Kpetiac areng yeneac memefic
16
aKpetiac areng Yerusalennu kecdae,
yeneac amma hiedzo yofinenggac kpedzucnekecdimbe,
imocac yoac yofi deba,
ni Garata kpebung edekpou ayemmeai,
ngeni imocngoc ambisia.
2 Ngeni sondasoc tembuc tembuc dzongina ereandesoc,
imohacnac tosea hendzicma amanginau faigec tacbeso.
Ifi anggec ni habade,
naso imohai kpekpedzucac uatoa mi menide.
3 Ngeni ifingoc ngic goa meisingyunugec nga neng hama Yerusalennu ubangerecac hiedzo nga ngic kibinginagoc naric sueyunubade.
4 Nga negemba naric kekenggac siric anu ni ifingoc yenigoc nenahafoc kennide.
Kebungo negemmanu habade
5 bNi Makedonia kemmaguc ngenearu sing habade.
Nocac ni Makedonia provins ferecgemaguc habade.
6 cHama ngenigoc tacba wisickeu noboc me noboc kembade.
Uaac titinga fingeru ngenigoc naso herea isoc kecbade.
Naric anude isoc nomang naso hafoangoc kecbade.
7 Ni yofinenggac ngenearusing eng ferecgema kembadeac mi anende.
Kebungo negemmanu hama naso herea isoc ngenigoc kecbadeac ine negensiduae.
8 Amma Efeso bangecfu kecbare Pentekos naso wisickeu monggoc wama kembade.d
9 eYomohai ua kuneng yombong mebadeac sing sarima fede.
Nga ngabafocna homac yomohai ifingoc kecdae.
Wenacngerec
10 fTimoteongo ngenearu haudeu ye negengyohoha kpac botucnginau kefudeac areng faibisia.
Ye ni isoc Kebuac ua mema kecde.
11 gNgenearunac mongngo ye mi ngadehebeso.
Ye monggoc nearu dzigeneudeac deu ngeni singa meefaima ruaegoc suegec habeso.
Ni nga negen negensinggoc tosofocnina neni yeac tomai kecnide.
12 hNi Aporo homac igockema yofi negenai.
Yeng kpebunggac areng goa yenigoc ngenearu habeso.
Amma ye bic haudeac mi ammiec.
Ngade kecma titinga mong fingeru naric haude.
Yeac ifi deduae.
Demeseriyoac
13 Ngeni garengemema efaima kecma negensinggema serima nambisia.
Ngeni ngicsiric amma seserigoc kecbisia.
14 Amma ngeni hoangemema heresongogoc wiac sasawa ambisia.
15-16 iStefana nga arengfora yeneng Akaia bangecfu hanahema uaac buma heima ubamereng anggec.
Yeni ubamereng amma hanahema kpebung kpetiac meficngunugec,
ngeni ngicngac imoc negengyunudae.
Tosofocna,
igocngunuma yofi deduae,
ngeni ngicngac ifia nga goa yenigoc kecma uatoa mema kecandae,
yeneac yoacngina modacbisia.
17 Stefana nga Fortunato amma Akaiko,
yeni ngeneac tatac mema nearu hagecac amma ubangerec negenduae.
18 Amma yeni neac ongaasu nga ngeneac ongaasu momoc midigec ngereeing,
imocac ngeni ngic ifia eweheiyemmebisia.
19 jAsia provins manau kpebung fekendae,
yeneng wenacngerecngina faigec ngenearu hade.
Nga Akpira amma Prisika,
yereac amau kpebung kpedzucneandae,
yeni Kebuac kpacfu wenacngerecngina suegec ngenearu hade.
20 Amma negen negensinggoc tosofocnina sasawango wenacngerecngina suegec ngenearu hade.
Ngeni titikokoc kpetiac angemema wenacngerec angemebisia.
21 Ni Paurongo wenacngerecyoac yomoc neanna marinango ohongemmeduae.
22 kMong ye Kebu heresongogoc mi hoanggeudeu sowecngo yeac witiu febeso.
O Kebu,
ge hana.