Niishtam niwii aayimuutenaan uu masinhiikan, Chishemanituu utayimuwin. Shaash weskach kaa uhchi ihtakuhch uu masinahiikan. Maauch niishtam kaa masinahiikanuuhch kutach ayimuwin chii aapatan e masinahiikanuuhch. Anuhchiish maak kaa chiishikaach, shaash nanaahkuu chii ishi itweshtamuwaataakanuu, nanaahkuu e ishi ayimitwaau awenichii utah aschiihch chii ishi itweshtamuwaataakanuu. E iteyihtaakanuuhch kiipaa misiwe awen chechii ayimihtaawaat Chishemanituu utayimuwiniyuu kaye maak ayimihtaatwaawenich chechii nistuhtahkwaau. Ekut utah masinahiikanihch waahtaakuhch taan kaa aihtit Jesus kaye taan kaa itwet mekwaach utah aschiihch kaa papaamuhtet. Ekut kaye utah masinahiikanihch chechii uhchi chischeyimihkw Jesus kaye Chishemanituu kaye maak Palehkii Ahchaahkw. Chikachii chiskutamaasunaanuu anita uhchi taan e ishi nituweyimihtahkw Chishemanituu chechii ishi pimaatisiyuuhkw.

Anichii iinuuch nuuhchimiiu iinuuch wiinipekuuch kaa ishinihkaataakanuutwaau anite James Pei kaa ihtaatwaau, aniyuu maak e ishi ayimitwaau ekun kaa ishi itweshtamuwaataakanuuhch uu uskach testamint. Mihchetu pipunh chii tasiihkaakanuu. Mistasiniiu iinuuch eukuuchii kaa wiichihiiwetwaau uyuu kaa ishi aapatisiihkahtaakanuyich. Wiyawaau chii itweshtamuwaatamuch kaye yaakwaau chii shi kanawaapahtamuch chechii miyuu nistuhtaakuniyich kaye maak kuiskw chechii itashteyich e iinuushteyich.

Mekwaach kaa pimiihkaakanuuhch e itweshtamuwaataakanuhch uskach testamint chii ihtakun an masinahiikan muush e chii kanawaapahtaakanuuhch, eukuu uskach testamint weskach e chii itweshtamuwaataakanuuhch kriik ayimuwinihch ishi. Chii ihtakun kiipaa nanaahkuu kutak masinahiikan e chii kanawaapahtaakanuuhkwaau muyaam an kaa wiipisaacheyaach masinhiikan muusuniihch kaa ushihtaakanuuhch anite weskach. Naanaahkuu e ishinaakuhkwaau e wemistikuusiiusinaatekwaauh uskach testamint chii aapatanh. Kaye aniyuuh masinahiikan anita e uhchi chiskutamaasut awen taan e ishi chiishuwemakaniyich nanaahkuu chekwaayuu Chishemanituu utayimuwinihch eukun kaye uyuuh kaa kanawaapahtaakanuuhkwaauh. Eukuyuuh masinahiikanh kaa aapatahkwaau kaa itweshtamuwaataakanuuhch uu uskach testamint.

Misiwe e ispihtaatisiit awen chii wiichihiiweu chechii uhchi ihtakuhch uyuu e ishi itweshtamuwaateyich Chishemanituu utayimuwin. Miyuu nisituhtamuch kaa chisheinuutwaau kaye kaa uschipimaatisiitwaau. Ihtakunh pasch chekwaayuu e inaanuuhkwaau ekaa shaash nisituhtahkwaau uschiniichuuch mikw maak eukun aniyuu ayimuwinh kaa aapatahkwaau wesh taapaa uhchii miskaakanuu taanite miin aahchiyuu chechii iinaanuuhch. Nichii iteyihtenaan kiipaa chipaa chii chiskutamaasuu awen aniyuu ayimuwinh ekaa kaa chischeyihtahk kakwechimaate anite aweyuu taan e ishi chiishuwemakaniyikwaau. Uskach kaa chihchipayihtaakanuuhch uu aapatisuwin chii mihchetuuch anichii kaa wiichihiiwetwaau. Iskutak maak kaa peshunaakuhch che chiishihtaakanuuhch namui uhchi mihchetuuch anichii kaa pimiihkahkwaau uyuu. Mikw anichii e chii chiskutamuwaakanuutwaau uyuu chechii ishi aapatisitwaau eukunich maahchishtai kaa ihtaatwaau. Wiyawaau chii chiishihtaauch uyuu taan kaa ishi pechi aapatisiihkahtaakanuuhch shaash mihchetu pipunh.

Uu kaa itasinahiikanuuhch e iinuushtech iyiyuu chiskutamaachewin kaa ishinihkaataakanuut, anichii maak iinuu ayimuwiniyuu kaa nanaakachihtaatwaau wiyawaau chii wiyeyihtamuch taanite chipaa itashteyuu chekwaayuu e iinuushteyich. Eukw maak uu kaa nanaakatuweyihtamaahch chechii ishi nanaakachihtaayaahch wesh eukuyuu e ishi chiskutamuwaakanuutwaau chechii ishi masinahiichetwaau awaashach anite e iskuuluuhaakanuutwaau.

Mihchetwaau nichii ishinaakusinaan miin maan e kanawaapahtamaahch an taan kaa ishi itweshtamuwaataakanuuhch, kuiskw kiipaa e chii wii ihtuutamaahch uu taan kaa ishi miikuyaahch aapatisuwin. Nititeyihtenaan maak eukuu kwasht chechii ishinaakuhch uu taan kaa ishi itweshtamuwaataakanuuhch. Anuhchiish taan e ishi ayimiihkw kaye maak taan e ishi iinuushtaakanuuhch ekun kaa itasinahamaahch uu uskach testamint.

Iteyihtaakun maak chechii nanaaskumaakanuutwaau misiwe anichii awenichii kaa wiichihiiwetwaau chechii uhchi ihtakuhch uu Chishemanituu utayimuwin e iinuushtech.

Misiwe taan e ishi wiihtaakuhch utah uu masinahiikan chii masinahiikanuu che chii uhchi chischeyihtahk misiwe awen taan e iteyihtaakusit Chishemanituu. Saachiheu misiwe aweyuu utah aschiihch kaa ihtaayich kaye wii chikachii ihtuutam chechii kwestinamuwaat aweyuuh upimaatisiiwiniyuu, mwehch wii kaa iteyihtaakusit chechii iteyihtaakusiyich. Iteyihtaakun maak chishemanituu chechii chistaachimaakanuut e chii chiishihtaakanuuhch e itweshtamuwaataakanuyich utayimuwin chiyaanuu e ishi ayimiihkw chechii itihtaakuhch. Wii maak nimaamihchimaanaan kaye ninanaaskumaanaan wii e chiishi nahiipayihtaat misiwe chekwaayuu chechii uhchi ihtakuch uu masinahiikan misiwe awen chechii ayimihtaat. Ishinaakuniyuu wii chechii chisteyimaakanuut kaye chechii nanaaskumaakanuut wesh taapaa nihtaa chi puunaapamikunuu wii. Wii uhchi wehchi ihtakuhch uu uskach testamint e iinuushtech.

Chinanaaskumitinaan chii kaa nistupeyakuyin, Jesus, uhtaawiimaau, palehkii ahchaahkw.