12
Miya Diosi yoquidoca, junsi toca quimin joto, junsi tsachilachi tencaca quito, yalachi pucabi pomin joto, aman in fiquica israelítalabe pánae: 2 Jerusalén puebloca bino pun copa cuwenta josa cariyanae. Binori cuchiminlaca winan suwamanhe. Junni uyan to tsachilari Jerusalén pueblobe quera quicaatori bino cuchito winan ica junla cuwenta tenca iton jera ilaichunae. Judá tobi quera quicaato fe lochique jato podeilaituchunae tie. 3 Juntonan jun mate Jerusalén puebloca uyan to tsachilachi tenchi jadon wa su cuwenta josa cariyanae tie. Junto niyanlatiya ya suca jalitato tanjichi timinlari, jun wa suchi dilailaichunae. Manca to manca to layaito, Jerusalén puebloca quera quechique tenfeto, fe lono podeilaituchunae. 4 Aman lari yalachi calulaca jera wepanarito, junsi jun calubi chumin soldadolaca loco jera suwanae tie. Tsanque Israel tinunchi nao Judachi bolonlaca cuidaiyanae tie. Yalabe pa junlachi quera quicaanun calulaca caca iton cuwenta suwanae.5 Junni Judá bolonbi mantaminla junca quirato, yalachi tencabi itsanque tenca calaquichunae: Diosichi sonbabe fe lolainayoe. Jerusalenbi chuminlari Diosichi sonbabe poden jolajoyoeque tenca calaquichunae. Ticatiya jera quino poden Miya Diosi chiquilachi Diosi jonan, sonban jolajoyoeque tenca calaquichunae tie.
6 Jana nin calaca tebi ponari, duque nin lumanhe. Junsi duque jequen tape tuntubi nin ponari, sonba lumanhe. Junni jun mate israelita soldado mantaminla nin lusa carinun cuwenta quelote chuminlaca sonba quito fe lolaichunae. Junni israelítalari manaman Jerusalenbi manchuto, seque pansi manchularachunae tie.
7 Junni la Miya Diosi israelítalaca se larinato, itsanquechinayoe. Seitochunae Jerusalenbi chuminlari weyan israelítalaca fe sen jolajoyoeque tenca calaquinari. Jeralela jun tsannan jolajoyoeque tenhintsan joe. Jun tenchi lari Judá tobi chuminlaca se larinato, casale uyan postote se lariyanae, junte nechi Jerusaléntenan se lariyanae tie yape jeralelanan man parejori jolajoyoeque tenhilaisa. 8 Junto lari Miya Diosi joto, Jerusalenbi chuminlacanan isaiyanae. Junnan jeralela duque, duque sonban jolajochunae. Fe cumana jominnan mansonban ito, miya David cuwenta sonban jochunae. Junsi Davichi alicalari Diosi cuwentanan jolajochunae, o Diosi ereca jun anjeli yalachi caquele nenamin cuwenta jolajochunae. 9 Jun mate pansile niyanlatiya Jerusalenca quera quichi timinlaca tsanle jera yucapiyariyanae tie.
10 Jerusalenbi chuminlachi tencaca, junsi miya Davichi alicalachi tencaca, sen jolajosa cariyanae. Junto duque Diosibe rocaino muna punla jolajochunae. Junni aman tsan jonunbi, yala tileca jun tsachica yalanan manquiralaquichunae. Yaca quirato, laqui jolajoto warelaquichunae tie. Mancari nao jomin puyanan cuwenta, o caque nao puyanan cuwenta warelaquichunae.