Miya jato se patarino jonunca
3
Ticatiya jera quino poden Miya Diosi itsantinae: Lachi tenchi paminca ereyanae tinae yape lachi cate minu senasa. Nulari Miya manca jasa meralarae; junni yari pansile nechi jachunae. Junto Diosichi yabi wichunae tinae. Nulari Diosichi fiqui paminca jasa meralarae yape Diosi trato quica junca manpasa. Junni yari wari fachunae tinae. Diosi tsantinae.2 Juntonan la Malaquías itsantinayoe: Ya Miya janari, ¿mo wantaito wiruichunan? tiyoe. Yari nin cuwenta seitonca jera piyaribi jachunae. Yari jabon cuwenta chiquilachi tencabi seiton midicaca jera manpiyarimin jochunae. 3 Miya Diosiri Levichi alica patelalachi tencaca jera mancasichunae. Jana calaca, junsi óroca, petse larichun ninbi chiba suwato pi suwamanhe. Junni jun tsanquenan Diosi patelelachi tencaca jera mancasichunae. Junni Diosi yalaca jera manse suwanunbi, aman Diosichi seque epe cuwano manpodeilaichunae. 4 Duque numari materi Miya Diosiri duque pansi jominue Judachi tobi, junsi Jerusalén pueblobi chuminla, yachi epe cuwalaquinun tenchi. Junni ya patelelachi tencaca jera mancasicabi, epe cuwalaquinanun tenchi manan manpansi jochunae.
5 Titiya jera quino poden Miya Diosi itsantinae: Mo mo sen quilaquinanunca, junsi mo mo seiton quilaquinanunca quirabi jano joyoe tinae. Junni tsanque quirabi jato, pone quiminlaca, uyan sonalabe nenaminlaca, nene paminlaca paito testico cuwenta yalachi contra pánae. Aman weyanlari cajosale pacara quiminla joe. Junsi biudalaca, apa iton nalalaca, junsi uyan tobi nechi jaca junlaca encanato tarinminla joe. Junni jerale tsanquiminlachi contra la Miya Diosi testico cuwenta paito pánae tinae. Diosi tsantinae.
Diosichi cuwano jonunca
6 Diosi itsantinae: Jacóbochi alicala, meralaquede! Lari Miya Diosi joto canbiyaitumin joyoe tinae. La canbiyaica jomanpari, nula israelítalaca casticaquito jera toteca jono jomin joinhie tinae. 7 Nulachi matu tatala lachi mantaca telaqueponun cuwenta, nulanan telaquepoca joto, la mantacaca merátuchi timinla joe tinae. Jun tenchi titiya jera quino poden Miya Diosi nulabe itsantinae: Nulari lachi quelo manhilaide! Nulari lachi quelo manhilainari, lanan nulachi quelo manhiyanae.
Juntonan nulari te, Diosichile nechi joqueitulajoyoe timinla joe. 8 Junni Diosiri nulabe itsanque panhanae: ¿Tsachilari Diosichica tarinno se jochunan? tinae. Junni nulari te, tarintulajoyoe timinla joe. Juntonan Diosiri itsanque beco manpánae: ¿Nulari ticatiya chunca catori, la Diosichi manca cuwanola joco? Juntonan nulari tsantuminla joe; junto lachica tarinlaquinae tinae. Junsi nulari ofrenda cuwanola joe; juncanan cuwatuminla joe. Tsanquenan lachica tarinlaquinae tinae. 9 Nula israelítala jeralela tsanque tarinlaquito, yucaquica junla joe tinae. 10 Junto Diosi nulabe itsantinae: Ticatiya chunca catori, lachi cuwachun manca tanjalaina! Nula tsanque tanjalainari, lachi yabi titiya fino jochunae. Nulari tsanque cuwato quiralaquede! lari niyan quino jonunca quirano muquilaquinari. Junni lari yoquidobi bentanaca lasito duque cuwanique, ticatiya duque puchuino fecári cuwanae tinae. 11 Nula tsanque cuwanilaquinari, la Diosiri nulachi uba witaca, junsi uyan witala ticatiya jera isaito cuidaiyanae tinae yape titiya waca junla quiyanchi puyalaitusa. 12 Tsanque nulachi witalaca isaito cuidainasa, uyanlari nulaca pato, sen tobi chularato, duque pansi joto sen jolajoe tilatichunae tinae. La ticatiya jera quino poden Miya Diosi joto tsantinayoe tinae.