1 Ta ëli bë möi pöjödölö ineñ sai ku bi ska be ja zhunta,

se Djisu subili ba uan van iki se ëli tusan.

Se nna balë dëli ludja ëli pë metadji,

2 se ëli jomesa ja shina ineñ kuzhu.

11 ^*»Besa ja sa ku namsëdji ta ineñ ja ska suta ku ja ska pëtëpë namsëdji ku se ineñ ja faa klase ja fëfëiu dajantu namsëdji ku ja ska da fanchila tëjantu ku namsëdji dajantu amu.

12 ^*¡Namsëdji ja të liguilia!

¡Namsëdji ja sa ku liguilia monchi,

pakë uan taba ja ngandji se ska gada namsëdji ösë!,

pakë amea sai se a pëtëpë nna pantafala ineñ shi bi sa pimëlu namsëdji.

13 ^*»Namsëdji se sa salu tela.

Mandji se ta salu ja pëndë saga dëli,

¿ku kë ja a ske ja ta salu?

Na tan ja shivi da zhugan jaf,

shina pa ja zhuga ta ku pa nna pöjödölö ja pope liba.

14 ^*»Namsëdji se sa fögö djidjidu mundu,

shimafan uan palea ku ja ta liba uan van iki ku a na ja paadji jöndëf.

15 ^*A na ja sëndë uan fögö zha pa ja pë basu uan kachabachef.

Shina,

a ja pë liba öpa jandjia pa fo dëdë pë nna nguë ineñ shi sa dantu jadji tudu.

16 ^*Pa amea shime,

pa namsëdji ja lega pa fidu ja gagavu namsëdji ja dëdë pë vita nna nguë tudu,

valadji pa nna nguë tudu ja da Pai shi sa ösë ilö.

17 »Namsëdji na mazhna fa amu bi pa amu bi chila alë ö nna pantafala folof.

Shina,

amu bi pa kumpli jö ineñ se tudu.

18 ^*Pakë anta vedadji se amu faa namsëdji fa ba toja pa ösë ku tela pasa,

zhugan ponodu latela ñi uan malka na ske pasa fo alëf,

ba toja pa jö ineñ se tudu kumpli.

19 Dajantu shi se ja sa nguë shi ja kabela uan mandamentu ineñ shi ja kichi kichi mashi,

se sa amea shi ku ëli ja ska shina utu nguë pa ja ska fë jö ineñ shime,

a ske ja sama ëli nguë shi kichi mashi dantu gövöndölö dösë;

mandji se nguë shi ja tëndë mandamentu sai se ja shina nguë,

a ske ja sama ëli nguë ngandji dantu gövöndölö dösë.

20 »Amu ska faa namsëdji fa,

namsëdji na ske lantela dantu gövöndölö dösëf ba toja pa djustishi namsëdji sa liba mashi ku dji nna meeth dalë ku dji nna fariseo.

21 »Namsëdji tëndë fa a bi faa nna paipai no:

“Na chila nguë vida folof.

Shi bo ja chila uan nguë vida folo bo ske mdja basu juisio”.

22 Mandji se amu ja faa:

ja sa fa bo lega se ja ja mëtë bo pashian ku uan namain bo,

¡bo ske sa basu juisio nna jues!

Shi bo ja suta uan nguë,

a ja paadji ma bo ba deenchi Zhunta shi Ngandji,

se shi bo ja ta uan nguë masan,

bo ja paadji pono da fögö donfenu.

23 »Dajantu shi,

shi bo ja ma ja bo ba pë deenchi datali jadji Nashiolo,

se jasa bo ja da fa uan namain bo të uan ja tëjantu ku bo,

24 bo ja lega jö sai pë deenchi datali.

Se pimëlu,

se bo ja jua padji ku namain bo sai;

tadashi se bo ja bi se bo ja pë ja bo deenchi datali.

25 »Ta bo ja sa jamangandji ja juisio ku nguë shi të uan ja ku bo,

ja da padji ku ëli dandjian ja sa jö shi.

Pakë na ja sa amea sef,

ëli ja paadji ma bo ba da jues,

se jues ske ma bo ba da uan guada se a ske mëtë bo pë djili.

26 Anta vedadji se amu faa bo fa bo na ske së fo alaf,

ba toja pa bo da pagu jabamentu djiëlu shi kichi mashi.

27 »Namsëdji tëndë a bi faa:

“Na ja kabajölöiöf”.

28 Mandji se amu ja faa nguë shi ja pia uan naamain ku dishamentu fëiu,

ëli kabajölöiö ku naamain sai dantu kusan dëli.

29 ^*Dajantu shi,

shi öiö bo shi dëtu se ja fë bo pono da pekadu,

bo ja chila ëli folo pa bo zhuga ta.

Ske sa gavu mashi pa bo pëndë uan pachi moso döguë bo ku pa na sa fa öguë bo tudu se a ta ba onfenuf.

30 ^*Se shi,

öma bo shi dëtu se ja fë bo pono da pekadu,

bo ja pota folo se bo ja zhuga ta.

Pakë ske sa gavu mashi pa bo pëndë uan pachi döguë bo,

ku pa na sa fa öguë bo tudu se a ta ba onfenuf.

31 ^*»A ten ja faa:

“Ja sa nguë shi ja baga ku miela dëli ta pa ëli da ëli uan fejaata baga”.

32 ^*Mandji se amu faa fa,

pa na sa dajantu ku ja fëfëiu tëjantu ku nda ölöluiaf,

nna nguë ineñ shi tudu ja baga ku miela dëli ja pizha ëli ba kabajölöiö,

se nguë shi ja jazha ku mooso sai ku sa bagadu ia ten ja kabajölöiö.

33 »Namsëdji ten tëndë fa nna paipai no a bi faa ineñ:

“Bo na ja baga julamentu bof;

ta pa bo ja kumpli ku julamentu ineñ shi ku bo ja fë Shiölö”.

34 ^*Mandji se amu ja faa namsëdji:

Na ja ska jula da zhugan amea shif,

ñi na dajantu ösëfa,

pakë ösë se sa töli Nashiolo;

35 ñi dajantu telafa,

pakë tela se sa jamian shi ëli ja pë ope dëli;

ñi dajantu Jerusalenfa,

pakë Jerusalen se sa palea Alë shi ngandji.

36 Ñi dajantu jasa bof,

pakë bo na paadji fë pa zhugan ponodu jabelu bo pa vla banku ö petuf.

37 Mandji pa fala namsëdji ja sa:

“Aen,

aen” ö “Na,

na”;

pakë utu ja mashi ja fo nguë shi fëiu.

38 »Namsëdji tëndë fa a ja faa:

“Öiö ku öiö,

se denchi ku denchi”.

39 Mandji se amu ja faa namsëdji:

na ja tanja ku uan pöjödölö fëiuf.

Shi uan nguë ja da bo ku uan butada benda ogomu shi dëtu,

bo tan ja vla utu benda da ëli.

40 Shi ëli ja ma bo ba deenchi nna jues,

se a ja chila bo jaminzha,

bo ten ja lega bobolonda da ëli.

41 Shi uan sodadji ja da bo odji pa bo ma jalga dëli be deenchi uan kilometro,

bo ja ma be kilometro dösu.

42 Ja sa nguë shi ja pindji bo,

bo ja da ëli;

se nguë shi ja ngongo ma ja fo bo petadu,

bo na ja naga ëlif.

43 »Namsëdji tëndë fa alë ja faa:

“Ngongo ku pusumu bo” ku pa bo ja të pashian namigu bo.

44 Mandji se amu ja faa namsëdji:

Ja ngongo ku nna namigu namsëdji;

ja da nna nguë ineñ shi ja ta namsëdji masan besa,

ja fë gavu ku nna nguë ineñ shi ja ska nozho namsëdji,^*+

lezha da nna nguë ineñ shi ja ska pëtëpë namsëdji.

45 Se amea sai,

se namsëdji ske ja fë ja shimafan uan mina shishizhu ku Pai dëneñ se sa ösë.

Pakë ëli se ja da nguë fögö solo djidjidu fo nna nguë fëfëiu ku a shime nna nguë gagavu se ëli se ja da aua sëbidu bi liba nna nguë dëtu ku nna nguë ku na sa dëtuf amea shime.

46 Pakë shi namsëdji ja ska ngongo ku nna nguë ineñ shi ja ngongo ku namsëdji moso,

¿kë pagu shi namsëdji ske të?

Ba toja nna nguë ma tesu tudu ten ja fë jö shime.

47 Shi namsëdji ja da manten nna namain namsëdji moso,

¿kë ja mashi namsëdji tan ja fë?

¿Nna nguë na sa judiof na ten ja fë jö shime ua?

48 Dajantu shi,

ta pa namsëdji sa dëtu,

amea shi ku Pai namsëdji ku sa ösë sa dëtu.