedadji,
jö shi pa totolo sa monchi,
mandji se nna tabaiadölö na ja dagolif.
38 Dajantu shi namsëdji ja ska luga Shiölö jö shi ta pa totolo valadji pa ëli manda nna tabaiadölö ba matu dëli».