539 poa Jesucrito tod̶i naẽna Persiad̶ebema boro Ciroba babiloniarãda poyasia. Maʌ̃ne Ciroba judiorãra Babilonia druad̶e b̶eada Jerusaleʌ̃ purud̶aa idu jẽda wãbisia. Maʌ̃ bẽrã Esdrada Jerusaleʌ̃naa wãped̶a Ãcõrẽ de dromada waya obisia. 445 poa Jesu tod̶i naẽna Nehemiada Jerusaleʌ̃naa wãped̶a dji aud̶u jũrã ca b̶ad̶ada waya obisia.

332 poa Jesucrito tod̶i naẽna griego Alejandro dji Droma abadaba Persia druara poyasia. Maʌ̃ bẽrã judiorã drua sid̶a idji jʌwaed̶a b̶esia. Maʌ̃ Alejandroba jũma idji jʌwaed̶a b̶eaa griego bed̶eara, griegorã crĩcha sid̶a ẽpẽbisia. Idjiare b̶earã bid̶a mãwã obibadjid̶aa baribʌrʌ judiorãba Ãcõrẽra wad̶ibid̶a ẽpẽbadjid̶aa. Israel drua ãĩ b̶eaba ãdji dji jʌrebada deda puruza ocuasid̶aa Ãcõrẽ de droma tʌmʌ panana bẽrã. Dji jʌrebada ded̶e Ãcõrẽ Bed̶eara jaradiabadjid̶aa idjab̶a warrarãa hebreo bed̶eara jaradiabadjid̶aa. Baribʌrʌ zocãrã judiorãba griego bed̶ea ẽpẽ panena bẽrã judiorã Egipto druad̶e b̶earãba Ãcõrẽ Bed̶eara griego bed̶ead̶e b̶ʌsid̶aa.

175 poa Jesucrito tod̶i naẽna griego Antioco Epipane abadada Siria druad̶ebema boroda b̶esia. Judiorã drua sid̶a idji jʌwaed̶a b̶ʌ bẽrã griegorã crĩchada õgo ẽpẽbisia. Maʌ̃ne zocãrãda idji ume quĩrũnaped̶a jarasid̶aa idjira igarad̶ida. Maʌ̃ carea idjia judiorãra zocãrã quenabisia. Waabemarãa Ãcõrẽ leyra õgo igarabisia. Ãdji warra zaquerã sid̶a idu cacua wẽãgobiẽ́ basía.

170 poa Jesucrito tod̶i naẽna maʌ̃ Antiocoba Ãcõrẽ de dromane oiẽ́ b̶ʌda od̶a bẽrã Ãcõrẽ quĩrãpita biẽ́ b̶ʌsia. Maʌ̃ carea judio Matatíada, idji warra Juda sid̶a bed̶ea ausid̶aa Antioco jʌwaed̶abemada ẽdrʌd̶i carea. Maʌ̃ Matatíaba griegorã animarã babue diabadada ãrĩsia idjab̶a Antiocoba diabued̶ada ab̶a beasia. Idji warrarãra, judiorã ãdjiare b̶ea sid̶a griegorã Siria druad̶ebemarã ume 24 poa djõnaped̶a ãdji jʌwaed̶abemada ẽdrʌsid̶aa.

Mãwãnacarea judiorã sacerdote dji dromada ãdji bororã basía. Baribʌrʌ ãdjia wayacusa griegorã crĩcha ẽpẽbʌda carea ʌ̃cʌrʌ judiorãda awara wãsid̶aa. Maʌ̃ judiorãra pariseorã abadjid̶aa. Pariseo bed̶eaba jara b̶ʌa “awara wãped̶ad̶arã.” Pariseorãba Moise leyra bio quĩrãcuita ĩjã obadjid̶aa cawabid̶i carea ãdjidrʌ judiorã arada. 63 poa Jesucrito tod̶i naẽna judiorãda umé sacerdote dji dromada b̶ei carea djõ panasid̶aa. Maʌ̃ carea romanorãda zed̶aped̶a poyasid̶aa. Judiorã wad̶ibid̶a djõ panʌne romanorãba Herode dji Droma abadada b̶ʌsid̶aa judiorã boroda b̶amãrẽã. Jesucrito tosid̶e maʌ̃ Herodera wad̶ibid̶a dji boro basía.