8
Djisu kula uan nguë sa ku lepla
1 Ta Djisu dësë fo van iki,
se uan möi pöjödölö bi ske lë ëli.
2 Se uan masebu ku sa ku danchi lepla,
se iabi lome dëli se da dajözhöiö deenchi dëli.
Se masebu faa ëli:
—Shiöla,
shi bo ja ngongo,
bo paadji limpa amu.
3 Se Djisu tezha öma dëli se fala ëli,
ja faa:
—Shiën,
amu ngongo,
¡vla limpadu!
Se öshi öshime se ëli vla kuladu fo lepla.
4 Se Djisu faa ëli:
—Pia,
bo na ja da zhugan nguë lazhanf,
shina bo ja bai pa bo msa padjil öguë bo,
se bo ten ja ma bai ku bo ja gavu shi ku alë Moises manda iai,
valadji pa sa lazhan gavu da ineñ.
Jonfa uan feshali nna nguë roma
5 Ta Djisu tan vlame lantela loso Kapernaum,
se uan feshali sodadji roma,
iaba lome dëli se luga ëli,
ja faa ëli:
6 —Shiöla,
shividölö amu sa jadji ojogo ku uan duadu ödu.
7 Se Djisu faa:
—Amu ske ba kula ëli.
8 Se feshali kundji se faa:
—Shiöla,
amu na sa ku ondolo shi pa bo lantela jadji amuf;
sumanu pa bo faa uan fala moso fo jamian shi bo sa se shividölö amu ske kula.
9 Pakë amu ten sa uan masebu basu odji,
se amu ten të sodadji basu pödë amu.
Se amu ja faa nguë sai:
“Bai”,
se ëli ja bai,
se utu nguë:
“Bi”,
se ëli ja bi.
Se ta amu ten ja faa uan sëlëva amu:
“Fë jö sai”,
se ëli ja fë.
10 Se ta ëli tëndë jö sai,
se Djisu gua ku böjö betu,
se ëli faa nna nguë ineñ shi bi ska lë ëli ai:
«Anta vedadji se amu faa namsëdji,
ñi ba toja dantu Israel amu na sa bë uan jonfa ngandji shi ie zhaf.
11 *Se amu ska faa namsëdji fa ske bi bi uan sapa nguë fo pachi bosai ku dji libai,
se ineñ ske tusan dantu fesa bankëtë ku Abraam,
ku Isaak ku Jakob dantu gövöndölö dösë.
12 *Mandji se nna nguë ineñ shi sa nguë gövöndölö sai a ske jölë ineñ ba öluia jamian kulu,
ala se ske të fala sula ku kumu denchi».
13 Tadashi se Djisu faa feshali sodadji roma:
«Tan ba jadji bo,
pakë këlë bo,
se jö se fë».
Se shividölö dëli bi sa kuladu ola se me.
Djisu kula uan sapa nguë
14 Ta Djisu lantela jadji Pudul,
se ëli dajonta ku sogolo Pudul ku bi sa tovesadu ku fibil.
15 Se ëli fala ëli öma,
se fibil se lega ëli;
se ëli lanta se ëli shivi ëli.
16 Se ta da tetadji,
se a ma uan sapa nna nguë ku bi sa ku damono ba da ëli.
Se ëli chila spitu fëfëiu ineñ se ku uan odji,
se ëli kula nna nguë ineñ shi ska danchi tudu.
17 Se amea sai se kumpli palavulu Shiölö amea shi pantafala Isaias,
ku se bi faa:
«Se ëli ma danchi no tudu,
se ëli chila duadu no tudu».
Jö shi ja kuta pa lë Djisu
18 Ta Djisu bë amea shi uan sapa möi pöjödölö ludjila ëli pë metadji,
se ëli da odji pa ba benda sala.
19 Se bi uan nna meeth dalë se faa ëli:
—Meetha,
amu ske lë bo ja sa jamian shi bo ja bai iai.
20 Se Djisu kundji ëli:
—Nna jösölö djiga kichi kichi të iöjö lapa ku ineñ ja bibe se nna paatu ja të jadji bichili dëneñ,
mandji se Mina Napai Dösë na të ñi uan jamian pa ëli pë ja jasa dëlif.
21 Se utu balë dëli faa ëli:
—Shiöla,
lega amu pimëlu pa amu ba ntela pai amu.
22 Se Djisu kundji ëli:
—Lë amu.
Lega pa nna nguë mölidu se ja ntela mochi dëneñ.
Djisu manja tavada
23 Zha se Djisu lantela dantu batelu,
se nna balë dëli lë ëli.
24 Se öshi öshi,
se sota uan taba tavada ödu,
ku pukulu domali bi ska kubili batelu;
mandji se eli bi ska djuni.
25 Se nna balë bi se lanta ëli,
ja faa:
—¡Shiöla,
sava no,
no la ja mölë!
26 Se ëli kundji ineñ:
—¿Jama fë namsëdji ska mendu,
nna masebu ku fi jonfa?
Tadashi,
se ëli lanta se eli lonja öiö da tavada ku pukulu domali,
se ja tudu da masu amea ngandji.
27 Se nguë tudu gua ku böjö betu,
ja faa:
«¿Kë nguë sa nguë sai,
ku ba toja oventu ku omali tudu ja tëndë ëli?».
Djisu chila spitu fëfëiu fo nna masebu dösu
28 Ta Djisu ba da benda sala domali,
lome loso loso nna nguë gadara,
se nna pai dösu ku bi sa ku damono së ba toja ëli.
Ineñ bi ska bibe dantu spitula se ineñ bi sa nna nguë buku buku ku zhugan nguë na paadji pasa jamian salaf.
29 Se ineñ ja ta kidëlë ja faa:
«¿Kë i shi sa dji bo ku no,
Mina Nashiolo?
¿Bo bi iai bi tomenta no anta pa da tempu jabamentu?».
30 Se ten bi fë se lome dala bi sa ku uan ögö ku uan sapa pöjö ja kumu.
31 Se nna damono sa fa ja luga ëli ja faa:
—Shi bo ja ske chila no ba öluia,
manda no ba ögö pöjö ineñ sala.
32 Se ëli faa ineñ:
—¡Bai!
Se ineñ ten së folo,
se ineñ ba dantu ögö pöjö ineñ sai,
ja jölë be basu ba toja ku ineñ pono ba omali se ineñ tudu mölë dantu daua.