Kebungo Bilecam yoac edeec
23
Anu Bilecamngo Balak yofi edeec, “Ge yomohai neac negemma arata sewen mema burumakangiwa sewen nga ramangiwa sewengngoc mehabesena.” 2 Ifi deu Balak ye Bilecamngo edeec, ifi anec. Anu Balak nga Bilecam yeri arata tackenec yai burumakangiwa mocgu mocgu nga ramangiwa mocgu mocgu, yeri sese ifi faidaroc.3 Ifi amma Bilecamngo Balak yofi edeec, “Ge yei sesegerecgagoc nammana ni kpesima kemba Kebungo hau nigoc ewacdede gedang. Meficnuma yoac me noc wiac edzacnuude imoc dekperagigembade.” Ifi dema bangec buma mong kpindzinga kpac imohai enec.
4 Enu Anutungo Bilecam fingecmiu yeng yofi edeec, “Ni arata sewen mema imocac witiau burumakangiwa mocgu mocgu nga ramangiwa mocgu mocgu, sese ifi faidacdua.”
5 Ifi deu Kebungo Bilecam enarau yoac faima yofi edeec, “Ge Balak yearu dzigenema yoac edegudua imoc edebesena.”
Bilecamngo Kebuac yoac deec
6 Ifi deu dzigenema kemma henu Balak ye Mocaw ngictaumedacareng sasawa yenigoc sesegerehaac wegenahaungoc nanggec. 7 Nanggec Bilecam ye Kebungo yoac edeec imoc dekperagima yofi deec,
“Balak ye Aram bangecfunac wangecnuu hadua.
Mocaw ngictau ye wenac ere ereaubigenggac tikiunac
yofi dema heitainu hadua,
‘Ge hama meficnuma Yacakow soweckena,
ge hana Isracel ebicnginagoc yombong
anggecdeac sowecyununi.’
8 Anutungo mi sowecyunudeac
neng naric mi sowecyunubade.
Kebungo manganaac arennu
mi desiyunuudeac
neng ifingoc manganaac arennu
naric mi desiyunubade.
9 Ni hoc peperandzi bumau namma ye henduae,
ni tiki bumaunac kic fima henduae.
Ngicngacareng imoc yeni tembucngina kecma
yofi negendae,
neni ngicngacareng goa
yenigoc kpedzucnema mi kecnide.
10 Mongngo Yacakowac sendunga
kpetea naric mi meude,
ye Isracel sasawa neackpacarunac
mocgu naric mi osoyunudarude.
Neng homec dindingac
yeneac homec isoc homebadeac negenduae.
Nga neac kekecnasona wisic wisickea
imoc yeneac isoc ambeso.”
11 Ifi deu Balak ye imoc negemma Bilecam yofi edeec, “Ge noc faka anendang? Ge ngabafocna sowecyununadeac heitaiguma hesicgu hadua nga geng ine kenecyunudang.”
12 Ifi deu yeng yoac yofi meremmiec, “Kebungo yoac enacnau faiude imoc garenggema piti debade.”
Pisga tikibumau
13 Ifi deu Balak ye yofi edeec, “Ge hana nigoc bangec tosea monnu emma imohacsing yenennade. Imoc sasawa mi yenennade nga toseasac yenemma ine imohai meficnuma sowecyununade.” 14 Ifi dema wangeru Pisga tikibumau Tsofima kpindzingbangec feec, imohai kemma enoc. Emma arata sewen mema imohai burumakangiwa nga ramangiwa arata mocgu mocgufu sese faikenec.
15 Ifi amma Bilecamngo Balak yofi edeec, “Ge sesegerecgaac wegenahau nammana ni edimoc kemma Kebu meficgebesare.”
16 Ifi dema kenu Kebungo fingecmima enarau yoac faima yofi dema edeec, “Ge dzigenema Balak yearu kemma yoac imoc edebesena.”
17 Ifi deu ye dzigenema henu Balak ye Mocaw ngictaumedacareng yenigoc sesegerehaac wegenahaungoc nanggec. Namma Balakngo kpesimiec, “Kebungo yoac dafi dedac?”
18 Ifi deu Bilecam ye yoara yofi dekperagiec,
“Balak ge yacma negennenna,
Tsippor medaha ge kedzac kpema
neac yoac negenna.
19 Anutu ye bangecngic kpac,
imocac ikoc mong naric mi anude.
Ye bangecngicac medac mi ande,
imocac ye monde mondeya
mong mi fede.
Yeng yoac mong dema
faka imoc meude.
Ye yoac dema ua imoc mesiude.
20 Negennec,
ni kenecyunubadeac uayoac nendac
nga yeng kenecyunuu
ni naric mi wama mong debade.
21 Nga ni Yacakow yearu
ebic mong mi henduae,
Isracel manau ebic mong mi feu henduae.
Kebu Anutuyango yegoc kecde,
ngictaungina botucnginau kecdeac
sogac sogaigoc dendzerenggegec negendimbe.
22 Anutu yeac kuha
imoc kateburumakangiwaac kuc isoc.
Ye Aigitabangecfunac wangecyunuu eregec.
23 Yacakow yeac dzinacfaka mena
yearu fora kpac anude.
Isracel yeac mosocfaka mena
fora kpacngoc anude.
Nasotoa fingeru
Yacakow nga Isracel yeneac yofi degecde,
‘Hendae, Anutungo yenearu
fakatoa hania hania mekefec.’
24 Negendae, ngicngacareng imoc
yeni laiongngagera isoc yacma nandae,
yeni laionyang isoc yacma nandae.
Ye kecnegenga kpac kecma
yang kisandacmoc kpebucgema
sacfusia nedacmaguc mafeude.”
25 Ifi deu Balak ye Bilecam yofi edeec, “Ge sowecyununadeacsoc mi annadeu sifu mi kenecyunubesena.”
26 Ifi deu Bilecam ye yoac yofi meremmiec, “Ni Kebungo yoac edenude, imocsac debade, imoc bic edeguyai.”
Pecor tikibumau
27 Ifi deu Balak ye Bilecam yofi edeec, “Ge naric hana hesicguba amabangec monnu kende. Kende imohai gedang Anutungo negenu ngereeu meficnuma sowecyununade.” 28 Ye ifi dema Bilecam hesickeu Pecor tikibumau emma imohacsing bangec kisi hendaroc.