Yesu kpegecdeac denegeng anggec
26
Yesungo yoac imoc sasawa dedaru wisickeu medacfora yofi edeyunuec,
2 a“Uameme yohockang femanu makekeng naso imocac hombang ammanu imohaingoc ngic yeneng Ngicac Medac mariponnu kpegecdeac demeseri amma suegecde.”
3 Anu womonggareng enara nga yudangic yeneac enarafocngina,
yeneng womonggarengtoa kpara Kaifa,
yeac amaodayagocfu endacma
4 Yesu akikic mema kpegecdeac dekiric amma
5 yofi degec,
“Ngicngac botucnginau dzikac sicsauc fingecbacac ye hombang nasou mi mebesonga.”
Yesu kerecdokungo nadzicmiec
6 Anu Yesungo Betania amau Simong kukuseriagoc,
yeac amau yaka netarec.
7 bNetacmanu ngac mongngo yearu kemma,
kirung mong arabastro hocngo memea,
imocac kerecdokuya homung kerengagocngo yeac orucfu kpakema nadzicmiec.
8 Nadzicmiu medac yeneng imoc hemma kerecdoku buma yada anecac dehesi ammigec,
“Ye nocac wiac buma engena imoc kpedzonggede?
9 Imocngo dzo homac kirecgeu ngic makpekpea yemmeni ngereebac.”
10 Ifi degec Yesungo imoc negemma yofi edeyunuec,
“Ngeni nocac ngacac ifi dema ubaebic meficgemidae.
Ye faka gombunga nearu meu ngereede.
11 cNgic makpekpea yeni nasosoc ngenigoc kecgecde nga neng ine ngenigoc nasosoc mi kecbade.
12 Ni homeba tonggonugecde,
ye imocac sebina mengerema bic nadzicnende.
13 Foracngoc,
ngic yeni siduc gombung yomoc bangeha bangeha kemma dekperagigecde,
imohai yeng ifi anec,
imoc ifingoc degec negenggec febesande.”
Yesu kerereec
14 Anu medacfora 12 yenearunac mong Yuda Karioto amaunac degec,
yeng womonggareng enara yenearu kemma
15 dkpesiyemmeec,
“Neng Yesu maringinau faibadeu dzo dafiguc nenggecdeac negendae?”
Kpesiyemmeu yeneng silwadzo 30 osoma migec.
16 Migec,
yeng Yesu naso damohai doc meu megecdeac hemmodacma kefec.
Makekenggac yaka
17 fKecma ic sogong yis kpac,
hombang imocac hanac hanaheau medac yeni Yesuaru kemma kpesimigec,
“Neni ama dahai kemma makekenggac ramamedaha mengerema ohonenideac negennec?”
(Mke 12;
Dser 16:1-8)e
18 Ifi degec Yesungo yofi deec,
“Ngeni taonnu emma ngic imoc hemma yofi edebisia,
‘Kpoukpouninango geac yofi dede,
nasona wegeneu gearu hama ni nga medacfocna neni gegoc makekenggac ramamedaha nenideac negenduae.’ ”
19 Nga Yesungo medacfora yoac edeyunuec,
imoc tofohodacma makekenggac ramamedaha ohomengere anggec.
20 Ama toforeu Yesungo medacfora 12 yenigoc yaka netacma
21 yofi edeyunuec,
“Foracngoc,
ngenearunac mongngo ngaba yeneac mariu fainuude.”
22 Ifi deu medac yeni ubangina homac manganeu yenearunac mocgu mocgungo kpesimigec,
“Kebu imoc sifu neng mi anduae,
me?”
23 gKpesimigec yeng yofi deec,
“Ngic nigoc kurungterau ic sogong nemuruckedic,
yennoc doc faiu menugecde.
24 Ngic ye Ngicac Medac doc meude,
ye sowehagoc.
Ye nonggeaac here manaunac mi fingecbac dede efaimibac.
Nga Ngicac Medac neac negemma mitikibiu yoac yofi oho ohoya fede,
yeng wangunuma kenudenoc.”
25 Ifi deu Yudango Yesu docfu faiudeac negenecmoc,
yeng ifingoc kpesimiec,
“Kpoukpou,
ge neac denec me?”
Deu Yesungo yofi edeec,
“Ge geanggaoc imocnoc denec.”
Tofocnac maung
26 Anu yeni yaka nemagec Yesungo ic sogong mong mema Anutuac ubangerec dema mendzicma medacfora yofi dema yemmeec,
“Ngeni mema negec,
yomoc fusina.”
27-28 hIfi dema kpakenec mong mema Anutuac ubangerec ammima numumima yofi dema yemmeec,
“Yomocngo dzadzahac gboriaac sacna,
imoc ngicngac homac yeneac kopocsic wayemmeudeac kpetic kpetinggea,
imocac ngeni sasawango imoc negec.
29 Ni edengunuba negenggec,
waing gbomeaac dokuya monggoc mi nene kecbarengoc Mannaac eucererennu nenahafoc sing gboriaac arennu nebesandimbe.”
30 iNga yeni ubangerec yegec heima amaunac mama edibigeng Oliwatikiu enggec.
Ebicyoac edeec
31 jSinnu kemma Yesungo yofi edeyunuec,
“Tofocnac yomohai ngeni sasawango neac negemma makpema wanudacgecde.
Faka imocac yofi oho ohoya fede,
‘Ni gareng kpeba ramahabu yeni sinsararang kpebesandae.’ (Dzek 13:7)
32 kNga homecfunac yacmaguc waraingemmema Gariraia bangecfu kemba ngeni ihai habisia.”
33 Ifi deu Petorongo edeec,
“Goa yeni sasawa geac ifi dema wagugecde nga neng ine naric mi wagubade.”
34 lIfi deu yofi edeec,
“Ni forangoc edeguba,
tofocnac yomohai kokorec mi arohomanu geng sebiheinenna atac harebec anude.”
35 Deu deec,
“Ge guma ni nubeso degec sebi naric mi heibade.”
Petorongo ifi deu medacfora meficgema imocngoc dedacgec.
Gedzemane uau
36 Anu Yesungo kengkecma ua bangec mong kpara Gedzemane,
ihai kensikema medacfora yofi edeyunuec,
“Ngeni yei tacmagec ni edi kemma numubade.”
37 Ifi dema Petoro nga Dzebedaio medachora meyunuu kenggec.
Kemma Yesungo ubaebictoa yombong memanu dzonoma fedeu
38 myofi edeyunuec,
“Ubaongana ebiriyombonggeu homebeso anende,
imocac ngeni yei nigoc ubagbori tacmina.”
39 Ifi dema kpesima kemma kicmesuya bangecfu hetutuckema yofi numuec,
“Manna,
negenna angana andeu ge kpakenec yomoc meickena feracnuu.
Amma neac songo kpac,
geac songo nga negen negeng imocngo seribeso.”
40 Ye ifi numuma medac yenearu dzigene kemma yenenu gau fegec.
Gau fegec yenemma Petoro yofi edeec,
“Ngeni sifu aua mocguacsoc nigoc gaugbori kecgec.
41 Ngeni faitobannu embauac ubagbori kecma numugec.
Foracngoc,
ongaasungo efaiande nga sebingo ine ebiriude.”
42 Nga ye monggoc kemma yofi numuec,
“Manggacna,
kpakenec yomocngo feracnuudeac negenna mi ngereeu imoc nebare geac yoac seribeso.”
43 Ifi numuma hama henu medacfora yeni kicngina gaungoc anu fegec.
Femagec yenemma
44 monggoc wayunu kemma numuu atac harebec anu yoac warac deec,
imocngoc dema numuec.
45 Numudacma medac yenearu dzigene hama yofi edeyunuec,
“Ngeni gaungoc fema kecdae,
imoc naric kpac.
Naso wegenede,
ngic yeni Ngicac Medac kererema kopocsicmeme yeneac mariu faigecde.
46 nBenukererec ngicngo hadeac amma yacgec kenni.”
Yesu mendanggegec
47 Ye ifi dema nammanu medac 12 yenearunac ogongina Yuda,
yeng ngichabutoa kuneng yombong enara waraiyemmeu hagec.
Womonggareng enara nga yudangic enarafocngina yeneng sueyunugec wasaibeang nga gbarucnginagoc hasikegec.
48 Sikegec benukererec ngic yeng waraima faka anudeac dederecgeyoac yofi bic edeyunuec,
“Ngic titikokoc ammibade,
ngeni ngic imocnoc mendanggema mebisia.”
49 Ifi dema yeng imohaingoc Yesuaru kemma,
“Ohec,
kpoukpou.”
ifi dema titikokoc ammiec.
50 Ifi ammiu Yesungo yofi edeec,
“Ogo,
ge noc ua menadeac yei hadang?”
Deu yeni hama Yesu maria noboc noboc mema mendanggegec.
51 oAnu ngic Yesugoc kecgec,
yenearunac mongngo wasaibeanga kpedzima womonggarengtoa yeac wanacngic kpema kedzaha noboc herecgeec.
52 pHerecgeu mau Yesungo yofi edeec,
“Ngic mong ye dzikac kpeude turunga dzikacngoc kiude,
imoc fingecgembacac wasaibeangga ameau monggoc faina kemeu.
53 Neac memeficsing mong mi fede,
imoc negemma ifi annec.
Nga Manna yagucnoc numumibai dede yeng angero kpetengina 6 tauseng arenga 12,
angero habutoa ifia naric sueyunuu mama meficnubau.
54 Nga meficnubau dede mitikibiu faka yomoc fingerudeac oho ohoya fede,
imoc fora mi fingecbac.”
55 qIfi dema ngichabu yofi edeyunuec,
“Ngeni mendannuma godzungic meandae,
ifi isoc wasaibeang nga gbarucnginagoc hadae.
Nga ni wenaha wenaha Anutuac womonnu edekpou angemmema kecanduae,
imohai ine naric menubau.
56 Amma yoc ine profete yeni mitikibiu yoac ohogec fede,
imoc fora fingerudeac imoc sasawa fingecdacde.”
Ifi deu medacfora sasawango Yesu wama woradacgec.
Yesu tutumangtoau mekenggec
57 Anu mitiac negen negengngic nga yudangic enarafocngina yeni womonggarengtoa Kaifa yeac amau bic kpedzucnema tacgec,
ihai Yesu wangecma kenggec.
58 Yeni Yesu mendanggema ifi mekemmagec Petorongo ngadenginau hereaungoc Yesu modacma kenec.
Kensikema,
Yesuac yoac desigecde,
imoc negenudeac womonggarengtoaac ama imocac oda manau kemema uamedac yeneac botucfu matarec.
59 Anu womonggareng enara nga yudangic tutumangtoaac memba yeni hafoangoc tacma Yesu homecfu faigecde nga ye enacfu faifai ammima boi anggecdeac negengising anggec.
60 Ifi anggec ngic homacngo hama enacfu faifaiyoac degec,
imocngo Yesu homecfu faigecdeacsoc mi anu hofocmangoc kecma ngic yohockang yereng fingecma boi amma deoc,
61 r“Yesungo yofi deec,
‘Ni Anutuac womong hembarackema uameme harebec ammanu monggoc mebade,
ni kucna imocacsoc fede.’ ”
62 Ifi deec womonggarengtoango yacma Yesu kpesimiec,
“Geac yoac dedae,
imocac noboha mong mi denade me?”
63 sIfi deu Yesungo ine waickema nanec.
Nanu womonggarengtoango edeec,
“Anutu kekec mingina,
yeac kicfu kpesigemba ge deserina,
geng Messia Anutuac medac me kpac,
imoc edenununa.”
64 tIfi deu yeng meremma yofi edeec,
“Imoc gennoc denec.
Nga edengunuba negenggec,
yaguc nga namma enude Ngicac Medacngo Kuctoa Minginaac foiaugeng tarude.
Amma ye kurumenggac hoeng witiau hau ngeni imoc hembesandae.”
65 uIfi deu womonggarengtoango yoac imoc negemmanganema wambaya membarackema yofi deec,
“Ye Anutu bic emmidacac yoacninaac boingicac monggoc mi obohonide.
66 vNgeneng yoac imoc negemma dafi dedae?”
Deu yeneng meremmigec,
“Ye homeudeac arennoc.”
67 wIfi dema yeni Yesu kicmesuya sofohoma mari tuema kpekpefac ammigec nga goa yeneng dzikacngo kpema
68 degec,
“Messia,
merang gudac,
imocac kpefingyoac edenununa.”
Yesu busic kpemiec
69 Ifi amma kecmagec Petorongo oda manau ama sobennu tarec.
Tacmanu wanac naroang mongngo yearu kemma deec,
“Ge gariraiangicnoc Yesugoc kecannec.”
70 Deu ye ngic sasawa tacgec,
yeneac kicfu sebi heima deec,
“Ge yoac denec,
imoc obohoduae.”
71 Ifi dema naguu kemmanu wanac naroang mongngo hemma ngicngac ihai nanggec,
yeni edeyunuec,
“Ngic imoc ye Yesu Nadzaretenac,
yegoc kecandenoc.”
72 Edeyunuu Petorongo Anutuac kicfu serima monggoc busickpema deec,
“Ni ngic imoc mi negenduae.”
73 Ifi dema nammanu ngic yeneng Petoroaru kemma degec,
“Neni ubadzidziga negendimbe,
ge foracngoc yeneac arennunac.”
74 Edegec ye yengenaoc sowecemema sopecemema deec,
“Ni ngic imoc mi negemmiduae.”
Deu imohaingoc kokorecngo arohoec.
75 xNga Yesungo yoac yofi bic edeec,
“Kokorecngo mi arohomanu geng ni mi negennunec dema sebiheina atac harebec anude.”
Petorongo yoac imoc negensima kemema ubahodung kuneng negemma kiac hodung kiarec.