ᐆ ᒪᓯᓇᐦᐊᒫᒉᐎᓐ, ᐊᓐ ᐃᔅᑴᐤ ᑳ ᐎᔮᐸᒫᑲᓅᑦ ᓀᔥᑦ ᐅᑕᐙᔒᒻᐦ, ᒌ ᒪᓯᓇᐦᐊᒧᐙᑲᓅᒡ᙮ ᒫᔅᑰᒡ ᒌᔓᐌᒉ ᐅᔫ ᑳ ᐃᑗᑦ ᐁ ᑴᔅᑳᑎᓰᑦ ᐃᔅᑴᐤ ᓀᔥᑦ ᐊᓂᑦ ᐁ ᐃᔑ ᐯᔭᑯᑌᐅᓰᑦ ᒫᒃ ᑲᔦ ᒌ ᒌᔓᐌᒉ ᐊᔨᒥᐦᐁᐅᑲᒥᒄ ᓀᔥᑦ ᐊᓂᒌ ᐅᒫᒨᐊᔨᒥᐦᐋᐅᒡ᙮ ᐅᑕᐦ ᐅᒪᓯᓇᐦᐊᒫᒉᐎᓂᐦᒡ ᒞᓐ ᒌ ᐐᐦᑕᒻ ᑖᓐ ᐁ ᐃᔥᐱᔥ ᒋᐦᒋᐌ ᐃᑌᔨᐦᑖᑯᓂᔨᒡ ᐅᒫᒨᐊᔨᒥᐦᐋᐅᒡ ᒉᒌ ᓵᒋᐦᐄᑐᑣᐤ᙮ ᒌ ᐐᐦᑕᒻ ᒫᒃ ᐁ ᓵᒋᐦᐄᑐᓈᓅᐦᒡ ᐁᑯᑦ ᒉᒌ ᐅᐦᒋ ᓇᓂᐦᐄᐦᑖᑲᓄᔨᒀᐤ ᒋᔐᒪᓂᑑ ᐅᑲᒉᔅᑴᐎᓐᐦ ᓀᔥᑦ ᒋᔐᒪᓂᑑ ᐅᑲᒉᔅᑴᐎᓂᐦᒡ ᐁᑯᑦ ᐙᐦᑕᒫᑯᔨᐦᒄ ᓵᒋᐦᐄᐌᐎᓂᐦᒡ ᒉᒌ ᐃᔑ ᐱᒫᑎᓰᐦᒄ᙮ ᑲᔦ ᒌ ᐊᔮᒀᒥᒧᐌᐤ ᒞᓐ ᐁᑳ ᒉᒌ ᐱᓰᐐᑯᑣᐤ ᐅᒫᒧᐊᔨᒥᐦᐋᐅᒡ ᐊᓂᔫᐦ ᓂᑕᐐᓐ ᑳ ᐃᔑ ᒋᔅᑯᑕᒫᒉᔨᑣᐤ᙮