Jerale tote chuminla Diosica tennalarano jonunca
4
Juntonan to jeraino ma quelo inasari, Jerusalén pueblori, Sion tinun du jamo joto, duque tennanun pueblo manjochunae. Aman ya pueblori fécari tennanun joto, fécari sen jochunae. Junni jun du jamo Diosichi ya jochunae; yari piyanle tote fécari sen posto joto munaranun jochunae. Piyanle tote nechi tsachilari junte jera jalaichunae. 2 Piyanle postote nechi duque tsachila jato itsanlatichunae: Jilaisa! Miya Diosichi ya chunun dubi lolaisa! tilatichunae. Junbi Diosichi cosaca micarilaquichunae. Jerusalenbi yachi fiquica micarilaquichunae. Junnan Diosichi yaca jilaisa! Israelítala se tinun Diosichi yaca jilaisa! tilatichunae. Diosi niyaque nenalarasa munaranunca miibi jun yaca jilaisa! Tsanque miitori, Diosichi minuse seque nenano podeicaichunae tilatichunae.3 Jun mate palu bolon tsachila yala tala pataacala jonari, Miya Diosiri pachunae nun bolon seque pamin jonunca. Yari duque nuwiri bare tobi chumin sonban tsachilaca tsanque jera se patarichunae jue cuwenta. Tsan jera jonunbi, jerale tsachilari quera quicaatumin ito, yalachi espadaca to bulenun mansuwalaquichunae. Junsi yalachi lansacari poladera mansuwalaquichunae. Jun materi nun tsachi bolonnantiya man bolon tsachilabe quera quicaalaquituchunae. Junsi nala nalanlaca soldado jono wari micarilaquituchunae. 4 Junni jun materi jeralela ticanantiya tennatuto, jeleratuto chularachunae. Junto manca cura tencachique uba sili tenpe o tencachique ico pele tenpe jasaito chularachunae. Ticatiya jera quino poden Miya Diosi tsan jochunaeque paca joe.