3
Pegua Zhuan Bachita
1 Dantu djia ineñ sai,
se Zhuan Bachita bi ska jomesa ja pegua dantu jamian sölö sölö Judea.
2 *Se ëli bi ska faa:
«Namsëdji tan vla ku ope tashi,
pakë gövöndölö dösë sa peetu».
3 Pakë nguë sai se sa nguë shi pantafala Isaias,
ta ëli bi faa:
«Sa falagochi nguë shi ja ta kidëlë dantu jamian sölö sölö:
“¡Ja ska fë vadu jamangandji Shiölö!
¡Bla jamangandji dëtu dëli!”».
4 Zhuan bi sa bitidu ku peli javalu lömba,
se ëli bi sa ku uan boto peli pë jadela dëli,
se ëli bi ska kumu padjintena ku meli mematu.
5-6 Se nna nguë palea Jerusalen,
ku nna nguë loso loso Judea tudu,
ku nna nguë loso loso lome lubela Jordan tudu,
se ta ineñ ja jonfesa pekadu dëneñ,
se ëli bi ska bachizha ineñ dantu lubela Jordan.
7 *Se ta Zhuan bë uan möi nna fariseo ku nna saduseo bi ske jamian shi ëli bi ska bachizha,
se ëli faa ineñ:
«¡Zhenchi nna jobolomatu!
¿Kë nguë faa namsëdji fa namsëdji bi ske paadji jölë da jatigu shi ska iabi iai?
8 Ta pa namsëdji ja da fuluta pa ja msa fa namsëdji tan vla ku ope tashi fo pekadu namsëdji.
9 *Na ja ska mazhna dantu döguë namsëdji fa,
“No të Abraam shimafan pai”,
pakë amu faa namsëdji fa Nashian paadji mindji nna mina da Abraam ba toja fo basu budu budu ineñ sai.
10 *Se öseshi se matin sa pidu leezha ope döpa bebezha;
dajantu shi,
se ope döpa shi na ja da fuluta gagavuf a ske duba ëli se a ske ta ëli ba fögö.
11 »Amu ska bachizha namsëdji ku aua valadji pa tan vla ku ope tashi;
mandji se nguë shi ske bi tashi amu se të pödë mashi ku amu,
ku ñi amu na të ondolo shi pa amu chila ëli ja mëtëpope dëlif.
Ëli se ske bachizha namsëdji ku Spitu Santu ku fögö.
12 Ëli sa ku öpa öma dëli,
valadji pa ëli ja limpa ope jambabu fo tulugu dëli.
Pa ëli ja totolo tulugu pë jadji gada tulugu;
mandji se ëli ske ja ta ope jambabu ba uan fögö ku na ja paka zhugan djiaf».
Bachizhamentu Djisu
13 Se bi da tempu shi ku Djisu bi fo Galilea bi lubela Jordan valadji pa Zhuan bachizha ëli.
14 Mandji se Zhuan jua amea shi pa da ëli öiö tëndë fa ëli na fo fëf.
Se ëli faa ëli:
—Amu se fë fata pa bo bachizha amu,
tadashi,
¿jama fë bo ske toja amu?
15 Mandji se Djisu faa ëli:
—Se sa amea shi ta pa fë,
pakë ta pa no kumpli ku jö ineñ shi sa dëtu öiö Nashiolo.
Tadashi se Zhuan lega se ëli bachizha ëli.