—Jonás, Amítaichi nao, 2 Nínive tinun wa puebloca jide! tinue. Junsi junbi chuminlabe pade! la ya puebloca yucapiyarichinaeque. Yalari duque jutsa quiminla joeque mirayoe tinue.

3 Junni Diosi tsantica josanan, Jonari Nínive puebloca jitunue. Miya Diosica merátuto, yachi cale nechi sujichique tenfenue. Jope puebloca jito, barco fenue Tarsis puebloca jichinaminca. Junto pasaje cuwato, barcobi winue Társica jito Diosichi cate nechi nuwiri sujinayoeque tenca cato.

4 Junni lamaribi jilainasanan, Miya Diosiri sonba wa wu quisa carito, lamaricanan duque sonba wesa carinue. Ya barcori jera bojinonocari wenaminue. 5 Junni jun barcobi trabajaquiminlari duque jele tinato, ti diosila joe tinunlacatiya pato rocainaminlanue. Junsi titiya tanunlaca barcobi nechi lamaribi jera quepolaquinue yape barco quefoisa tito. Jonás mantimini barco tenpe wito, catson tsominue. 6 Junni barcobi mantamin capitanni Jonáchica jisi itsantinue:

—¿Niyaito nuri inte catson tsoyun? Cupade! Nuchi Diosibe rocaide! Pansile yari chiquilaca laquirato se larichunae tinue.

7 Aman tsantinasanan, jun barcobi trabajaquinaminla itsantilatinue:

—Suerte quilaquisa! mo culpa tanunca miichun, ¿mochi tenchi itsanque padeseilainain? tito.

Junni suerte quinan, Jonás culpa tan lonue. 8 Junni Jonabe itsantilatinue:

—¿Niyaito tsancari casticaino patin? Pade! ¿Niyaito inte jaca joyun? ¿Nunchi nechi jayun? ¿Nun tobi nechiyun? ¿Ti tsachi bolonbi nechi joyun? tilatinue.

9 Junni Jonás pato, itsantinue:

—Lari hebreo tsachi joyoe. (Israelítalacanan “hebreo” timinla joe.) Junsi Miya Diosica jelerato respetaimin joyoe tinue. Yari jamochi chumin joe. Yari lamaricanan, tocanan quimin joe. 10-11 Lari Miya Diosichi cale nechi sujinamanyoe tinue.

Junni yalari jun fiquica meránasaleri, fécari wu quinanan, lamari fécari paide paide jinaminue. Junnan nantanan fe duque jele tinaminlanue. Junni Jonabe itsanque panhalaquinue:

—¿Niyaito tsanhinayun? ¿Ti quintsan jun lamari deisa?

12 Junni Jonás itsantinue:

—Laca lamaribi quepolaquede! Junnan lamari mandeichunae. La mirayoe la tenchi padeseilainayoeque.

13 Tsantica josanan, barcobi trabajaquiminlari Jonaca lamaribi quepotuchi tilatinue. Junto palanca quito, fe sonba jichique tenfelainue to dequelo fechun tito. Juntonan latsabe wube fécari fécari sonba quinanan, podeilaitunue. 14 Junni duque jelechi sonba atilatinue. Miya Diosibe itsantilatinue:

—Miya Diosi, chiquilaca in tsachichi culpa tenchi puyasa caritude! tilatinue. Mannan in tsachiri culpa tayoe titonan, pansile nuchi cale culpa itochunae. Aman tsan jonari, chiquilaca culpa quituna! tilatinue lamaribi quepoto totenun tenchi. Miya Diosi, chiquila miralarayoe tilatinue nuri niyan quino muquinatiya quiniquichunaeque.

15 Tsanque patobi, aman Jonaca lamaribi quepolaquinue. Jun quinunsile, lamari mandeinue. 16 Junni barcobi trabajaquiminla junca quirato, Miya Diosica duque tenca cato respetailainue. Junsi Diosichi ticatiya epe cuwato, aman juraquito, Miya Diosica tennato nenalaranae tilatinue.

17 Junni Jonaca lamaribi queponunsi, Miya Diosiri wa watsaca seto erenue yape Jonaca luwasa tito. Junni Jonari watsa luwaca jun, watsa pecolobi peman ma, peman quepen pominue.