4
Tentasan Djisu
1 *Tadashi se Spitu ma Djisu ba dantu uan jamian sölö sölö valadji pa djiabu fë ëli tentasan.
2 Se dantu deshi jatulu djia ku deshi jatulu nöchi shin kumu,
se ëli sinchi faku.
3 Se tentadölö bi toja ëli,
se faa ëli:
—Shi bo ja sa Mina Nashiolo,
faa budu ineñ sai pa ineñ vla fë ampan.
4 Se Djisu kundji ëli:
—¡Na!
Sa skividu:
“Nna pöjödölö na ske ja bibe da ampan mosof,
shina da fala shi ku tudu ja së fo böjö Nashiolo”.
5 Tadashi se djiabu ma ëli ba palea santu,
ba ponto shi atu mashi liba jadji Nashiolo,
6 se ëli faa ëli:
—Shi bo ja sa Mina Nashiolo,
¡daua ba basu!,
pakë sa skividu:
“Ëli ske da nna anzhu dëli odji.
Se ineñ ske gaga bo ku öma dëneñ,
valadji pa bo na da topu ope ku buduf”.
7 Se Djisu faa ëli:
—Ten sa skividu:
“Bo na ja puva Shiölö ku sa Nashian bof”.
8 Zha se djiabu tan ma ëli ba van iki shi atu mashi se ëli msa ëli gövöndölö mundu tudu ku gloria dëneñ.
9 Se ëli faa ëli:
—Amu ske da bo jö ineñ se tudu shi bo ja dajözhöiö pa bo adola amu.
10 Tadashi se Djisu faa ëli:
—¡Së fo iai,
Satanas!,
pakë sa skividu:
“Bo ske ja adola Shiölö ku sa Nashian bo,
se bo ske ja shivi ëli moso”.
11 Tadashi se djiabu safa fo ëli,
se nna anzhu bi se ska shivi ëli.
Jomesadu tabaia Djisu
12 *Ta Djisu tëndë fa a mëtë Zhuan pë djili,
se ëli tan vlame ba Galilea.
13 *Se ëli së fo Nasaret se ëli ba ta loso Kapernaum,
ku sa bodo domali dantu loso loso Sabulon ku Neftali,
14 valadji pa kumpli jö shi pantafala Isaias bi faa:
15 «Tela Sabulon ku tela Neftali,
lome bodo domali,
benda benda sala lubela Jordan,
dantu Galilea nna nguë ineñ shi na sa judiof,
16 nna nguë ineñ shi bi ja ta jamian kulu kulu
ineñ bë uan taba fögö djidjidu.
Se nna nguë ineñ shi bi ja ta jamian shi mölë ja ta sombolo dëli pë,
uan fögö djidjidu dëdë pë».
17 *Se fo djia sai,
se Djisu jomesa ja pegua:
«Namsëdji tan vla ku ope tashi,
pakë gövöndölö dösë sa peetu».
Nna pimëlu balë
18 Se Djisu bi ska nda bodo domali Galilea,
se ëli bë nna namain dösu:
uan ineñ bi sa Shiman,
ku a ten ja sama ëli Pudul,
ku namain dëli Andëlë,
ku bi ska ta alëdë ba omali,
pakë ineñ bi sa piskadölö.
19 Se ëli faa ineñ:
«Namsëdji lë amu,
se amu ske fë pa namsëdji sa piskadölö nna pöjödölö».
20 Se öshi öshi se ineñ lega alëdë pë,
se ineñ lë ëli.
21 Se uan fi ja be deenchi mashi,
se ëli bë utu nna namain dösu,
Sanchagu mina Sebedeo ku namain dëli Zhuan,
dantu batelu ku pai dëneñ Sebedeo,
ku ten bi ska jözhë alëdë dëneñ pë.
Se ëli sama ineñ.
22 Se ineñ,
öshi öshi se lega batelu ku pai dëneñ pë,
se ineñ lë ëli bai.
Möi pöjödölö ja lë Djisu
23 *Se Djisu ja bai ja pasa dantu loso loso Galilea ja shina nguë kuzhu dantu jadji Nashian nna judio dëneñ,
ja pegua evanjelio gövöndölö dösë,
ja kula nguë klase danchi tudu ku duadu tudu dantu nna pövu.
24 Se monova tëjantu ku ëli ja bai ja panta panta se ba da jamian löndji löndji shimafan Siria,
se dandjian se nna nguë tudu jomesa ja ma nna nguë ineñ shi ja ska danchi ba da ëli.
Se ëli bi ska kula ineñ tudu,
ja sa danchi ö duadu shi bi ja sa ku ineñ,
ö shi ineñ bi ja sa ku damono,
ö ja dadölö ö ja sa ojogo.
25 Se uan sapa möi pöjödölö bi ska lë ëli ba jamian tudu:
nna nguë fo Galilea,
Dekapolis,
fo Jerusalen,
fo Judea tudu ku fo utu benda lubela Jordan.