3 Jowabu sụ: “Tẹ Onye-Nwe-Ọha mekwaa tẹ ndibe iya kabaa l'igwe ugbo ụkporo ise amamẹ gẹ whẹ ha ntaa. Onye-nwe-mu nụ, bụ eze, Ízurẹlu l'owhu bụkotakwa ndu ozhi ghu. ?Ndẹhunu iwhe meru g'o gude l'iime t'i mee ụdu iwhe ọwa, shi nno meta iwhe ikpe l'a-nma ndu Ízurẹlu?” 4 Obenu l'eze kfuru iya kepyaa ya akụ. Ọo ya bụ, Jowabu kwee tụgburu jegbakota Ízurẹlu l'owhu, bya alwawhu azụ lẹ Jerúsalẹmu. 5 Jowabu bya akọoru Dévidi ụmadzu ole, ọ gụtaru l'ọgu ono. Ízurẹlu l'owhu bẹ whẹ gụtaru ụkporo ụnu unwoke ụkporo ugbo ishii ụzo iri l'ẹsaa l'ụnu nwoke iri, bụ ndu ojọgu. A bya lẹ Juda whẹ gụta ụkporo ụnu unwoke ụkporo ugbo labọ ụzo iri l'ẹsato l'ụnu unwoke iri l'ise, bụkwawho ndu ojọgu.

6 Ọle ọ tọ gụkobedu ikfu Lívayi mẹe ikfu Bénjaminu l'ọgu ono nkele ozhi ono, eze zhiru iya bụru iya ejo nzhi.

7 Iwhe ono bụru iwhe l'adụa Chileke ree, o kwobe iya gwaa ndu Ízurẹlu ndọgolo. 8 Dévidi bya asụ Chileke: “Iwhe mu meru bụ iwhe-dụ-ẹji, parụ ẹka shii. Byiko gụnuaru mu nvụ l'ejo-iwhe ono, mụbe onye ozhi ghu meru. Ọ kwa eswe bẹ mu meru nno.”

9 Onye-Nwe-Ọha kfuru yeru Gadu, bụ onye l'awhụ ọwhulenya, Dévidi doberu nke ẹka iya sụ iya: 10 “Je je asụ Dévidi l'ọ waa iwhe Onye-Nwe-Ọha l'ekfu ndọwa: Mu l'a-kpọberu ghu uzhi iwhe ẹto, gụ ahata nnanụ, mu l'e-meru ghu.”

11 O noo ya, Gadu jekfushia Dévidi je asụ iya: “Ọ waa iwhe Onye-Nwe-Ọha l'ekfu ndọwa: Kpọbe hata. 12 ?Ị hatarụ t'ụnwu dụ awha ẹto? T'ị hatarụ tẹ ndu ọhogu unu gude ọnwa ẹto mee unu emerekete, gbugbushia unu lẹ mma? ?T'ị hatarụ tẹ Onye-Nwe-Ọha gude abalị ẹto gbufukota unu l'ogu-ịgba, mbụ wobata ejo ẹhu-ba-dụ-mma l'alị-a; ojozhi-imigwe shi l'ẹka Onye-Nwe-Ọha emebyishia iwhe ọ whụru l'alị Ízurẹlu l'owhu? Ntaa bụkwa t'ị ghaa hata ọwhu, mu l'e-je ekfuru onye zhiru mu nu.”

13 Dévidi bya asụ Gadu: “Iwhe-ọtsulanu, byarụ mu nụ bẹ hakwa shii. Ọle ọ kakwarụ mu mma tẹ mu daba l'ẹka Onye-Nwe-Ọha amamẹ lẹ mu dabarụ madzụ l'ẹka, o noo nkele Onye-Nwe-Ọha nwenukaru obu-imiko.”

14 O noo ya, Onye-Nwe-Ọha lọru nchịkarehu tụ ndu Ízurẹlu. Ndu ọ tarụ ishi whẹ dụ ụkporo ụnu madzụ ugbo ẹsato l'ụnu madzụ ugbo iri l'ise. 15 Onye-Nwe-Ọha zhia ojozhi-imigwe ono t'o jee Jerúsalẹmu je alaa ya l'iyi. Ọle nteke ojozhi-imigwe ono l'eme tẹ ya laa Jerúsalẹmu l'iyi bẹ Onye-Nwe-Ọha whụru iya; obu jizeta iya. Ọ sụ ojozhi-imigwe ono, l'ala iwhe l'iyi ono sụ: “Ọ dzuwaru! Sewhu ẹka ghu azụ parụ whẹ haa.” Nteke ono bẹ ojozhi-imigwe ono, shi l'ẹka Onye-Nwe-Ọha ono bẹ nọwa l'ọma ẹka Ọnanu onye Jebusu l'anọduje echishi ẹswa lẹ balị iya.

16 Dévidi palia ẹnya imeli whụ ojozhi-imigwe ono, shi l'ẹka Onye-Nwe-Ọha lẹge ọ kfụru lẹ mgbaku igwe yẹle alị, mịfuta ogu-ịgba mabẹ lẹ Jerúsalẹmu. Nteke ono bẹ Dévidi yẹle ndu bụ ọgurenya yegeeru uwe-mkpe; whẹ dashịa kpube iwhu l'alị.

17 Dévidi bya asụ Chileke: “Ọ kwa mbẹdua bẹ tụru iwu t'a gụa ọgu ono. Ọo mbẹdua bẹ meru iwhe-dụ-ẹji; mu mewaru iwhe l'adụa ree. ?Ụnwu atụru-a mehunuru ole? Byiko Onye-Nwe-Ọha, bụ Chileke mu, iwhe mu l'aryọ ghu bụ; t'ọ bụru mbẹdua mẹe ndibe nna mu bẹ l'ịi-dabẹ ẹka l'ẹhu. Be ekweshinu tẹ nchịkarehu-a byakfuta ndibe nkeghu.”

18 Tọ dụ iya bụ, ojozhi-imigwe ono, shi l'ẹka Onye-Nwe-Ọha sụ Gadu t'o je ekfuru Dévidi t'o je emoberu Onye-Nwe-Ọha ẹnya-mgbẹja l'ọma ẹka ono, Ọnanu onye Jebusu l'anọduje echishi ẹswa lẹ balị iya. 19 Ọo ya bụ, Dévidi tụgburu je eme ya ẹgube ono Gadu gude ẹwha Onye-Nwe-Ọha kfuru iye ya. 20 Nteke ono bẹ Ọnanu l'echishi ẹswa lẹ witi, ọ bya aghachi whụ ojozhi-imigwe ono, ụnwegirima iya whẹ ẹno, bụ ndu whẹ l'iya nọ domishia onwowhe. 21 Gẹ Dévidi l'eje abyakfuta Ọnanu bẹ Ọnanu paliru ẹnya whụ Dévidi l'ooje abya, o shi l'ẹka ono l'oochishi ẹswa lẹ witi je ewhuzetaru Dévidi iwhu l'alị kwabẹ iya ugvu. 22 Dévidi sụ Ọnanu: “Benu mu alị-a, bụ ẹka l'iichishije ẹswa lẹ witi tẹ mu moberu Onye-Nwe-Ọha ẹnya-mgbẹja. Bee mu iya tẹ mu kfụ-dzua ghu aswa iya akfụ-dzu, nke ọwhu nchịkarehu ono l'e-buhu l'ẹka ndu Ízurẹlu nọ.”

23 Ọnanu sụ Dévidi: “Wota iya roo. Tẹ gụbe eze bụ onye-nwe-mu nụ gude iya mee iwhe dụ ghu ree. Mbẹdua l'a-nụ eswi, l'ee-gude gbaarụ Onye-Nwe-Ọha ẹja ọkpokota-iwhe-ọku. Mu anụ oshi, l'eegudeje echishi ẹswa lẹ witi t'ọ bụru nkụ, bya anụ witi t'e gude gbaa ẹja nri. Mu l'a-nụkota iwhe ono g'ọ ha.”

24 Eze Dévidi sụ Ọnanu: “Waawa; mu l'a-kfụ-dzu ghu aswa iya akfụ-dzu. Mu te ewotadu iwhe bụ iwhe ghu anụ Onye-Nwe-Ọha. Mu te egudedu iwhe l'adụa iwhe o whuru mu gbaarụ Onye-Nwe-Ọha ẹja ọkpokota-iwhe-ọku.” 25 Ọo ya bụ, Dévidi kfụa Ọnanu okpoga mkpọla-ododo, dụ ụnu shẹkelu l'ụkporo shẹkelu ugbo iri t'ọ bụru ụgwo alị ono. 26 Dévidi bya atụaru Onye-Nwe-Ọha ẹnya-mgbẹja ọkpokota-iwhe-ọku, bya agbaa ya ẹja ọkpokota-iwhe-ọku mẹe ngwo-ẹja ẹhu-guu, ọ kpokua ẹwha Onye-Nwe-Ọha; o shi l'imigwe gude ọku bya aza iya oku l'eli ẹnya-mgbẹja ono.

27 Tọ dụ iya bụ, Onye-Nwe-Ọha bya ekfuru yeru ojozhi ono, ọ mịru ogu-ịgba iya yewhu azụ l'ọbo. 28 Nteke ono ya nụ bẹ Dévidi bya awhụ lẹ Onye-Nwe-Ọha bẹ zarụ iya oku l'ẹka ono, Ọnanu onye Jebusu l'echishije ẹswa lẹ witi, ọ nọdu l'ẹka ono gbashịa ngwo-ẹja. 29 Nkele nteke ono bẹ mkpuumkpu Onye-Nwe-Ọha whọ, Mósisu mejeru l'echi-ẹgu yẹle ẹnya-mgbẹja ọkpokota-iwhe-ọku bẹ dụkota l'ẹka l'aagwa iwhe dụ lẹ mkpụkpu Gibyiyọnu. 30 Ọle Dévidi ta akwadụ tẹ ya jeeda njịta l'ẹka Chileke l'ẹka ono, nkele ọ tsụ ogu-ịgba ojozhi-imigwe ono, shi l'ẹka Onye-Nwe-Ọha ono egvu.