Egvu-ọma, Dévidi deru nụ onye ishi egvu
40
Mu talẹruwho nshi ngabẹru Onye-Nwe-Ọha,jeye nteke ọ gharụ mu iwhu; bya anụa olu mu.
2 O kufuta mu l'iduma maa,
mbụ l'o kufutaru mu l'ime ẹpoto, l'echi ẹturu.
Ọ bya edobe mu l'ẹka ọkpa rwuru mu alị mu,
mee mu, mu kfụru kfụshia ike.
3 O yeru mu egvu ọwhuu l'ọnu,
mbụ egvu, e gude aja Chileke anyi ama.
Ikpoto madzụ l'a-whụ iwhe
meru nụ, whẹ eyelahaaru Chileke ẹso,
whẹ awata bya adakobe Onye-Nwe-Ọha.
4 Ẹhu-ụtso bụ nke onye bụlewho
Onye-Nwe-Ọha b'ọ dakoberu,
onye ẹnya iya l'adụa l'ẹka ndu l'eku onwowhe eku nọ,
mbụ onye ẹnya iya l'adụa l'ẹka ndu l'eme nke ọgvu nọ.
5 Gụbe Onye-Nwe-Ọha, bụ Chileke mu,
iwhe dụ biribiri, i meshiru bẹ hanụkakwa l'igweligwe.
Iwhe dụ ree, ị tụberu t'i meeru anyi,
ta adụdu onye sụru gẹ l'ọo-gushiru ghu iya.
Mu -jeshia ya agụgu nnanụ nnanụ bẹ l'ọo-bụ agụta agụta.
6 Iwhe l'agụ ghu nụ ta abụkwa t'a
gwajẹ ghu agwagwa,
ọdua l'ọo gwotaru ghu ngwo-ẹja,
ọ chia ụzo-nchị b'ị harụ mu.
Ngwo-ẹja ọkpokota-iwhe-ọku
mẹe ngwo-ẹja iwhe-dụ-ẹji ta adụdu ọwhu ị jịru ajị iya.
7 Ọo ya bụ, mu sụ: “Lee mu ndọwa Chileke.
Mu byawarụ tẹ mu mee iwhe e deru l'okfu ẹhu mu lẹ Ẹkwo Iwu.
8 Gụbe Chileke mu, iwhe dụ-zhia
mu whọ ree bụ tẹ mu mee iwhe dụ ghu l'uche.
Iwu ghu l'adụjele mu whọ l'obu ntekenteke.”
9 Mu gudewaa ọnu mu ryaa
ọ-dụ-chịriri ghu aryarya l'ẹka ọha-l'eze dzuru edzudzu.
Gụbe Onye-Nwe-Ọha, ị marụ lẹ mu
ta takpụbejedu ọnu atakpụbe.
10 Mu te ezojedu ọnu anọ ekfu
l'ị dụ chịriri, mu ta sumijedu iya l'ime obu mu.
Mu l'ekfukashije l'ị bụ o-me-g'o-kfuru, bụru onye ndzọta.
Lẹ g'i gude yebe madzụ obu mẹe
lẹ g'i gude bụru onye ire-lanụ bẹ mu l'ẹte ahajẹdu ọnu aha.
11 Gụbe Onye-Nwe-Ọha, byiko
ba ahabụkwaa mu ọwhuru imiko.
Tẹ n-yemobu ghu mẹe ire-lanụ ghu
ono chekwajekwa mu ẹhu ntekenteke.
12 Iwhe-ọtsulanu, bụ agụta agụta bẹ
nọ-whewaru mu mgburumgburu.
Iwhe-dụ-ẹji, mu metagbaberu
rikputaakwaru mu ẹhu,
nke ọwhu bụ lẹ mu ta adụhedu ike awhụfu ụzo.
Ọ ka ẹgbushi, dụ mu l'ishi l'igweligwe.
Ntaa bẹ mu l'amakwaa gẹ mu l'e-me iya.
13 Gụbe Onye-Nwe-Ọha, t'ọ bụnuru uche ghu t'ị dzọo mu.
Bya ẹgwegwa bya eyeru mu ẹka; jiko Onye-Nwe-Ọha.
14 T'iwhe bụ ndu l'achọ gẹ whẹ
l'e-me kpawhua ishi mu bụkwaru
ndu l'ee-me iwhe iwhere; t'a tụkwaa whẹ ẹyerebeke.
Chekwaa ndu l'agbarụ mu ejo iwhu égò ichiwhu.
T'iwhere ji whẹ iwhu.
15 T'e meru iwhe-iwhere nụ
ndu l'akụru mu hụu, t'ẹhu sụkwa whẹ kọo.
16 T'iwhe bụ ndu l'achọ ghu nụ bụru ndu ẹhu l'a-tsọ ụtso.
Whẹ anọdu ghu l'ẹka tee ẹswa.
T'iwhe whẹ l'a-kpụru l'ọnu ekfu
ntekenteke, mbụ ndu ọ dụ nke
t'ị dzọfuta whẹ bụru lẹ Onye-Nwe-Ọha bẹ parụ ẹka.
17 Ọle mbẹdua bụ onye ụkpa,
bụkwaruwho onye l'adụa g'ọ harụ iya,
ọle Onye-Nwe-Ọha l'arịlee ọriri ẹhu mu.
Ọo ghu bụ onye l'eyejeru mu ẹka; ọ bụru ghu l'adzọje mu ndzụ.
Byiko Chileke mu, ba kpọkwa ụkfu.