Ndu ozhi, shi Bábyilọnu
39
Ọ bụru nteke ono bẹ Merodaku-baladanu, nwa Baladanu bụ eze ndu Bábyilọnu deshiru ẹkwo-ozhi bya ezhifu ndu ozhi tẹ whẹ je anụ iya Hezekáya; o ye iya iwhe whẹ l'a-nụ iya gude jịa ya l'ẹhu ono, shi eme iya nụ, nkele ọ nụru l'ẹhu shi tọ dụ iya mma, ọle ọ kawa iya mma. 2 Hezekáya nabata ndu ono, e zhiru ozhi ono ree-ree-ree. Ọ bya egoshi whẹ iwhe nọkota l'ụlo-ẹku iya; goshi whẹ mkpọla-ọcha mẹe mkpọla-ododo mẹe mmanụ, l'eshi mkpọ mẹe mmanụ, l'ere ire mẹe ngwọgu iya l'owhu, tụko iwhe dụkota l'ụlo-ẹku iya goshikota whẹ. Ọ tọ dụdu iwhe dụ l'ibe iya mẹe ọwhu dụ l'alị-eze iya l'owhu, l'ooto goshia ndu ono, mbụ Hezekáya.3 Tọ dụ iya bụ, Ayizáya, onye nkfuchiru Chileke bya ejekfu eze bụ Hezekáya jị iya sụ: “?Ọo gụnu bẹ ndu ono kfuru? ?Ọo awe bẹ whẹ shi bya nkeghu?”
Hezekáya sụ iya: “Whẹ shikwa ẹka teru ẹnya bya. Ọ kwa Bábyilọnu bẹ whẹ shi bya.”
4 Ayizáya jị iya sụ: “?Whẹ whụgbaberu gụnu l'ibe ghu?”
Hezekáya sụ iya: “Whẹ whụkotaru iwhe lile, dụ l'ibe mu. Ọ tọ dụdu ẹku, mu nweru enwe, mu l'ete egoshia whẹ.”
5 O noo ya, Ayizáya bya asụ Hezekáya: “Nụkwaa okfu Onye-Nwe-Ọha, bụ Onye-ishi-igwe-ọgu l'ekfu. 6 Ọ sụru agha: Oge l'abyawaa; nteke iwhe lile, dụ l'ibe ghu mẹe iwhe lile, nna ghu whẹ setaru dobe, ọ dụ byeye ntaa l'a-bụru iwhe e vutaru lashia Bábyilọnu. Ọ tọ dụdu iwhe a bya l'e-wowhodo ewowhodo. O nokwa iwhe Onye-Nwe-Ọha l'ekfu ndono. 7 Ụnwu ghu nwoke, bụ ndu ọ bụ ghu nwụru bẹ l'aa-harụ kpụta, whẹ eje abụru ndu a harụ aha nọdu l'ibe eze ndu Bábyilọnu.”
8 Hezekáya sụ Ayizáya: “Okfu Onye-Nwe-Ọha ono, i kfuru bẹ dụkwa ree.” Iwhe ọ rịru kfua nno bụ lẹ nchị l'a-dụ yẹbedua ndoo, l'ọ tọ dụdu iwhe bya l'e-me nteke ọ nọkwadu ndzụ.