ᐁᐅᒄ ᐅᔫ ᑆᓪ ᐅᐐᒉᐙᑲᓐ᙮ ᒌ ᐅᔅᒋᓃᒎᔫᐦ ᐃᔅᑯᑕᒃ ᑳ ᑴᔅᑲᑎᓯᔨᒡ ᐊᓂᑦ ᒣᒀᒡ ᓃᔥᑕᒻ ᑳ ᐸᐹᒧᐦᑕᑖᑦ ᒥᔻᒋᒧᐎᓂᔫ᙮ ᒌ ᐐᒉᐌᐤ ᒫᒃ ᑆᓪ ᐃᔅᑯᑕᒃ ᒦᓐ ᑳ ᒋᔅᑐᐦᑌᔨᒡ ᐁᑯᑦ ᒫᒃ ᑳ ᐅᐦᒋ ᐐᒋᐦᐋᑦ ᑆᓪ ᐊᓂᔫ ᐁ ᐃᑖᐸᑎᓯᔨᒡ᙮ ᐁᑯᑦ ᒫᒃ ᐊᓂᑦ ᒣᒀᒡ ᑳ ᒪᓯᓇᐦᐊᐦᒃ ᑆᓪ ᐅᔫ ᒪᓯᓇᐦᐄᑲᓂᔫ ᒣᒀᒡ ᑳ ᒋᔅᑯᑖᒪᒉᑦ᙮ ᒌ ᐃᑖᐸᑎᓲ ᑎᒧᑏ ᑲᔦ ᒌ ᓃᑳᓂᔥᑲᒻ ᐊᔨᒥᐦᐁᐅᑲᒥᑯᔫ ᐊᓂᑌ ᐁᕕᓴᔅ᙮ ᐁᔥᒄ ᓈᔥᒡ ᒌ ᐊᐙᔑᔫ ᑎᒧᑏ ᒉᒌ ᐊᔮᑦ ᐋᐸᑕᓰᐎᓂᔫ ᐅᔫ ᐁ ᐃᔑ ᒋᔅᑌᔨᐦᑖᑯᓂᔨᒡ ᐁ ᓃᑳᓂᔥᑲᐦᒃ ᐊᔨᒥᐦᐁᐅᑲᒥᑯᔫ᙮ ᐁᒄ ᑆᓪ ᑳ ᒪᓯᓇᐦᐊᒧᐙᑦ ᐁ ᐐ ᐐᒋᐦᐋᑦ ᑲᔦ ᐁ ᐐᐦᑕᒧᐙᑦ ᑖᓂᑌ ᒉ ᐃᔑ ᓈᓈᑲᒋᐦᑖᔨᒡ ᐅᑖᐸᑎᓱᐎᓂᔫ᙮ ᐊᓂᔫ ᒫᒃ ᑳ ᒪᓯᓇᐦᐊᒧᐙᑦ ᒌ ᒋᔅᑯᑕᒧᐌᐤ ᐄᓅᐦ ᑖᓐ ᒉ ᐃᐦᑎᔨᒡ ᐊᓂᑌ ᐊᔨᒥᐦᐁᐅᑲᒥᑯᐦᒡ ᐁ ᐃᐦᑖᔨᒡ ᑲᔦ ᐁ ᓃᑳᓂᔥᑲᐦᒃ ᐊᐌᓐ ᑖᓐ ᒋᐹ ᐃᔑ ᓈᓈᑲᒋᐦᑖᐤ᙮