Kristo didiu dekperagigec
4
Anutungo wosoefahaac amma ua areng ohoaimoc,
imoc nemmeec.
Imocac amma kucmama mi angandimbe.
2 aNeni faka sufu sufu gameagoc sasawa bic wadacma dekerec naric mi angemmenide.
Amma Anutuac yoac mereng kpereng amma naric mi edengununide,
kpac.
Yoac fora didiu fingectegerudeac neni Anutuac kicfu yoara deni ngicngac sasawa here negen negengnginau naric ireckegecde.
3 Nga siduc gombung deandimbe,
imoc goa yenearu sufu sufu anude isoc.
Ngicngac imoc yeni hofeac sinnu kemegecde,
yenearu ifia fingerude.
4 bKristo ye Anutuac onga nga yeac siric.
Anu bangec yomocac nemu Satang,
ye ngicngac mekundungkpeyunuu negen negensingngina kpac kecdae nga yeni Kristoac siduc gombungngo ngicngac mekperagiyemmeande,
imoc mi henggecdeac kicpisic anggec.
5 Kebu Yesu Kristo dekperaginide nga neni nenang mi dekperagiemeandimbe,
kpac.
Yesuac amma ngeneac kingangkpekpe amma kecdimbe.
6 cAnutungo yofi deec,
“Kundununac kperagi fingecna.”
(Fing 1:3)
Anutu yennoc ubaherenina mekperagikecde.
Amma Kristo ye Anutuac kuc nga kibikperagia negentegecde, negen negentegec imocngo yeac kicmesuyaunac hama ubaherenina mekperagiude.
Kuctoa engena enannu
7 dNenang enang isoc kecdimbe.
Anutuac kibikperagia imocac kuha engena nga imoc dzofinac isoc ubahereninau faifaia fede.
Dzofinactoa imoc yearunac haande nga ngicngac yeni imoc negentegecgecdeac yeng imoc ubahereninaac enannu faiec.
8 eAnu ebic hania haniango noboc noboc igocnunuande,
imocngo ine mi dzegenunuude.
Nga faka nga uaninaac gagabuma mi ukuni kpeande.
9 Ngic yeneng kporacnunumagec Kebungo naric mi wanunuude.
Yeni nunugec manunuu sifu mi kpac angandimbe.
10 fYesuac kekec sebininau fingectegerudeac amma neni Yesuac homec sebininau tofohoma mekecdimbe.
11 gYesuac kekecngo bangecsebininau fingectegerudeac ngicngac yeni nasosoc Yesuac amma sebinina homecac arennu faigecde.
12 Nga homec ye nenearu ua ifi mekecmanu kekecngo ngenearu ifingoc uaya mekefude.
13 Yoac mong yofi oho ohoya fede,
“Ni negen negensinggoc kefaiac ebicnasou ifingoc negensinggumangoc kefai,
imocac amma deduae.”
Anu neni ifingoc negen negensinggac Asugoc kecma negensinggema yoac dekecdimbe.
14 hAnutungo Kebu Yesu homecfunac megboriec,
yennoc Yesugoc homecfunac megborinunuma neni nga ngeni nenahafoc menunuma yengena hoannu fainunuu nannide,
imoc negendimbe.
15 Wiac sasawa imoc ngeneac amma fingerude.
Nocac Anutuac danggunucngo torokpeu torokpe ngicngac yenearu hakefu ngicngac homac yeneng ubangerec ebirangoc negemma Anutu dengeregecde.
Homemaguc kekecfu sikebesonga
16 iSebininango kucmama meficgema kpac ambeso anu Anutungo sifu ubaherenina wenacsoc heigborinemmekecde,
imocac nenang ubanina mi maude.
17 jAnu ebic nga kpendzeng kpeandimbe,
imoc naso wegenanecsac feude,
imocngo wiac kuneng mi ande.
Imocngo ine sinnina meu kekecseriac kuc nga kibikperagia engenatoa menide.
18 kWiac kicngo hengandimbe,
imoc nasoya hau kpac anude.
Nga wiac kicngo mi hehena,
imocngo fefeseri febesande.
Imocac wiac kicngo mi hehena,
imohaigeng kicnina fima kecdimbe nga wiac kicngo hengandimbe imoc wanide.