Miqueas seiton tsachilaca panunca
7
Wepananayoe. Uba cano ma polenunbi uba neyamin cuwenta joyoe. Puraica jun ubacanan manaman neyato jera canunbi, tsachi manca uba manan manneyamanpari, natiya catuchunae. Junni lari sen tsachilaca neyanatonan, tsanque fetiyoe ya uba neyamin tsachi cuwenta. Sen uba, o ico puca fino duque munaratonan fetiyoe. 2 Piyanle tobi Diosibe seque, seque penenaminla itolajoe. Piyanle tsachila seiton quitosiri nenaminla joe. Weyanlari uyanlaca seiton quichun encanaminla joe. 3 Seiton quino talari tsaran jolajoe. Junni mantaminlari seque quichun pacara quisa timinla joe. Junsi juelari fe duque pacara quiminlaca isaiminla joe. Mantá tanlari yalachi munate quiminla joe; junto uyanlacanan seiton quimiyaminla joe.4 Mantá tanla tala fe senlanan tsa sen patsa itolajoe. Seiton po cuwenta jolajoe. Aman uyanlaca nanni fe seque nenaminlanan, o uyanlaca nanni fe respetainunlanan seitonla joe epe tape cuwentari. Juntonan aman manca ma fachunae ya jerale seitonlaca yalachi jutsa tenchi casticaquino ma. Junca Diosichi mantate paminla numa pacala joe. Jun materi seiton quiminla tenca jera palaito, tinantiya quino podeilaituchunae. 5 Jeralela seitonla jonan, amicolachi fiquica natiya quereituntsan joe. Junsi miyalacanan tennatuntsan joe yalanan encanalaquichunaeque. Tsachila tencachique sonabe pánanunca duque tencabe jonola joe pansile encanachunaeque. 6 Naolari apalaca paito beco paminla joe; junsi namalanan ayanlabe contra jolajoe. Nasolanan unilachi ayanbe pa jolajoe. Tsanque familiala talanan pa jolajoe. 7 Junni tsanla josatiya, lari Miya Diosica tennato méranae. Diosica tenca cato méranae. Yari laca se larimin joe; junto laca seque meráchunaeque mirayoe.