2
12 Miya Diosi itsantinae: Jera tencachi lachica manquelo falaide! tinae. Junto nulachi jutsa tenchi ano fitunca ito, atito warelaquede! tinae. 13 Nulachi Miya Diosi tsantinan, nulari yabe manquelo falaide! Chiquilachi mite laqui joeque tenhilaisa, ¿chiquilachi camisaca chilelaquimanyoco? Junni nulachi camisacari chilelaquituna! Nulachi tencabiri laquiilaina! camisa chilenun cuwenta. Miya Diosiri duque wantaimin joto, duque munarato laquirae. Yari casticaquino munaratue.23 Nula Jerusalenbi chuminla, son tilatide! Nulachi Miya Diosichi tenchi son tilatide! Yari nula suwa quisa munaralarasa suwa quisa carimin joe jera waqueno podeilaisa. Pilu mate, junsi sino pilu matenan, suwa quisa carimin joe waqueca jera seisa. Matu mate tsanquimin joto, manaman tsanquichunae. 24 Junnan duque trico balelaquichunae. Bino, aseite, titiya michi jochunae.
25 Miya Diosi nulabe itsantinae: Nula weyan watate duque waqueto perdeicala jonunca la jera mancuwano joyoe. Jun poleca watalate lari nulaca casticaquito, duque malun, isu, titiya erecayoe yape nulachi pelelaca jera filaquisa. Ya animalilari la ereca jun joto duque pa jomin soldadola cuwenta jalaie. 26 Juntonan duque mancuwanae yape nisi muquinan filaquisa, junsi la nulachi Miya Diosi jonan se tilatisa. Lari nulachite seque wepanantsancari quimin joyoe yape nulari numanan manluilaitusa. 27 Junni nulaca tenhisa cariyanae la Miya Diosi nula israelítalabe peraeque. Junsi lasiri nulachi Miya Diosi joeque tenhito, uyan diosi itoeque tenhilaichunae. Junto lachi tsachilari numanan manlu tinola itochunae. Miya Diosi nulabe tsantinae.
Diosichi Tenca patano jonunca
28 Junsi Diosi nulabe itsantinae: Jera tsanquetobi, lachi Tencaca jerale tsachilachica ereyanae. Nulachi naolaca, junsi namalaca, lachi mantate palaquisa cariyanae. Unicalaca quipi quirasa cariyanae; nalan nalan unilalachi quirajasa cariyanae. 29 Jun mate lachi Tencaca labe mantaimin unilalachibi, junsi sonalachibi ereyanae. 30 Yoquidobi duque titiya quirawoanae yape wepanato quiralaquisa. Tobinan ticatiya quirawoanae asanca, ninca, nin poyoca. 31 Yori nemen ichunae; penan asan cuwenta luban ichunae tinae. Miya Diosi nulabe jera tsantinae.
Aman Miya Diosi to yucapiyarino ma quelo inasa tsanhisa carichunae. Jun mate duque sen jotonan, duque wepanantsan jochunae. 32 Juntonan Miya Diosibe rocaiminlacari puyasa carituto, se larichunae. Sion dubi Jerusalén joe; junni junbi lominlari se lono podeilaichunae. Miya Diosi tsanqueyanae tica joe; junto tsanchunae. Aman Diosi wenteca junlari puyatuto se lolaichunae.