N-yemobu
13
Sụa,
o to nwekwa m'e -behuduru mu l'aghajẹ okfu-alị mu;
egudeje iwhe bụ-zhia okfu,
Ume-Dụ-Nsọ l'egoshije madzụ gude ekfu okfu,
mbụ gudegee gude ọwhu ndu ojozhi-imigwe l'egudeje ekfu,
n-yemobu -rwụhu mu l'ẹhu bẹ mu bụlekwaa njaja ogele,
m'ọ kwanụ atangụ,
l'adachi madzụ nchị.
2 Sụ,
ọ tọ dụkwa m'e -beru Ume-Dụ-Nsọ yegezhia mu ike l'ẹhu tẹ mu kfuje okfu,
l'egoshi ozhi,
Chileke zhiru,
mu magezhiaru Chileke ọkpobe amama,
makọtaru iwhe lile o shi domia edomi,
kabagezhia okweta nke Chileke ono kweshia ya ike,
mbụ kwetabe iya nke ọwhu bụ mu -sụ ugvu t'ọ whọfu l'ẹka ọ nọ je anọdu l'ẹka whọ,
ya awhọfu,
mu kwetabe nke Chileke nno,
mu te eye madzụ ibe mu obu bẹ l'ọ tọ dụkwaa iwhe mu bụ.
3 Ọ tọ dụkwa e -beru m'ọo mu tụko iwhe lile,
mu nweru kekashiaru ndu ụkpa,
kwegee kwe t'e wota mu kpọo ọku;
mu te eye madzụ ibe mu obu,
ọ tọ dụkwa urwu,
mu ritaru iya.
4 Oye obu l'emeje tẹ madzụ taa nshi l'iwhe lile,
dagbaru yẹle onye ọbu,
o yeru obu.
Ọ bụru oye ndu ọdo obu l'emeje madzụ ya eme odoo.
Ọ bụru oye ndu ọdo obu l'emeje tẹ madzụ be enweje oke-ẹnya.
Onye yeru ndu ọdo obu ta anọjekwa ekuchashi onwiya;
tọo nọje etu onwiya iwhe lanụ,
dụ nụ.
5 Oye ndu ọdo obu l'emeje tẹ madzụ be eme iwhe l'ẹte adụa ree l'ẹnya,
ọ bụkwaru iya whọ l'emeje tẹ madzụ ba abụ onye ụswara.
Onye yeru ndu ọdo obu te enwejekwa obu-ọku;
onye ono ta amajẹ nke odobe iwhe l'obu.
6 Onye yeru madzụ ibe iya obu ta aswajẹkwaru ẹswa yeru iwhe l'eeme,
iwhe ọbu t'a kfụru nhamụnha.
O chikwaa iwhe kfụru nhamụnha bẹ onye ono l'aswajẹru ẹswa kpua.
7 Onye yeru madzụ obu ta avụjekwa ọvuma l'iwhe bụ-zhia iwhe onye ono meru iya.
Ọ bụkwaruwho oye ndu ọdo obu l'emeje tẹ madzụ kwetaje lẹ nke ọma l'iwhe bụ-zhia iwhe byarụ nụ.
O nokwawho gẹ l'oomeje tẹ madzụ leje ẹnya nke ọma l'iwhe lile.
Ọ bụkwaru oye obu ono l'emeje tẹ madzụ nwugbua iwhe l'obu,
e beru ọ bụru m'ọo ẹgube iwhe gụnu.
8 N-yemobu l'adụgbujeru jeye lẹ tututu-mịmimi.
Ike nke okfu okfu,
l'egoshi ozhi,
Chileke zhiru l'e-mechaa gvụ;
o nokwawho gẹ nke ọgha okfu-alị madzụ,
kfulahaa l'okfu,
Ume-Dụ-Nsọ l'e-goshi l'e-mechaa gbaa buhu.
O nokwawho gẹ nke l'a marụ Chileke ọkpobe amama l'a-gvụkwawho.
9 L'ọmaru Chileke ọkpobe amama ọwhu anyi marụ mẹe okfu okfu egoshi ozhi Chileke ọwhu anyi l'ekfu ntaa te edzukwa oke.
10 Ọle nteke Chileke l'e-goshigelewho anyi iwhe ọwhu dzuru oke,
iwhe bụkota iwhe l'ete edzua oke,
ewhushihu.
11 Lẹ nteke mu shi bụru nwata bẹ mu shi anọje ekfu g'ọo ụnwegirima,
mu shi anọje agba égò g'ọo ụnwegirima,
mu shi arịje ọriri g'ọo ụnwegirima.
Mu bya abụleruwho onye bụ ọgurenya,
mu tụko umere ụnwegirima pakọtaru haa.
12 Lẹ ntaa bẹ anyi gudeekwaa onyo awhụ iwhe lile inyoki-inyoki.
Ọle o -rwulewho nteke ono bẹ anyi lẹ Kuráyisutu l'a-whụgba onwanyị iwhu l'iwhu.
Ntaa bẹ mu marụ iwhe lile ibe lanụ ibe lanụ;
o -rwua nteke ono bẹ mu l'a-makọta iwhe lile ọkpobe amama lẹge Chileke marwetaru mbẹdua nta-a.
13 Ọo ya bụ l'ọo uzhi iwhe ẹto-ọ ya bẹ l'a-whọdu bụ iya bụ ekweta;
ole-ẹnya-iwhe mẹe n-yemobu,
whẹ whẹ ẹto ono tụkoru bụru iwhe l'ẹte afụa gvụ agvụ,
ọle ọwhu kakọta shii bụ n-yemobu.