ᓗᒃ ᐊᓐ ᑳ ᒪᓯᓇᐦᐊᐦᒃ ᐅᔫ ᒥᔻᒋᒧᐎᓂᔫ ᒌ ᐐᒉᐌᐤ ᑆᓪ ᐁ ᐸᐹᒧᐦᑕᑖᔨᒡ ᒥᔻᒋᒧᐎᓂᔫ᙮ ᒌ ᓂᑕᐦᑯᐐᓅ ᐆ ᓗᒃ᙮ ᐊᓐᑦ ᐊᓂᔫ ᓃᔥᑕᒻ ᓀᐤ ᐁ ᐊᔨᒥᐦᑖᑲᓅᐦᒀᐤ ᐁ ᒋᐦᒋᐸᔨᒡ ᐆ ᒥᔻᒋᒧᐎᓐ ᐐᐦᑕᒻ ᓗᒃ ᐁ ᒌ ᒪᓯᓇᐦᐊᐦᒃ ᐅᔫ ᒥᔻᒋᒧᐎᓂᔫ ᒉᒌ ᒋᔅᒉᔨᐦᑕᒧᒄ ᑖᓐ ᓂᐦᐋᐤ ᑳ ᐃᐦᑎᑦ ᑲᔦ ᑖᓐ ᑳ ᐃᑗᑦ ᒌᓴᔅ ᒣᒀᒡ ᑳ ᐃᐦᑖᑦ ᐊᓂᑌ ᐃᔅᕋᐁᓪ ᑳ ᐃᔑᓂᐦᑳᑌᔨᒡ ᐊᔅᒌᔫ᙮ ᐁᑯᑦ ᐆ ᐁᑎᑑ ᐙᐦᑖᑲᓄᔨᒡ ᑖᓐ ᑳ ᐃᐦᑎᑦ ᒌᓴᔅ ᑲᔦ ᑖᓐ ᑳ ᐊᑎ ᐃᑎᔅᑳᑑᒪᑲᓂᔨᒡ ᑖᓐ ᑳ ᐃᐦᑎᑦ ᑲᔦ ᑖᓐ ᑳ ᐃᑗᑦ᙮ ᐋᔨᒨᑌᔫ ᑲᔦ ᒌᓴᔅ ᑖᓐ ᐁ ᐃᔥᐱᔥ ᓵᒋᐦᐋᑦ ᒥᓯᐌ ᐁ ᐃᑎᔅᑳᓀᓯᔨᒡ ᑲᔦ ᒥᓯᐌ ᐁ ᐃᔑ ᐊᔨᒥᔨᒡ ᐊᐌᔫᐦ᙮ ᓇᒧᐃ ᒥᒄ ᐊᓂᔫᐦ ᑳ ᒦᓯᑎᓯᔨᒡ ᒫᒃ ᑳ ᒋᔅᑌᔨᐦᑖᑯᓯᔨᒡ ᐅᐦᒋ ᓵᒋᐦᐁᐤ ᒌᓴᔅ᙮ ᐁᔫ ᐊᓂᔫᐦ ᑳ ᒋᔅᑎᒫᑎᓯᔨᒡ ᑲᔦ ᐁᑳ ᑳ ᒥᔪ ᒋᔅᒉᔨᒫᑲᓄᔨᒡ ᒌ ᓵᒋᐦᐁᐤ᙮