Ngicngac nonggo heremanaunac fingec fingerango ebicngo mewakenunuu bangec witiau naso wegenanec kecnide.

2 Nenang dzaringngo hefiranggema moronggeande nga wenac kpeu onganina fingecmanu hoengngo hedzickeu ioha aockeande isoc.

3 Ge nocac kicga mamea ifia nenearu fiannec?

Amma ge nocac ni yoacfu fainubeso annec?

4 Merang naric wiac wonongagocfunac wiac kongaha meficgeude?

Imoc kpac yombong!

5 Ge ngicngac tembuc tembuc neneac uameme nga afo naso bic menec imocac mongngo imoc naric mi ferahaude.

6 Imocac ge kicga nenearunac meickena neni uangicngo tembuha kecma uaya mesiande,

ifi isoc kecnide.

7 O,

ni negenduae ic heigec sifu sera kpeande amma sera imocngo mi dzanggeande.

8 Ic godea ye bangec manau hoaeande nga tofeango ifingoc homeande.

9 Nga bangecngo dokuyagoc anudeu icngo sera monggoc kpema ic barama isoc anude.

10 Nga ngicngo ine asu wisic wisickea taima homeu kpacanude,

ifi me ifi monggoc mi anude.

11 Doku dzohongngo gbanggeande nga doku sike sikeango dzikeande,

12 ifi isoc ngic yeneng homemaguc monggoc mi gborigecde.

Kecma kurumenga kurumengango kpacambesandae naso imohai ngicngac mongngo mong gaunac mi yacgede.

13 Imocac ge homec amausac sufununa,

amma kecma herebuga kpacanu geanggaoc naso mong mema negensinubesena.

14 Nga kecma ngic mongngo homemaguc monggoc gbori kecfude me?

Imocac kpendzeng nasona nennec nga ni sifu kekecna gboriaac tomai kecbade.

15 Nga kecma marigango menunecac amma gegoc wegenac kecbadeac kpacnuna habade.

16 Haba ge geanggaoc hani titina garenggema kopocsicna monggoc mi negensinade.

17 Ge ngicngo finaha hieu barima enara dzegema nigeckpeande ifi isoc neac kopocsicna wama semebesena.

18 Bangecngo tegeru hocngo tatahaunac fotockeande,

19 nga doku tunggbaungngo hama bangec nga hoc kisangande ifi isoc geng ngicngac yeneac negen negengina ifi memaannec.

20 Geac kucngo ngic naso mocgusac kpena kpacangande,

ge kicmesuya heimeremma faina kengande.

21 Nga kecma nambaracfora dengere yunugecde imoc mi negenude amma memayunuma gamekpekpeu faiyunugecde imoc ifingoc naric mi henude.

22 Nga ye sebikpehengau kpendzeng kpeude amma yengenaacsac ubahodung anude.