Amós Amasíabe panunca
7
10 Patele manca, Amasías mumun, Betel pueblobi chuminue. Yari Israel tobi miya Jeroboánchica itsanque pasa erenue: Miya Jeroboam, Amori Israel tobi nenato, nuca seitonque pade nenae. Yari tsanque pade canenatori, in toca duque problema tan suwachunae tisa erenue. 11 Yari itsanque pade nenae: Nu Jeroboanca, espadachi puyano joe tinae. Junsi chiquilaca pa jominla chiquilaca bare toca chusa tanjilaichunae tinae tinue.12 Junto Amasíari miyachi tsanque fiqui eretobi, la Amoca itsanque mantaquee:
—Amori, nuri Judá to israelita joe. Junto Diosichi mantate pamin joyoe titori, Israel tote nechi manjide! tie. Nuri Diosichi tenchi pato cala canaino muquinari, nuchi Judá toca manjito, junbi tsantin nenade! tie. 13 Wari in Betel pueblote tsanque fiqui patuna! tie. In pueblori miya Jeroboanni Diosichi cale telenhinun ya joe; inni Israel to capital pueblo joe tie.
14 Junni lari Amasíabe beco pato itsantiyoe:
—Lari Diosichi mantate pamin itomanyoe; yachi mantate pato cala canaimin natiya itoyoe. Nin Diosichi mantate paminchi naonan itoyoe tiyoe. Lari walaca cuidaito cala canaimin joyoe; junsi jelen ico pucaca baleto osimin joyoe tiyoe sonnano podeichun. 15 Juntonan Miya Diosiri wala cuidainoca telasa carito, labe itsanque pae tiyoe: Israel toca jito, lachi tsachilabe lachi mantate pade! tie tiyoe. 16 Junto jun tsanquinayoe tiyoe. Junnan nunan Miya Diosichi fiquica meráno joe. Meráde! Nuri laca Miya Diosichi tenchi israelítalaca seitonque patusa tinae. 17 Juntonan Miya Diosi nuca itsanque seitonque pánae tiyoe: In pueblote nuchi sona patsanan piyanle unilalabe seiton imin sona ino joe. Junsi nuchi naola, namala espadachi quica jun puyano jolajoe tinae tiyoe. Israelítalaca pa jominla nulaca cato, bare toca tanjilaichunae. Junnan nu Diosica merátuminla chunun tobi pepuyano joe. Junsi uyan tsachilari sorteailaichunae tinae tiyoe mo amana nu to tanunca cano jonunca.
La Amori tsanque Diosichi fiquica Amasíabe polariyoe.