Fora meficgeude
105
O ngicngac, Kebu ubangerec memima yeac kpac kuneng hofocbesonga. Yeng ua sasawa meande, imoc ngiha ngiha dekperagiyemmema edeyunugec yeneng imoc negendacbisia. 2 Ngeni yeac yegec heimibisia. Ngeni dedengerecyegec heimima yeng ua bibiagoc meande, imoc ngicngac edeyunubisia. 3 Yeac kpara kpetiac. Ngeni imocac negenggec wiac engena ambeso. Ngicngac Kebu hofocandae, ngeni sogaibisia. 4 Ngeni Kebu hofocma yeac kuhaac kic fima yeac hoannu kemma kecgecdeac nasosoc angemmebeso. 5 Yeng ua bibiagoc amma kucfaka bibiagoc mekecma desi desiyoac enarango dekefec, ngeni imoc negenggec febeso. 6 O, yeng ngeni meisingngunuec. Ye kingang ngiha Awrahamgac gboricfora nga Yacakowac medacfora meisingngunuec.7 Yennoc Kebu Anutunina nga yeng ngicngac yoacngina isinggema desiude, faka imoc bangecfu sokoma fede. 8 Ye dzadzahac meec, imoc nasosoc negensima dedeseriyoac edengunuec, imoc ngicngac fingecsahengina fekefude, imoc andenga tauseng feenude, imocacsoc negensima kefude. 9 aYe Awrahamgoc dzadzahac imoc mema Isakaac yoac deserimima edema 10 bYacakowaru dedeseriyoac imocnoc meserima Isracelgoc dzadzahac imoc fefeseri feudeac dema 11 yofi deec, “Ni Kenacan bangec ge gemba mingina annade, imocngonoc geac bangec noboha anude.”
12 Ngicngac imoc yeni kpetengina kuneng kpac. Yeni ngicngac efeanecsac amma bangec imohai kemma kuric kecgec. 13 Bangecareng yeneac bangecngina fekende, yeni imohai yerecgema ngictau monggac bangec yerecgema ngictau monggac bangecfu kengkecma ngicngacareng mong yenigoc kecma wayunuma monggaru kengkecgec.
14 cKebungo ngic kpae heiyemmeu mongngo mong ebicfu mi faiyunuec. Ye yeneac amma ngictau yoac ngabasiricfu ayemmema 15 yofi edeyunukefec, “Ni ngic meisinggema kerecdokungo nadzicyemmeai, ngeneng mi kpesereyunubisia nga profetefocna mangana mong mi ayemmebisia.”
16 dYeng bangec imohai boditoa fingerudeac edeec, imohai nenesemengngina sasawa kpetotieu kpac anudeac negemma 17 engic mong bic sueu waraiyemmeec, imoc Yosef. Yeneng ye wanacngic anudeac dema suema dzo megec. 18 fYeni hania ic gigidangau faima ubiau becsac aiengngo memea dzegegec.
19 Yeng ifi kefu yeac kpefing yoac dedea, imoc erema heiu Kebuac yoacngo Yosefac hania tobanggeu seriec. 20 gSeriu Aigita yeneac ngictaungo ngicfora sueyunuu kemma Yosef yungecgec. Ngiha ngiha yeneac ngictaungo Yosef witicfunac yungerec.
21 hNgictaungo ye amea manaac enara faiu yeng iwaiya sasawa garenggeudeac uayoac demiec. 22 Demiu Yosefngo songeaac arennu ngictauac medacfora dederecge ayemmema ngic enarafora negen negentegec edekpou ayemmekefec.
23 iIfi anu Isracel yeneng Aigita bangecfu hagec. Yacakowngo Hamgac bangecfu kuric kefu 24 jKebungo ngicngacfora meficyunuu fingecsahe kuneng nga kucgoc amma ngabafocngina yeneac kuc ferahagec. 25 Ferahegec yeng Aigita ngic yeneac negen negeng merenu yeneng ngicngacfora ubango ukuyunugec. Yeni yenahafoc yoac denegeng amma Kebuac kingang ngicfora faitobannu faiyunugec.
26 kIf anggec Kebungo kingang ngiha Mose suema Aharon ifingoc meisinggeu 27 yereng yeneac botucfu faka kuhagoc meoc. Yeri Hamgac bangecfu kucfaka mi hehena mekefoc.
28 lAnutungo kundung sueu bangec mekundungkpeu yeneng ine yeac yoac kpema wagec. 29 mYe dokungina sasawa heimerenu sac andaru kondungyang kpebucyunuu homedacgec.
30 nSepeng yeneng hama bangecngina sokodacma ngickunengfocngina yeneac fefeamanginaungoc engkecgec. 31 oYeng yoac deu dawec nga dokuac mogocbisic habutoanginagoc hama ama bangecngina sasawa sokodarec.
32 pYeni kia kpeudeac negenggec yeng nomanggbomea yemmeu piratacngo amabangecngina sokoma heidarec. 33 Yeng waing icngina kpedzamema fig ic amma icngina goa bangecnginau kpetackedarec.
34 qYe ipua yoac edeyunuu yeneng hagec. Ipua gboria kucnginagoc hagec, yeneac kpetengina naric mi mebesonga. 35 Yeneng hama bangecfu wiac maria tengging tengging sasawa nedacma bangecnginaac semeng nedacgec kpac anec.
36 rYeng bangecnginau warac medacfocngina sasawa kpebucyunudacma kucnginaac fora warac fingecgec, yeni kpebucyunuu homedacgec.
37 sImoc sasawa fingeru wisickeu ye Isracel habu meyunuu Aigita bangec wama kenggec. Yeni silwa nga gol momoc mema kenggec yeac ngicngac arengfora yenearunac mongngo mi tifainggema makpeec. 38 Aigita ngicngac yeneng Isracel ngicngac yeneac homac kengecyunuecac amma yeneng wayunuma kenggec, imocac ubangerec negenggec.
39 tAnutungo hoeng tiameu imocngo kperacngina amma witinginau feu tofocnac gerec yemmeu imocngo mekperagiyunuec. 40 uYeni kpesimigec yeng neng negecdeac yemmema kurumenggac yaka efea kpac yemmeu negebec anggec. 41 vYe hoc kpendziru doku dundungngo mama bangec dokuya kpac, imohai dzuamagoc mekeng feec.
42 Nocac ye dedeseri kpetiac deserima bic deec. Nga ye kingang ngiha Awraham, yeac ifingoc negenu feu 43 ngicngacfora sogac sogaigoc wangecyunuec. Ye meisingfora hesicyunuu yeni yegec heima arohoma sogaima kenggec. 44 wYeng bangec monnunac ngicngac yeneac bangec wangecyunuma meisingngicngacfora imoc yemmeu ngicngac yeneac semeng uaac mingina amma fora mema nekecgec. 45 Yeneng yeac singyoac mekecma dedeseri yoara seria modacgecdeac ifi anec.
Kebu eriendzong memini, hallelu Yac.