Ngicfocna segereyunuba
11
aImocac amma yofi negemma kpesiduae,
Anutungo ngicngacfora bic wayunuec me?
Imoc kpac!
Neannaoc Israengic Benyaminggac arennunac nga kisicna Abrahang.
2 Anutungo ngicngacfora bic meisingyunuma mi wayunuec,
kpac.
Nga Eria ye hereebiha Anutuac kicfu dekperagima israengicngac yeneac yofi dema numuec,
imoc mitikibiu oho ohoya fede,
3 b“Kebu,
yeni geac profetefocga yunuhomegec nga geac arataga kpembarackegec.
Nga ni mocgungosac kecbare kekecna meickegecdeac negendae.”
4 Ye ifi numuu Anutungo ine turunga yofi meremmiec,
“Ni ngicfocna 7 tauseng bic segereyunuba kecdae.
Nga yeni nemu Baari yearu fafoc mong mi heimigec.”
Ngeni imoc negembisia. (1Ngt 19:10, 14, 18)
5 Ifi isocngoc Anutungo yofinenggac yenearunac tosea meisingyunuma wosoefaha ayemmeu yengena habubisic mong amma kecdae.
6 cYeng meisingyunuma danggunuha yemmeec,
imoc yenang angammemengina gombungaac amma mi meisingyunuec,
kpac.
Ye angammemengina gombungaac amma meisingyunubac dede wosoefaha imoc wosoefac fora mi ambac.
7 Imocac amma yofi fede,
Israe yeni wiac megecdeac uatoa mekecma imocac fora mong mi meficgegecde.
Nga Anutungo ngicngac yeneac botucfunac meisingyunuec,
yeneng ine wiac imoc meficgegecde.
Anu Israe noboha yeni ubaseri nga ubafong amma kecdae.
8 Imoc yeneac yoac mong yofi oho ohoya fede,
“Anutungo faka meu yeni ongaasungina dzingfong anec.
Amma kicnginango wiac mong mi hemma kedzacnginango wiac mong mi negenggec.
Yeni ifia keceregecngo yaguc kecdaengoc.” (Dser 29:4; Yes 29:10)
9 Imocac Dawidingo yofi deec,
“Yakaneneac fakangina angandae,
imocngo subabanggeng nga ufic isoc meyunuu kopocsicnginaac turunga ambeso.
10 Wiac mong mi henggecdeac yeni kicngina kundung kpebeso.
Ge nasoya kpac ngadehokuc meyununa kecbisia.” (Myeg 69:22-23)
11 dNi yofi torokpema kpesiba,
Israe yeni mayunuudeac kpondzong heigec me,
imoc kpac.
Yeni Anutuac yoac ferahegecac amma Anutungo bangec monnunac ngicngac,
yeni kopocsicac ebicfunac mesiyunuu komoc kpegecde.
Israe yeneng yenemma keracmangang anggecdeac ifi anec.
12 Nga Israe yeni Anutuac yoac ferahegec,
faka imocngo Anutuac wosoefactoa heficgeu bangeha bangeha yenearu kendarec.
Amma Israe yeni Anutuac sinnu makpegec,
imocngo bangec monnunac ngicngac wiac gombunga homac yombong meficgeyemmeec.
Kecma Israe ngicngac sasawango negensinggegecde,
naso imohai wiac engena yombong fingerude.
Bangec monnunac ngicngac
13-14 Anu bangec monnunac ngicngac kecdae,
ngeneac yofi deduae,
neanna arengfocna yeneng ngeneac keracmangang anggecde.
Amma yeni sing imohai ngeni isoc kopocsicac dzuac dzuac mema komoc kpegecde.
Ifi fingerudeac negemma neng ngeneac aposoro anai.
Amma ua mekecduae,
imocac negemba engena yombong ande.
15 Anutungo Israe ngadehema waec,
imocac bangec monnunac ngicngac ngeni Anutugoc uba mocgu amma ruae meficgegec.
Ifi fedeu Anutungo monggoc Israe hoangyunuude,
imocngo heficgeu homemea yeneng gborima kekec meficgegecde.
Oliwa ic
16 Ngeni yaka buma heima waraima Anutu migecdeu yaka sasawa imoc kpetiac anude.e
Amma ic godea kpetiac andeu fawa sasawa ifingoc kpetiac anude.
17 fAnutungo oliwa fora imocac fawa goa metackema meickema,
imocac tatahau,
ge kate oliwafawa yombong,
kapia mong kperecgeguma oliwa forau torokpeguec.
Nga geng fawa fora yenigoc kecnec isoc yofi anude,
ge ic godeagoc torokpema kecma kerecga ihacnac taima kecnade.
18 Ifi andeac,
ge sebiengeng amma fawa noboha yeneac yofi mi negembesena,
“Neng feracyunuduae.”
Ge ine sebiengeng annadeu yofi negembesena,
ge ic fawasac,
geng ic godea mi nanggenec nga ic godeango ine ge nanggeguma kecde.
19 Ifi deba geng yofi denade gedang,
“Yeni ninoc icfu torokpenugecdeac fawa goa metackegec.”
20 Denec isoc,
yeni mi negensinggegecac amma metacyunuec.
Nga geng negensinggenecac amma seria nangkecnecngoc.
Imocac negen negenggau sebiengenga kpac amma kengecgoc kecbesena.
21 Anutungo yengena fawa mi onggongyunuecfu ge ifingoc naric mi onggongguude.
22 gGe Anutuac faka yumea nga demetinga seria fede,
momoc hentegecbesena.
Ye ngic mayunuec,
yeni demetinga seria ayemmeec nga ge ine faka yumeau anggenec.
Ge yeac faka yumeaac bageau mi kecnadeu ge ifingoc herecgeguude.
23 Nga fawa tosea negen negensingngina kpac,
yeneng meremma negen negensinggoc anggecdeu ye icfu monggoc torokpeyunuude.
Nga Anutungo icfu torokpeyunuudeac naric mi obohoude.
24 Ge kateac oliwaac fawa kapia,
imoc herecgeguma oliwa ic fora mong geac areng mi ande,
imocgoc torokpeguudeac mi ebiriudeu,
oliwa ic fora yengena fawa monggoc toro torokpe ua imocngo wiac efea yombong anude.h
Komoc kpegecde
25 Tosofocna,
ngeni ngenanggac negenggec engena ambacac amma yoac mong yomoc sufu sufuya fede,
imoc negenggecdeac negenduae.
Imoc yofi,
Israe noboha yeneac uba negen negengngina imoc fonggoma femanungoc bangec monnunac ngicngac,
ngeni erema hakecma kpetenginaac sirihau hafoangoc ambeso.
Kpetengina hafoangoc anuguc Israe areng tosea ifingoc erema torokpegecde.
26 iIfi anu Kebungo Israe hafoangoc kopocsicac ebicfunac mesiyunuu komoc kpegecde.
Imocac yoac yofi oho ohoya fede,
“Memengerec ngic ye Sionnunac hau Anutu ngadeheandae,
yeneac faka mangana imoc sasawa Yakoboac arennunac meickeude.”
27 “Nga kopocsicngina meickebade,
imocngo naso imohai dzadzahacngina febesande.” (Yes 27:9; Yer 31:33-34)
28 Siduc gombung hau Israe yeni imoc ngadehema Anutugoc ngaba angkecma ngeneac sing meefaigec.
Anutungo ine Abrahanggac bangecfora meisingyunuma kisicfocnginaac amma hoangyunukecde.
29 Anutungo ngicngac kpacyunuu wosoefacfu kuc yemmema negen negenga ngade meremma monggoc wangecyunubac,
faka imoc mi femide,
kpac.
30 Amma bangec monnunac ngicngac,
ngeni warac Anutuac yoac kpekpe kecgec nga yofinenggac Israe yeneng yeac yoac kpekpe kecgecac amma Anutuac wosoefac ngenearu fingerude.
31 Yeni hanahema Anutuac yoac kpegecac ngeni Anutuac wosoefac megec.
Nga Anutungo yofi faiec,
ngeni wosoefac imoc megecguc yeni imoc ifingoc megecde.
32 Anutungo ngade ngicngac sasawa wosoefac ayemmeude.
Ye imocac hanahema ngicngac yoackpekpenginaac amma witicfu faiyunudarec.
Anutuac kpac dengerebesonga
33 jO,
Anutuac semeng dzohongagoc fede nga negen negenga imoc kuneng nga kpeukeme kemea.
Anu yeac desi desiac hania nga fakaya amma angammemea,
imoc negen negennina feraheude.
34 kImoc yofiac,
yeac negen negennu wiac fede,
imoc ngic mongngo naric mi negenude.
Nga mongngo ye negen negeng naric mi meficgemiude. (Yes 40:13)
35 Amma ngic mongngo hanahema Anutu wiac mong miecfu ye imocac turunga kpoumiude,
imoc kpac yombong. (Yop 41:11)
36 lAnutu ye yengenaoc wiac sasawa meficgedarec.
Imoc yengena kucfu fedacde amma yengena songo fingerudeac faifaia.
Yearu dedengerec nga dedengerec fekengkecbeso,
imoc fora.