2
Nna sëbëdölö bosai
1 Ta a pali Djisu Belen Judea dantu tempu shi Erodes se bi sa alë.
Se tempu se,
se zhugan nna sëbëdölö tela tela bosai ba da Jerusalen se ineñ pongota:
2 «¿Kë jamian alë nna judio shi ku a pali iai sa?
No bë ntëla dëli öshi ska së se no bi adola ëli».
Visita de los magos (Mateo 2.1-23)
3 Se ta alë Erodes tëndë jö sai,
se kusan jaba ëli fëiu ku a shime Jerusalen nguintëlu nguintëlu.
4 Se ëli manda pa sama nna jasa padjil ku nna meeth dalë se ëli pongota ineñ:
—¿Kë jamian shi bi ske ta pa pali Kilitu?
5 Se ineñ kundji:
—Belen Judea,
pakë se sa jö shi nna pantafala bi skëvë:
6 “Mandji se bo,
Belen,
ku ja ta tela Juda,
bo na se sa kichi dantu loso loso nna mina dalë Juda fa,
pakë fo bo se ske bi uan mina dalë
ku se ske sa ludjadölö tela amu Israel”.
7 Tadashi se Erodes sama nna sëbëdölö ba uan zhunta jöndjidu se,
amea dëneñ,
se ëli tëndë ala tempu shi ku ntëla sai bi ske së ku supichi.
8 Se ëli manda ineñ ba Belen,
se ëli faa ineñ:
«Namsëdji ba ala pa namsëdji ba ja jua mina se gavu.
Ta namsëdji ja bë ëli,
se namsëdji tan vlame bi pa bi da amu lazhan jamian shi ëli sa valadji pa amu ten bai ku pa amu ten ba adola ëli».
9 Se ta ineñ tëndë ku alë jaba,
se nna sëbëdölö tan bai,
se ntëla shi ineñ bi bë bosai iai bi ska bai deenchi dëneñ,
ba toja ku ineñ bi ska da jamian shi mina bi sa,
se ntëla se ten mdja pë ala.
10 Ta ineñ bë ntëla se,
¡se liguilia ma ineñ!
11 Se ineñ lantela dantu jadji sai se ineñ bë mina ku main dëli,
Malia,
se ineñ da dajözhöiö se ineñ adola ëli.
Se ineñ bla bakisi dëneñ,
se ineñ da ineñ ja dondolo:
oro,
insienso ku mirra.
12 Mandji se a bi panta ineñ dantu suian pa ineñ na tan vla jamian shi Erodes bi saf,
se ineñ tan vla tela dëneñ ku uan jamangandji patadu.
Zhenchi Djisu jölë ba Ejipto
13 Se ta nna sëbëdölö tan bai dëneñ,
se uan anzhu Shiölö së Sandzhe ku supichi dantu suian.
Se anzhu faa ëli:
«¡Lanta!
Pa bo jölë ku mina ku main dëli ba Ejipto.
Pa bo mdja ala ba toja ta ku amu ja faa bo pa bo tan vlame bi,
pakë Erodes ske jua mina valadji pa ëli chila ëli vida folo».
14 Se nöchi sai se Sandzhe ten lanta,
se ëli ma mina ku main dëli,
se ëli ba Ejipto,
15 se ineñ mdja ala ba toja ku Erodes mölë.
Se amea sai se kumpli jö shi Shiölö bi faa amea pantafala:
«Fo Ejipto se amu sama Mina amu».
16 Se tadashi se ba da Erodes ötëndë fa nna sëbëdölö bi bi li ëli,
se mëtë ëli pashian monchi se ëli manda pa ba chila vida folo nna mina kichi kichi ineñ shi sa basu dösu anu ku ja ta Belen ku lome lome dëli,
amea tempu shi ku ëli bi golo golo fo nna sëbëdölö.
17 Se fidu jö sai se kumpli ku jö shi Nashian bi bi da lazhan amea pantafala Jeremias:
18 «Fo Rama se a tëndë uan kidëlë,
fala sula ku dödö ngandji.
Rakel ska sula dajantu nna mina dëli
se ëli na ngongo pa fia kusan dëlif,
pakë ineñ bi sa mölidu bebezha».
Vadji ba Nasaret
19 Se ta Erodes mölë,
se uan anzhu Shiölö së Sandzhe ku supichi dantu suian tela Ejipto.
20 Se anzhu faa ëli:
«¡Lanta!
Ma mina ku main dëli pa namsëdji tan vla ba tela Israel,
pakë nna nguë ineñ shi bi ngongo chila mina vida folo tudu mölë bebezha».
21 Tadashi se Sandzhe lanta,
se ëli ma mina ku main dëli se ëli tan vla tela Israel.
22 Mandji se ta ëli tëndë fa Arkelao se sa gövöndölö Judea jamian pai dëli Erodes,
se mendu ma ëli pa ëli tan ba ala.
Mandji se a bi panta ineñ amea uan suian,
se ëli ba loso loso Galilea.
23 *Zha se ineñ ba ta uan palea ku ja sama Nasaret se amea se kumpli jö shi nna pantafala bi bi faa:
«A ske ja sama ëli nasareno».