Diosi Jerusalénlachi tenchi seque quino jonunca
8
Miya Diosi ticatiya jera quino poden joto, la Zacaríabe in fiquica pae: 2 La Diosi ticatiya jera quino poden joto, israelítalaca pato, itsantinayoe tie. Sion tinun duca isaino duque duque munarayoe. Jun du jamo Jerusalén joe. Junni molatiya Jerusalenbi chuminlaca seiton quebi jalainari, yalaca duque paito isaino joyoe. 3 Junto Jerusalenca manjato, junte chuanae tie. Junni la junte manjato chusa, ya pueblocari “Tsarasi Panun Pueblo” tinun mumun jochunae. Pueblo chunun duri “Miya Diosi Yachi Josa Wenteca Jun Du” tinun mumun jochunae. La ticatiya jera quino poden Diosi tsantinayoe tie.4 La israelítalachi tenchi titiya jera se patarino mate duque unica fecári sonnalarachunae. Unicalanan, sinucalanan manaman Jerusalenbi pansi manchularachunae. Yalari duque unica jolajoto, tolábe nenamin jolajochunae. 5 Junsi duque nálalanan Jerusalenbi jeleratuto, pansi tensaato nenalarachunae tie.
6 Tsanhino mate casonnamin israelítalari junca wepanalaichunae. Tsanque pansi manchuno podeituntsan joeque tenca calaquichunae. La Miya Diosi mantimini ticatiya jera quino poden joto, podeituntsan joe titiyoe. Junca wepanatiyoe. Podeintsan joe tiyoe tie.
7 Lari lachi tsachilaca se lariyanae yape uyan to tsachilabe mantaito chularatusa. 8 Tsanque manse larito, Jerusalenbi chusa mantanjanae tie. Junni junte yalari lachi tsachila jolajochunae. Lari yalachi Diosi joanae. Seque mantailaichunae. Junni lari seque, tsarasi pato mantaqueyanae tie.
Diosi la Zacaríabe tsantie yape israelítalabe mantsantisa.