Ndu a kpụru lẹ ndzụ laa Bábyilọnu lwawhuru azụ lẹ Jerúsalẹmu
9
O noo ya, ndu Ízurẹlu l'owhu b'e dekotaru ẹwha whẹ l'ẹkwo e deshiru g'e shi nwụa whẹ. Whẹ lile b'e deru l'ẹkwo ndu eze ndu Ízurẹlu.Ndu Juda b'a kpụru lẹ ndzụ laa Bábyilọnu. Iwhe kpatarụ iya nụ bụ lẹ whẹ mesweru Chileke. 2 Ndu mbụ, vugezhia ụzo bya ebuwhuru azụ l'alị ono, bụ nke ẹka whẹ bẹ bụ ụwhodu lẹ ndu Ízurẹlu mẹe ndu l'agbajẹ ẹja nụ Chileke mẹe ndu shi l'eri Lívayi mẹe ndu l'eje ozhi l'eze-ụlo Chileke.
3 Ọ waa bụ ndu shi l'eri Juda mẹe l'eri Bénjaminu mẹe l'eri Ífuremu mẹe l'eri Manáse lwaa bya eburu lẹ Jerúsalẹmu:
4 Utayi, bụ nwa Amihudu, Amihudu bụru nwa Omiri, Omiri bụru nwa Imiri, Imiri bụru nwa Baní, Baní shi l'eri Pẹ́rezu, Pẹ́rezu bụru nwa Juda.
5 A bya lẹ ndu ọwhu shi l'eri Shilo,
ọ bụru Ayizáya, bụ ọkpara yẹle ụnwu iya.
6 A bya lẹ ndu ọwhu shi l'eri Zera,
ọ bụru Jewẹlu. Iwhe bụ ndu shi l'eri Juda lwa bẹ dụ ụnu madzụ l'ụkporo ugbo iri l'ẹno l'ụmadzu iri.
7 A bya lẹ ndu ọwhu shi l'eri Bénjaminu,
ọ bụru Salu, bụ nwa Meshulamu; Meshulamu bụ nwa Hodavaya, Hodavaya bụru nwa Hasenuwa.
8 Onye ọdo bụ Ibuneya, bụ nwa Jerohamu mẹe Ela, bụ nwa Uzi. Uzi bụ nwa Mikiri, Meshulamu bụru nwa Shefataya, Shefataya bụru nwa Ruwẹlu, Ruwẹlu bụru nwa Ibunayija.
9 Ndu shi l'eri Bénjaminu lwa bẹ dụ ụnu madzụ ugbo labọ l'ụkporo ugbo ẹsaa l'ụmadzu iri l'ishii. Gẹ whẹ ha bụkota ishi l'ibe nna whẹ.
10 A bya lẹ ndu l'agbajẹ ẹja nụ Chileke,
ọ bụru Jedaya, Jehoyaribu, Jakinu, 11 ọwaa Azaríya, bụ nwa Hilikaya. Hilikaya bụ nwa Meshulamu, Meshulamu bụru nwa Zédọku, Zédọku bụru nwa Merayotu, Merayotu bụru nwa Ahitubu, bụ onye ishi eze-ụlo Chileke.
12 Onye ọdo bụ Adaya, bụ nwa Jerohamu, Jerohamu bụru nwa Pashọ, Pashọ bụru nwa Málukija mẹe Masayi, bụ nwa Ádiyelu, Ádiyelu bụru nwa Jahuzera, Jahuzera bụru nwa Meshulamu, Meshulamu bụru nwa Meshilemitu, Meshilemitu bụru nwa Ịma.
13 Ndu bụ abụbu ndu l'agbajẹ ẹja nụ Chileke, mbụ ndu bụ ishi l'ibe nna whẹ bẹ dụ ụnu ugbo ẹno l'ụkporo madzụ ugbo ẹsato lwa. Whẹ bụkota ndu ike dụ l'oje ozhi, dụ l'eze-ụlo Chileke.
14 A bya lẹ ndu ọwhu bụ eri Lívayi,
ọ bụru Shemaya bụ nwa Hashubu; Hashubu bụ nwa Azurikamu, Azurikamu bụru nwa Hashabyiya, bụ ẹpa Merari. 15 Onye ọdo bụ Bakubaka mẹe Hereshi mẹe Galalu mẹe Mataniya, bụ nwa Mayịka; Mayịka bụru nwa Zikiri, Zikiri bụru nwa Asafu. 16 Onye bụ Obedaya, bụ nwa Shemaya, Shemaya bụru nwa Galalu, Galalu bụru nwa nke Jedutunu. Onye ọdo bụ Berekaya, bụ nwa Asa, Asa bụru nwa Ẹ́lukana onye bu lẹ nwa mkpụkpu, dụ lẹ mgboro Netofa.
17 A bya lẹ ndu nche eze-ụlo Chileke,
ọ bụru Shalumu, Akubu, Talụmonu, Ahimanu mẹwaro unwune whẹ. Onye bụ onye ishi whẹ bụ Shalumu.
18 Ẹka whẹ l'eeche bụ Ọnoguzo Eze, dụ laarụ ụzo ẹnyanwu-awata. Whẹ l'eche iya byeye ntanụ. Ọo whẹ shi eche ẹka l'eeshije abahụ l'ẹka ndu eri Lívayi bu.
19 Shalumu bụ nwa Kore, Kore bụru nwa Ẹbyiyasafu, Ẹbyiyasafu bụru nwa Kora. Shalumu yẹle ụnwunna iya, mbụ ndu ẹnya-uwhu whẹ ono, bụ ẹpa Kora b'o shi dụ l'ẹka, mbụ oche ẹka l'eeshije abahụ l'ụlo-ẹkwa Onye-Nwe-Ọha. O nokwawho gẹ nna whẹ shi eche ẹka l'eeshije abahụ l'ọdu Onye-Nwe-Ọha.
20 Nteke gahawarụ aga bẹ bụ Fínihasu nwa Eliyéza shi bụru onye ishi whẹ, Onye-Nwe-Ọha swiru iya eswiru.
21 Zakaráya, bụ nwa Meshelemiya bẹ shikwawho eche ọnu ẹka l'eeshije abahụ lẹ Ụlo-ẹkwa ndzuko ono.
22 Iwhe bụ ndu lile, a họtaru tẹ whẹ cheje nche l'ọnu ẹka l'eeshije abata abata bẹ dụ ụkporo madzụ ugbo iri l'ụmadzu iri l'ẹbo. E dekotaru ẹwha whẹ l'ẹkwo e deshiru g'e shi nwụa whẹ lẹ mkpụkpu lẹ mkpụkpu whẹ. Ọo Dévidi yẹle Sámuwẹlu, bụ onye l'awhụ awhụ bẹ doberu whẹ woru ozhi ono ye whẹ l'ẹka, nkele whẹ gbarụ t'e gude ire whẹ ẹka. 23 Ọo ya bụ l'ọo whẹbedua mẹe ụnwu whẹ b'ọ dụ l'ẹka, mbụ oche ẹka l'eeshije abahụ l'ụlo Onye-Nwe-Ọha nche, bụ iya bụ ụlo-ẹkwa. 24 Ndu nche ono l'anọdukotaje lẹ mgburẹku ẹno l'eze-ụlo ono. Whẹ l'anọduje l'ọnu iya nke ẹnyanwu-awata, nọdu lẹ nke ẹnyanwu-arịba, nọdu lẹ nke isheli, nọdu lẹ nke ọhuda. 25 Ụnwunna whẹ l'eshije l'ime obodo bya agbanwee whẹ chee nche abalị ẹsaa. Whẹ l'emeje iya nno shi l'oge rwua l'oge. 26 Ụmadzu ẹno, shi l'eri Lívayi, bụ ndu ishi nche ono b'a ta gbanwejedu agbanwe. Ọo whẹ l'eche ime eze-ụlo Onye-Nwe-Ọha, eche ụlo l'aakwakọbe ẹku Onye-Nwe-Ọha. 27 Whẹ l'anọ-wheje eze-ụlo Chileke ono mgburumgburu radụ iya jeye chi asahụ, o noo nkele ọo whẹ b'ọ dụru mbụ oche ẹka ono nche, ọ bụru whẹ bẹ l'agụhaje ụlo ono l'ụtsu l'ụtsu.
28 Ụwhodu lẹ ndu Lívayi b'ọ dụ l'ẹka mbụ arya, l'eegudeje eje ozhi l'eze-ụlo Chileke. Ọo whẹbedua b'ọ dụru tẹ whẹ gụje arya ono ọgu nteke a chịbataru iya mẹe nteke a chịfuru iya achịfu. 29 O nweru ndu ọwhu a tụru ẹka tẹ whẹ bụru ndu ishi, l'eleta ngwa, dụ l'eze-ụlo ono mẹe arya lile, dụ nsọ mẹe ụturutuu-balị mẹe mmẹe vayịnu mẹe mmanụ mẹe ụ̀nwù-isẹnsu mẹe mmanụ, l'eshi mkpọ. 30 O nweru ndu l'agbajẹ ẹja nụ Chileke, ozhi whẹ bụ ọgwa mmanụ, l'eshi mkpọ.
31 O-shi-l'eri Lívayi, ẹwha iya bụ Matitiya, mbụ ọkpara Shalumu, bụ ẹpa Kora bẹ l'emeje buredi, l'aanụje Chileke. 32 Ọ kwawhọ ụnwunna whẹ, bụ eri Kohatu b'ọ dụ l'ẹka mbụ ome buredi, dụ nsọ, bụ iya bụ buredi mbọku-ọtuta-ume.
33 Ọ waa ndu ọgbo egvu ndọwa. Whẹ bụ ishi l'ibe nna whẹ l'ikfu Lívayi. Ẹka whẹ bu ebubu bụ l'eze-ụlo Chileke. O to nwedu ozhi ọdo, a gụru whẹ ya, o noo nkele whẹ l'anọje l'ozhi eswe lẹ ẹnyashi.
34 Ndu lile ono gẹ whẹ ha bẹ bụkota ndu ishi l'ẹnya-uwhu ikfu Lívayi; o noo g'e deru iya l'ẹkwo e deshiru g'e shi nwụa whẹ. Whẹ bụ ndu ishi, bu lẹ Jerúsalẹmu.
Eri Sọlu
35 Jeyẹlu, bụ nna mkpụkpu Gibyiyọnu bẹ bụ lẹ Gibyiyọnu b'o bu. Ẹwha nyee ya bụ Maaka. 36 Ọkpara nwa iya bụ Abudọnu, onye ọdo bụ Zuru mẹe Kishu mẹe Bálu mẹe Naa mẹe Nedabu, 37 mẹe Gedọ mẹe Ahiyo mẹe Zakaráya mẹe Mikulotu. 38 Mikulotu bụ nna Shimeyamu. Whẹbedua bẹ bukubekwawho ụnwunna whẹ lẹ Jerúsalẹmu.
39 Naa bụ nna Kishu, Kishu bụru nna Sọlu, Sọlu bụru nna Jonatanu mẹe Malukishuwa mẹe Abyinadabu mẹe Eshi-bálu. 40 Nwa Jonatanu nwụtaru bụ Meribu-bálu, Meribu-bálu bụru nna nke Mayịka.
41 Ụnwu nke Mayịka bụ Pitonu, Melẹku, Tahureya ọwaa Éhazu. 42 Éhazu bụ nna Jara, Jara bụru nna Alemetu mẹe Azụmavetu mẹe Zimiri. Zimiri bụ nna Moza. 43 Moza bụru nna Byineya, Byineya bụru nna Refaya, Refaya bụru nna Eleyasa, Eleyasa bụru nna Ázelu.
44 Ázelu bẹ nwụtaru unwoke ishii. Ẹwha whẹ bụ Azurikamu, Bokeru, Ishimẹlu, Sheyariya, Obedaya ọwaa Hananu. Ndu ono bụkota ụnwu Ázelu.