Ẹzura l'ekfu anụ Chileke tẹ ndu Ju mẹe ndu l'ẹte abụa ndu Ju be ekegbashi nwanyị
9
E megelewho iwhe lile ono, ndu ishi byakfutashia mu bya asụ mu: “Ndu Ízurẹlu je akpaa lẹ ndu l'agbajẹ ẹja nụ Chileke mẹe ndu Lívayi bẹ jịkakwaru odobe onwowhe iche l'ẹka ndu alị-a nọ, whẹ tsoru eyewhe ẹka l'akpamara ono, ndu alị-a l'anọje emegbabe, mbụ ndu Kenanu, mẹe ndu Hetu, mẹe ndu Pẹrezu, mẹe Jebusu, mẹe ndu Amọnu, mẹe ndu Moabu, mẹe ndu Íjiputu, mẹe ndu Amọru. 2 Nkele whẹ lụshiwaru ụnwada ndu alị-a doberu onwowhe, lụshiwaa whẹ doberu ụnwu whẹ. Nke ọwhu bụ lẹ whẹbe eri ono, dụ nsọ bẹ whẹ lẹ ndu alị-a gwakọbewaru onwowhe. Ndu tarụ ishi oome ejo-iwhe ono bẹ bụ ndu ishi mẹe ndu l'achị achịchi.” 3 Nteke mu nụru iwhe ono bẹ mu dọjashiru uwe mu, dọjashia uwe mkpẹelanu mu, mu wheta onwomu ẹgbushi l'ishi, wheta ẹji-agba, bya anọdu tsụyoo. 4 O noo ya, whẹ bya anọ-whee mu mgburumgburu mbụ ndu ọwhu egvu tsụhuru gẹ whẹ nụru okfu ono, Chileke nke Ízurẹlu kfuru l'iswi emeswe ono, ndu ono, a kpụru lẹ ndzụ, larụ nụ whọ mesweru. Mu nọdu tsụyoo nno jeye l'ọgba ẹja urwẹnyashi.5 O be l'ọgba ẹja urwẹnyashi ono, mu shi l'ọnodu onye áwhụ byarụ ono, mu nọdu gbalihu, yekwaruwho uwe mu ono mẹe uwe mkpẹelanu mu ono, mu dọjashiru adọjashi. Mu bya ewhuzeta byishi ikpere l'alị chiliaru Onye-Nwe-Ọha, bụ Chileke mu ẹka mu labọ imeli 6 kfuru nụ iya sụ: Oowaa Chileke mu, iwhere dụkwa mu, ẹhu rwụrwuhukwaru mu arwụrwuhu gẹ mu l'e-shi palia iwhu apali l'ẹka ị nọ gụbe Chileke mu. Iwhe kparụ iya nụ bụ l'ejo-iwhe, anyi l'emegbabe bẹ vuwaru evuvu ka anyi nkajishi. Ikpe, nmarụ anyi tsewaa rigorigo tserwua imigwe. 7 Wata l'oge nke nna anyi whẹ rwua ntanụ bẹ ikpe, parụ ẹka nmawarụ anyi. Ọ bụru ejo-iwhe, anyi l'emegbabe bẹ meru g'o gude e woru anyịbedua, mẹe ndu eze anyi whẹ, mẹe ndu l'agbajẹ ẹja nụ Chileke anyi whẹ ye ndu eze ndu alị-a l'ẹka. Whẹ gude ogu-ịgba gbushia anyi, kpụkoo anyi lẹ ndzụ, kwaa iwhe anyi l'ọkwata, bya emee anyi iwhe-iwhere, ẹgube ono, whẹ l'eme iya anyi ntanụ.
8 Ọle ntaa bẹ gụbe Onye-Nwe-Ọha, bụ Chileke anyi mewaru anyi iwhe-ọma lẹ nwa oge-e ya nụ, nkele i meru, anyi nweru nwa ndu ọwhu, wafụru nụ, bya emee t'anyi kpọru g'ọo abara l'ẹka-a, dụru ghu nsọ-ọ. Nke ọwhu bụ lẹ gụbe Chileke anyi bẹ mewaru ẹnya saa anyi, bya akpọru ndzụ anyi ye l'ishi ogbunkụ l'ohu-a, anyi bụ ẹgube ya nụ. 9 Anyi bụ ohu; ọle gụbe Chileke anyi ta hadụ anyi t'ohu ono, anyi bụ ria anyi. I goshiru l'ịiwhuru anyi imiko l'iwhu ndu eze ndu Peshiya, bya akpọru ndzụ anyi ye l'ishi ogbụnku, shi nno mee t'anyi gvuberu gụbe Chileke anyi ụlo, mekwashia ẹka o zekposhihuru ezekposhihu, ị bya emee t'anyi nweru mgbodo tuwheru Juda lẹ Jerúsalẹmu mgburumgburu.
10 Oowaa Chileke anyi, ?ọo gụnu bẹ anyi l'e-kfu ntaa l'iwhe-e, nọdu nwụgbabe ẹgube-ẹ; g'anyi gbee pawarụ ome iwu ghu haa, 11 mbụ iwu ono, i shi l'ẹka ndu ozhi ghu ono, bụ ndu nkfuchiru tụa sụ: Alị ono, unu l'abahụ eje eburu bẹ bụ alị, ndu bu iya nụ gude ụrwu-alị merwushia. Akpamara, whẹ meru bẹ jiru alị ono eji watazhiawho l'ishi lanụ rwua l'ishi iya ọwhu, shi nno mee, ọ bụru ẹka a wharụ kutukutu. 12 Ọo ya bụ, t'unu be ewokwaru ụnwada unu kee ụnwu whẹ unwoke. Unu eje alụkwa ụnwada whẹ doberu ụnwu unu unwoke. T'unu be ejekwa ọcho ụzo gẹ l'ee-shi t'unu lẹ whẹ nọdu lẹ nchị ọdu ndoo mẹe gẹ l'ee-shi t'unu lẹ whẹ nweru ọga-l'iwhu lanụ; nke ọwhu unu l'e-buru l'alị ono shihu ike, ria iwhe-ọma, shi iya nụ, rita riwhodo t'ọ bụru oje-lẹ-nwanwa unu jeye lẹ gbururu.
13 “Iwhe lile, nwụru l'ẹhu anyi bụ l'ejo-iwhe ono, anyi meru mẹe l'ikpe ono, nmarụ anyi l'ụzo parụ ẹka apaa b'o shi. Ọle ọbu, gụbe Chileke anyi, àhụ̀hù ono, ị hụru anyi bẹ kakwa nwanshị amamẹ ejo-iwhe, anyi megbaberu, mbụ l'i meru, anyi nwekwaduru nwa ndu ọwhu wafụru nụ ẹgube-ẹ. 14 ?O nwezhiaru iwhe bya l'e-me t'anyi mebyibaa iwhe ị tụru l'iwu ọdo, nke t'anyi lẹ ndu ono, l'eme akpamara ono kegbaru nwanyị ọdo? Nkele anyi -mee nno bẹ l'ii-gudekwa ẹhu-eghughu lakọta anyi l'iyi, ya eje aadụ onye l'a-wafụ m'ọ bụ onye l'a-whọdu nụ. 15 Oowaa Onye-Nwe-Ọha, bụ Chileke nke ndu Ízurẹlu, ị bụ onye dụ chịriri. I meru anyi bụru nwa ndu ọwhu wafụru nụ nke ntanụ. Lekwa g'anyi nọ l'atatiwhu ghu bụru ndu ikpe nmarụ. A makwarụa l'ọ tọ dụdu onye ikpe nmarụ l'a-dụ ike akpọ ghu iwhu.”