22
Ọkpobe ẹwha kakwa ree ahata amamẹ oonwe iwhe shii,ọdu ndiwhe l'obu ka mkpọla-ọcha yẹle mkpọla-ododo ree.
2 Iwhe lanụ, dụ l'ẹhu onye nweru
iwhe bya adụkwawho l'ẹhu onye l'ẹte enwee
bẹ bụ l'ọo Onye-Nwe-Ọha mekotaru whẹ labọ.
3 Onye nweru uche l'awhụje iwhe
l'emekata iya, ya ezeeru iya.
Ọle onye l'amarwetaa iwhe l'ejeje
vukovukovuko je evuta ejo-ọnwu.
4 Owoze onwonye alị yẹle ọotsu egvu Onye-Nwe-Ọha
l'emeje t'e nweru iwhe,
l'oomeje t'a kwabẹ madzụ ugvu
bya emekwawho t'e nweru ndzụ.
5 Ụzo, onye ejo-ememe l'eshi bẹ ógvú l'uke jiru eji.
Ọle onye l'eche ndzụ iya eche bẹ l'anọje iya otẹnya.
6 Zhia nwata ụzo, gbarụ iya l'eshishi.
O vuta bụru ọgurenya; ọ tọ byadụ l'aha iya aha.
7 Onye nweru iwhe bẹ l'akajẹ onye ụkpa ẹkuku.
Onye ji ụgwo l'abụje nwohuta onye o jitaru iya.
8 Onye l'akụ mmegbu g'ọo akpụru iwhe
bẹ l'a-wọta iwhe-ọtsulanu.
Tẹmenu mgbọro, l'oogudeje egoshi
ẹhu-eghughu iya bẹ l'aa-nafụ iya.
9 Ndu bụ o-me-l'uko bẹ l'aa-gọru ọnu-ọma nụ,
o noo nkele whẹ l'ekejeru ndu ụkpa nri whẹ.
10 A -chịa onye ewenu, okfu alaa.
O noo g'ụswo yẹle ọko-ọnu l'a-gvụ.
11 Ndu l'ọoduje ree lẹ madzụ ibe whẹ bẹ obu gụru iwhoro,
mbụ ndu ono, okfu whẹ l'adụje bẹlebele
bẹ l'e-shita onye eze ọnya.
12 Onye-Nwe-Ọha bẹ ẹnya iya dụ l'ẹhu onye marụ iwhe.
Ọle okfu onye l'ẹte egudee ire
iya ẹka bẹ l'oomeje t'ọ bọ bẹ l'iwhe.
13 Onye ẹgali l'asụje: “Oduu-gburu-agụ nọkwa l'etezhi.
Mu lụfu bẹ l'ee-gbukwa mu l'echi-ụzo!”
14 Ọnu nwanyị, bụ o-kwe-l'ẹka-nwe-iya
bụ iduma, tụru omilomi.
Onye l'a-daba iya bụ onye kpatsuru
Onye-Nwe-Ọha ẹhu-eghughu.
15 Ụnwegirima-nshịi l'anọje eme eswe eswe.
Ọle iwhe l'eegudeje hụ̀ta whẹ bụ ẹchachi.
16 Onye l'akpapya onye ụkpa ishi nggẹ ya ka onweru iwhe,
yẹle onye bụlewho ndu nweru iwhe bẹ l'ọonuje iwhe iya,
bẹ l'e-mekochaa bụru onye ụkpa.
Uzhi okfu ụkporo l'iri, shi l'ọnu ndu marụ ágụ
17 Ngabẹ nchị nụ olu-okfu ndu marụ ágụ.
Dobe obu ghu l'iwhe ono, mu l'ezhi.
18 Nkele ọo-dụru ghu lẹ ree m'i kwakọbe iya l'ime obu ghu.
G'ị nwụkwaa ya whọ anwụ t'ọ dụje ghu l'ọnu.
19 Ọo ya bụ nke ọwhu l'ịi-kpọru obu yeru Onye-Nwe-Ọha.
Ọ kwa mu l'ezhi gụbedua iwhe ntanụ.
20 Ẹtu ọbu, mu l'ezhi bẹ mu
dekwaru edede l'ẹkwo deta iya ụkporo l'iri,
mbụ okfu, l'agba madzụ ume,
bụru okfu, bụ: i -mee ya, ya adụru ghu lẹ ree.
21 Ọ bụ okfu, mu gude ezhi ghu ọkpobe okfu
bụru okfu, gbarụ t'a dawhube,
nke ọwhu l'ịi-marụ ọkpobe ọnu,
l'ii-yeru onye zhiru ghu t'ị bya.
22 Ba anakwa onye ụkpa nwiwhe o nweru
nkele ọ tọ dụdu g'ọ harụ iya.
Gụ eje egwekwa onye iwhe
l'atsụ lanụ aryaka eryune l'ụlo-ikpe.
23 Nkele Onye-Nwe-Ọha
l'e-megekwaa gbaarụ whẹ ọdzori,
gude ndu ono, shi anashị whẹ iwhe whẹ nalata whẹ nkewhe.
24 Be eshikwa ọnya l'onye obu-ọku.
Gụ eje atụkwa ọli l'onye ẹhu l'eghuje eghu ẹgwegwa.
25 Ọdua bẹ l'ịi-wọtakwa ẹka iya,
gụ eje adaba l'iwhe l'ịitii gbaa ẹnya iya.
26 Ba abụkwa onye l'anajẹ madzụ lẹ mkpalẹka.
Ba asụbejekwa iwhe ghu l'ụgwo onye ọdo ji.
27 Nkele e -megee t'i nwe iwhe i gude akfụ ụgwo ono,
bẹ l'aa-pagekwa paa iwhe-azẹe ghu.
28 Be ewofukwa ékpè ndụ-ichee
unu whẹ gude kpaa oge-alị.
29 Ị -whụa onye ozhi, l'ooje doru ẹnya ree,
marụ l'oo-mege jeeru ndu eze ozhi.
O too jeduru ndu l'ẹte ama ẹwha whẹ ozhi.