Uan sapa danu anta pa pali Djisukilitu, se alë David se bi sa gövöndölö pövu Israel, ineñ bi ja lambela alë David shimafan alë shi gavu mashi ku ineñ bi të, se fë ku ineñ bi ska gada pa kumpli plomesa Nashiolo, fa uan djia uan minadjimina alë David bi ske sa gövöndölö liba dëneñ, se ëli tan ske da pövu ngandji shi bi sa ku ineñ fo tompu tompu. Se minadjimina shi bi ske bi iai a bi ja jönsë ëli shimafan Mesias, ö Kilitu, ku fala ebreo ku griego a bi ja paadji tëndë shimafan «Alë shi ku Nashian se bi ma».

Dantu evanjelio sai, se a ja da pövu Israel nova gavu fa a pali Mesias (kapitulo 1 ku 2) se na bi sa zhugan nguë mashi ku Djisu Nasaretf, mina jantëlu shi a ja sama Sandzhe ku miela dëli Malia (13:55).

Na ja sa fa a ten jönsë Djisu shimafan Mesias shi a bi plomëtë ie mosof. Matë ten ja msa ëli shimafan uan Meeth ngandji. Dantu uan sapa shina ja Djisu ja paadji sa liba shina ja tudu lazhan ngandji shi a ja jönsë shimafan «pegua van iki» (kapitulo 5–7), zhampulu seta seta (kapitulo 13), ku jabamentu shina ja dëli (kapitulo 23–25). Mandji se vedadji ngandji dantu evanjelio Matë sa kundji Pudul, nguë shi bi sa piskadölö iai. Djisu bi pongota nna balë dëli: «A namsëdji, ¿kë nguë namsëdji faa sa amu?». Se kundji Pudul bi sa uan jonfesa jonfa: «Bo se sa Kilitu, Mina Nashian shi sa vivu» (16:16).

Uan namu ineñ shi bi sa ku Djisu, ku se sa i shi ku ja kumpli ku jö ineñ shi pantafala Isaias bi bi faa, sa Emanuel, ku ja sa faa «Nashian sa ku no» (1:23). Matë ja faa no fa, tuludöguë Djisu ja sugula no jö sai ta ëli bi ska lega nna balë dëli se ëli faa: «Anta vedadji se amu faa namsëdji fa amu ske sa ku namsëdji pa sempele, ba toja jabamentu mundu» (28:20).