7
Na ja juzhga zhugan nguëf
1 »Na ja ska juzhga zhugan nguëf,
valadji pa na ten juzhga namsëdjif.
2 *Pakë a ske ja juzhga namsëdji amea shime ku namsëdji ja juzhga utu nguë.
Se ku mindjida shi namsëdji ja mindji utu nguë,
se a tan ske ja mindji namsëdji.
3 »¿Se jama fë bo ja pia ope jambabu shi sa dantu öiö namain bo,
se bo na ja bë tuludöpa shi sa dantu öiö bof?
4 ¿A jama fë bo ske faa namain bo:
“Namain amu ia,
lega amu pa amu chila bo ope jambabu se sa öiö bo iai”,
adjimese se bo na ska chila tuludöpa shi sa dantu öiö bofa?
5 Sochi,
ja chila tuludöpa fo öiö bo pimëlu,
zha pa bo bë jamian limpi zha pa bo fo chila ope jambabu shi sa dantu öiö namain bo.
6 »Na ja da nna jösölö ja santu santuf.
¡Na ja ta budu ngola domali ba da nna pöjöf!
Ineñ ske pope pope zha se ineñ ske da voto se ineñ ske të namsëdji të fea fea.
Pindji, jua ku sama
7 »Ja pindji se a ske ja da namsëdji;
ja jua se namsëdji ske ja bë;
ja ska sama,
se a ske bla da namsëdji.
8 Pakë nguë shi ja pindji tudu,
ske ja ma;
se nguë shi ja jua,
se ske ja bë;
se nguë shi ja sama,
se a ja bla da ëli.
9 »¿Kë nguë dantu namsëdji,
shi mina dëli ja pindji ëli ampan,
se ëli ja da ëli uan budu?
10 ¿Ö shi ëli ten ja pindji ëli uan pishi,
se ëli ja da ëli uan jobolomatu?
11 Se shi namsëdji,
ku sa nna nguë fëfëiu,
ja sëbë da nna mina namsëdji ja gagavu,
¿jantu mashi ku Pai namsëdji shi sa ösë na ske da nna nguë ineñ shi ja pindji ëli ja gagavuf?
12 *»Dajantu shi,
jö ineñ shi namsëdji ja ngongo pa utu nguë ja fë namsëdji tudu,
se sa amea shime ku namsëdji ten ja fë ku ineñ.
Pakë jö sai se sa alë ku nna pantafala.
Lesa poto
13 »Ja lantela amea lesa poto.
Pakë poto shi batela ku jamangandji shi uala uala se ja ma nguë ba pëndë,
se uan sapa nguë se ja lantela dantu dëli.
14 Mandji se lesa poto ku jamangandji shi suadu se ja ma nguë ba vida,
se zhugan ponodu nguë moso se ja dajonta ku ëli.
Jönsë fuluta dëneñ
15 »Namsëdji ja ska pinchidu nna pantafala fanchila ineñ shi ja sa bishidu shimafan jabala masu mandji ku shishizhu ineñ ja shimafan nna jösölö djiga fëfëiu.
16 Namsëdji ja paadji jönsë ineñ amea fuluta dëneñ.
¿Sa fa a ja paadji totolo uva fo öpa pian pian ö abada fo alba pian pian?
17 Uan ope döpa gavu ja da fuluta gagavu,
se uan ope döpa fëiu ja da fuluta fëfëiu.
18 Uan ope döpa gavu na paadji da fuluta fëfëiuf,
se uan ope döpa fëiu na paadji da fuluta gagavuf.
19 *Dajantu shi,
ope döpa ineñ shi tudu ku na ja da fuluta gagavuf,
se a ja duba ineñ,
se a ja ta ineñ ba fögö.
20 *Se fë namsëdji ja paadji jönsë ineñ amea fuluta dëneñ.
Nna balë shishizhu
21 »Na sa nna nguë ineñ shi ja sama amu tudu:
“¡Shiöla,
Shiöla!”,
se ske lantela dantu gövöndölö dösëf,
shina nguë shi ja fë vintadji Pai amu shi ku sa ösë.
22 Uan sapa dji nguë ske ja faa amu djia sala:
“¡Shiöla,
Shiöla!
¿no na pantafala ku namu bo ua,
se no na chila nna damono folo ku namu bo ua,
se no fë uan sapa fidu ja ngangandji ua?”.
23 Tadashi se amu ske faa ineñ ntëlelele:
“Zhugan djia amu na jönsë namsëdjif.
Safa ba löndji fo amu,
nna nguë fë ja fëfëiu”.
Fë jadji pë liba lapa ödu
24 »Dajantu shi,
ja sa nguë shi ja tëndë fala amu ineñ sai se ëli ja fë,
amu ske pia ëli shimafan uan pöjödölö ku tëndëmentu,
ku ja fë jadji dëli pë liba jasada.
25 Se aua da,
se lubela tudu ja laga,
se oventu föfö,
se ja ligui da jadji sai,
se na lolof,
pakë fundamentu dëli bi sa liba jasada.
26 Mandji se ja sa nguë shi ja tëndë fala amu ineñ sai se ëli na ja fëf,
amu ske pia ëli shimafan uan pöjödölö shin tëndëmentu,
ku ja fë jadji dëli pë liba dalea.
27 Se aua da,
se lubela tudu laga,
se oventu föfö,
se ligui da jadji sai ku foshi,
se ja lolo,
se jadji sala ja fea fea amea fëiu».