Ọ tọ bụkwa lẹ ndu Ízurẹlu dụnuka Chịriri
9
Unu ngabẹ nchị unubẹ Ízurẹlu. Ntanụ bẹ unu l'eme t'unu je adaa ẹnyimu Jọ́danu je anata mba gẹ mba ha ono, kagee unu shii, kagee unu ọkpehu yẹle oke mkpụkpu lẹ mkpụkpu ono, a tụ-wheru mgbodo mgburumgburu o je asụ-kfuru l'igweli. 2 Ndu unu l'ejekfu bụ ndu parụ ẹka mẹe ndu bụ-gee kpashoroko, mbụ ndu Anaku, bụ ndu unu marụ, tẹmenu unu l'anụjehawa ẹtu ono, l'aanmajẹ sụ: “?Ọo onye sụru gẹ l'ọo-kpọ ụnwu Anaku iwhu?” 3 Ọle iwhe unu l'a-marụ ntanụ bụ l'ọo Onye-Nwe-Ọha, bụ Chileke unu bẹ bụ onye l'e-vutaru unu ụzo je eke whẹ whuruwhuru g'ọo ọku, l'enwu enwu. Ọo-lwụ-gbu whẹ l'iwhu unu nke ọwhu unu l'a-chịfu whẹ, mee tẹ whẹ bụru kpurupyata ẹgwegwa, ẹgube ono Onye-Nwe-Ọha kweru unu ụkwa l'ọo-dụ.4 Nteke Onye-Nwe-Ọha, bụ Chileke unu chịfu-geeru whẹ l'iwhu unu, unu ba arịnuwho l'ime obu unu sụ: “Ọo l'unu dụ chịriri bẹ meru iwhe Onye-Nwe-Ọha dubataru unu t'unu bya eworu alị-a.” Ọchikwa ejo-ememe, mba gẹ mba ha ono l'emegbabe meru iwhe Onye-Nwe-Ọha chịfuru whẹ l'iwhu unu. 5 Ọ tọ bụkwa nke chịriri, unu dụ, ọdua l'ọo nke obu gụru unu iwhoro meru iwhe unu l'eje ọnata alị whẹ ono t'ọ bụru nke unu. Ọ kwa ejo-ememe, mba gẹ mba ha ono l'emegbabe meru g'o gude Onye-Nwe-Ọha, bụ Chileke unu l'achịfu whẹ l'iwhu unu, tẹmenu ọ bụkwaruwho gẹ l'ee-me t'o ree mbụ okfu ono, o kfuru ribuaru iya nna unu oche whẹ, bụ Ébirihamu mẹe Áyiziku mẹe Jékọpu lẹ nte. 6 Oo ya bụ, t'o dokwaa unu ẹnya lẹ Onye-Nwe-Ọha, bụ Chileke unu ta abụkwa l'ọo l'unu dụ chịriri b'o kwoberu anụ unu ẹguru alị-a t'ọ bụru nkunu nkele a bya l'ẹka unubẹdua nọ bẹ unu bụ ndu kpọkponyi.
Nweswi, a kpụru lẹ mkpọla-ododo
7 Unu nyatakwa iwhe-e ya, unu ba anyazọkwa g'unu gude kpatsua Onye-Nwe-Ọha, bụ Chileke unu oke ẹhu-eghughu l'echi-ẹgu. Eshi mbọku, unu fụtaru l'alị Íjiputu jeye nteke unu rwuru ẹka-a bẹ unu shi kwefutaru Onye-Nwe-Ọha ike. 8 L'ugvu Horẹbu bẹ unu kpatsukwaruwho Onye-Nwe-Ọha oke ẹhu-eghughu, ẹhu ghutabe Onye-Nwe-Ọha eghu nke ọwhu ọ jịkoberu tẹ ya mebyishia unu. 9 Nteke mu nyihuru ugvu ono tẹ mu je anata okpekpu ẹwhuru, mbụ ẹwhuru ono, e deru ọgbandzu ono, unu lẹ Onye-Nwe-Ọha gbarụ, bẹ mu nọru ụkporo abalị ugbo labọ l'eli ugvu ono eswe l'ẹnyashi, mu te eri nri, mu ta angụ mini. 10 Onye-Nwe-Ọha nụ mu okpekpu ẹwhuru labọ ono, bụ Chileke l'onwiya gude ẹka iya dee ya iwhe. Iwhe o deru l'ẹwhuru labọ ono bụkotaru iwhe ono, Onye-Nwe-Ọha kfuru yeru unu l'eli ugvu, mbụ okfu ono, o shi lẹ nhamụnha echilabọ ọku kfuru yeru unu mbọku ono, unu dzukoberu l'ẹka ono.
11 Ụkporo abalị labọ, eswe l'ẹnyashi ono gvụlewho, Onye-Nwe-Ọha woru okpekpu ẹwhuru labọ ono nụ mu, mbụ ẹwhuru ono, e deru ọgbandzu ono. 12 Nteke ono Onye-Nwe-Ọha sụ mu: “Gbalihu, shi l'ẹka-a nyize ẹgwegwa, lẹ ndibe ghu ono, i dufutaru l'alị Íjiputu bẹ rwụakwaru alị kpaa ntụ l'ẹnya. Whẹ mekebekwaru ẹgwegwa gbakụta azụ l'ụzo ono, mu sụru whẹ tẹ whẹ shije, bya akpụtawaru onwowhe ntẹkpe.”
13 Onye-Nwe-Ọha byakwawhọ bya asụ mu: “Mu whụwaru ndu-a marụ lẹ whẹ bụnuka kpọkponyi! 14 Parụ mu haa tẹ mu laa whẹ l'iyi; huchafu ẹwha whẹ lẹ mkpula igweli. Mu emee ghu g'ị bụru mba, ka whẹ ọkpehu, ka whẹ l'igwe.”
15 Ọo ya bụ, mu dakọbe shi l'eli ugvu ono, ọku l'enwu whowhowho ono nyizeta. Mu parụ okpekpu ẹwhuru labọ ono, e deru ọgbandzu ono l'ẹka labọ. 16 Mu lee ẹnya whụ l'unu meswewaru Onye-Nwe-Ọha, bụ Chileke unu, mbụ l'unu kpụtawaru onwunu ntẹkpe, e meru ọ dụ g'ọo nweswi, bya emekebe ẹgwegwa gbẹeru ụzo ono, Onye-Nwe-Ọha sụru unu t'unu shije ono azụ. 17 Tọ dụ iya bụ, mu palia ẹwhuru labọ ono, mu pa l'ẹka labọ byia l'alị gbaa, tụjashia ya l'atatiwhu unu.
18 Mu daa kpube iwhu l'alị l'iwhu Onye-Nwe-Ọha ẹgube mu dahawaru, mu nọo ụkporo abalị ugbo labọ eswe l'ẹnyashi, mu te eri nri, mu ta angụ mini, ọ bụru iwhe-dụ-ẹji, unu meru bẹ kparụ iya nụ, mbụ ejo-iwhe ono, unu megbaberu l'iwhu Onye-Nwe-Ọha, shi nno kpatsua ya ẹhu-eghughu. 19 Iwe l'ọnuma dụ Onye-Nwe-Ọha bẹ meru egvu tsụlahaa mu nkele ẹhu ghutaberu iya eghu nke ọwhu ọ jịkoberu tẹ ya mebyishia unu. Ọle nteke ono bẹ Onye-Nwe-Ọha ngabẹru mu nchị l'ekfukfu, mu kfuru nụ iya. 20 Onye-Nwe-Ọha bẹ ẹhu ghuru eghu l'ẹka Érọnu nọ ghutabe iya nke ọwhu ọ jịkoberu tẹ ya mebyia ya. Mu kfukwaruwho nụ iya l'iswi ẹhu Érọnu nteke ono. 21 Mu bya eworu iwhe ono, unu gude mee iwhe-dụ-ẹji ono bụ iya bụ nweswi ono, unu kpụru kpọo ọku, bya avụa ya ryaaryaa, gwee ya ọ dụ g'ọo ntụ. Mu kpota ntụ iya ono wụru ye lẹ ngele, shi l'ugvu ono asọfuta.
22 Unu kpatsukwaruwho Onye-Nwe-Ọha ẹhu-eghughu lẹ Tabera mẹe lẹ Masa mẹkwawho lẹ Kiburotu Hatava.
23 O be gẹ Onye-Nwe-Ọha zhiru unu t'unu shi lẹ Kádẹshi Baneya jeshia je anata alị ono, ọ nụru unu, unu kwefu ike jịka ome iwhe Onye-Nwe-Ọha, bụ Chileke unu sụru t'unu mee. Unu jịka okweta nke iya, jịka ọngabe nchị l'olu iya. 24 Nkeshi mu marụ unu bẹ unu shi kwefutaru Onye-Nwe-Ọha ike.
25 Mu darụ kpube iwhu l'alị l'iwhu Onye-Nwe-Ọha ụkporo abalị ugbo labọ eswe l'ẹnyashi nkele Onye-Nwe-Ọha sụru lẹ ya l'e-mebyishi unu. 26 Mu kfuru nụ Onye-Nwe-Ọha sụ: “Gụbe Nnajị-Ọha, bụ Onye-Nwe-Ọha, byiko be emebyishinu ndu nkeghu, mbụ oke-iwhe ghu ono, i gude eze ike ghu gbafụta, bya egude ọkpehu ghu dufuta whẹ l'alị Íjiputu. 27 Nyatanụ ndu ozhi ghu, bụ Ébirihamu mẹe Áyiziku mẹe Jékọpu. Be eleshinu ẹnya gẹ ndu-a bụ-be kpọkponyi mẹe gẹ whẹ l'emebe ejo-ememe mẹe iwhe-dụ-ẹji. 28 Ọdua bẹ ndu ono, i dufutaru anyi l'alị whẹ l'a-sụkwa l'ọo ike bẹ Onye-Nwe-Ọha l'adụhedua durwua anyi alị ono, o kweru anyi ụkwa iya ono, ọdo bụ l'ọo ashị b'ọ kpọru anyi, l'ọo ya meru iwhe o dutaru anyi bya egbushia l'echi-ẹgu. 29 Ọle anyi bụ ndu nkeghu, bụru oke-iwhe ghu, i gude eze ike ghu mẹe ọkpehu ghu dufuta.”