Egvu, Dévidi deru nteke ọ kwabẹru ẹnya melahaa g'ọo onye ọgvu l'iwhu Ábyimelẹku, Ábyimelẹku chịfu iya
34
Mu l'a-nọje etu Onye-Nwe-Ọha ẹwha ntekenteke.Ọ tọ dụdu nteke mu bya l'ajabuhu iya ajaja.
2 Ọo Onye-Nwe-Ọha bẹ mu gude anga l'ụnga.
Ndu l'aakpa ẹhu -nụle iya whọ, ẹhu atsọo whẹ ụtso.
3 Bya t'anyi tụko tụa ọnu gẹ Onye-Nwe-Ọha paberu ẹka,
mbụ t'anyi tụko kutsee ẹwha iya.
4 Mu ryakuru Onye-Nwe-Ọha,
ọ za mu, bya emee, mu tsụ-buhu egvu.
5 Ndu l'ele ẹnya iya bẹ l'oomeje t'ọnu-ọchi nwụa,
ọ tọ dụdu nteke iwhere bya l'e-me whẹ.
6 Mụbe onye-e l'adụa g'ọ harụ mu
chiru mkpu, Onye-Nwe-Ọha za mu oku,
bya adzọfutakota mu l'iwhe-ọtsulanu, mu l'eje g'ọ ha.
7 Ojozhi-imigwe ọwhu shi l'ẹka Onye-Nwe-Ọha l'anọ-wheje
ndu l'atsụ egvu Onye-Nwe-Ọha mgburumgburu.
Ọodzoje whẹ ntekenteke.
8 Unu dalee Onye-Nwe-Ọha, unu awhụ l'ọ dụ ree.
Ẹhu-ụtso bụ nke ndu gbabaru iya l'ime je ezeeru ndzụ.
9 Unu tsụje Onye-Nwe-Ọha egvu,
unubẹ ndu nsọ nke Onye-Nwe-Ọha,
lẹ ndu l'atsụ iya egvu ta adụkwa iwhe ụko iya l'adụjeru whẹ.
10 Oduu-gburu-agụ nwegeeru mkpa; ẹgu l'anọje agụkaa whẹ,
ọle ndu l'achọ Onye-Nwe-Ọha
bẹ ụko iwhe-ọma l'a-byadụa l'adụru.
11 Unu byaada-a, unubẹ ụnwegirima mu, bya angabẹru mu nchị,
tẹ mu zhia unu gẹ l'aatsụje Onye-Nwe-Ọha egvu.
12 Iwhe bụ onye l'ọogu ẹgu tẹ ndzụ iya kpọliberu,
mbọku mbọku abụru iya nke ọma,
13 t'onye ọbu wofukwa ọnu l'ejo iwhe, haa ọdzu ejire.
14 Gbẹeru ome ejo-iwhe azụ, melahaa iwhe dụ ree.
Kebeje ẹhu chọo iwhe bụ: i -mee ya, nchị adụ ndoo.
I -chọ-vule iya whọ; ba atugbekwa iya ẹka.
15 Onye-Nwe-Ọha bẹ ẹnya iya dụ l'ẹhu ndu dụ chịriri,
o nokwawho gẹ l'ọongabeje nchị l'ẹkwa,
whẹ l'aryaku iya.
16 Ọle ọwhube ndu yeru ẹka l'ome
ejo-iwhe bẹ Onye-Nwe-Ọha l'ẹte
elejedu ẹnya-ọma, nke ọwhu ẹwha whẹ l'a-tọhu lẹ mgboko.
17 Ndu dụ chịriri l'abụje, whẹ -ryaku Onye-Nwe-Ọha ya aza whẹ,
bya anafụta whẹ l'iwhe-ọtsulanu, whẹ l'eje g'ọ ha.
18 Onye-Nwe-Ọha l'anọkubeje ndu ụzo chiru.
Ndu obu kfuwahuru ekfuwahu
l'ọnodu, whẹ nọ bẹ l'ọodzofutaje.
19 Onye dụ chịriri l'ejeje iwhe-ọtsulanu, ha l'igweligwe,
ọle Onye-Nwe-Ọha l'anafụtaje iya
l'iwhe-ọtsulanu ono g'ọ hakọta.
20 Ọkpu, dụ iya l'ẹhu bẹ l'ọonwubejeru ẹnya.
Ọ tọ dụkwa m'ọo ọkpu lanụ, dụ
iya l'ẹhu a bya l'akukwo akukwo.
21 Ọle onye ejo-ememe bụ ejo-iwhe ono, l'oo-me l'e-gbu iya.
Ndu kpọru ndu dụ chịriri ashị bẹ l'aa-nma ikpe.
22 Onye-Nwe-Ọha l'agbafụtaje ndzụ ndu l'ejeru iya ozhi.
Ọ tọ dụdu m'ọo onye lanụ,
gbabaru l'ime iya je anọdu ezeru ndzụ, a bya l'a-nma ikpe.