Junni la tsantinanunca junpaluca tsachila, israelita miyachi tenchi trabajaquiminlari, meralaquee. Ya meráminlari inla jominlanue: Sefatías Matanchi nao, Gedalías Pasúrichi nao, Jucal Selemíachi nao, junsi Pasur Malquíachi nao. Yalari la pánaca junca meráto, 4 miyachica jito itsanlatinue: Jeremías duque seitonque pánae latinue. Israelítalaca pele tenca isa carinae. Junsi Jerusalente soldadolacanan pele tenca isa carinae. In pueblobi chuminlaca pansi chusa munaratue; yalachi tenchi seiton josa munarae tilatinue. Israelítalaca tsanque seitonque paca jonan, yaca totentsan joe tilatinue. 5 Junni miyari ya tsachilabe beco pato, itsantinue: Nulari Jeremíaca niyan quino muquinatiya quinilaquede! tinue. Nula miralarachunae. Lari nulaca natiya poreno podeino itoyoe tinue.

6 Aman la Jeremíari donun ya selate cadoramanyoe. Aman jun selate miyachi nao Malquíachi pi foro jominhe. Junni ya mantaminlari laca cato, jun pi forobi cabo silichi polaquee. Ya forori pi iton ica jonan, pipabi mena wiyoe.

7-8 Junni manca tsachi laca pi forochi pocala jonunca meránue. Yari Etiopía tsachi jominue Ebedmelec mumun. Miya tennanun tsachi joto, yachi yabi trabajaquimin jominue. Jun órate miyari “Benjaminchi Tamolan” tinunte cuenta quinaminue. Junni Ebedmeleri miyachi yabi nechi loto, junchi jito, miyabe itsantinue:

9 —Miya, ya tsachilari Jeremíaca duque seiton quicala joe. Pi forochi pocala joe. Pueblote ano itonan, ano mochi puyachunae tinue.

10 Junni miyari yaca meráto, pi forochi nechi manlarisa tinue. Peman chunca tsachilaca tanjisa tinue. Junni yalari man jinni ito, laca pi forobi nechi manlarilaquisa tinue yape puyatusa. 11 Junni Ebedmelec peman chunca tsachilaca layato, casale unica tsanpa queponun postoca tanjinue. Calaca senun tamo tenpe jominue. Junni unica tsanpa, junsi cabo sili cato, pi foroca tanjito, lachica patarito, 12 laca mantaquee tsanpaca panchi minu podeque yape cabo siliri lachi panchica sitiletusa.

Junni tsanquiyoe. 13 Junni ya tsachilari cabo silichi laca manlarilaquee. Junni forochi nechi manloto, donun selatenan capuraiyoe.

14 Junni forochi nechi manlonunbi, miya Sedequías laca jasa fiqui erenue. Diosichi ya peman tamolante tulaibi jasa tinue. Junni junte tulaito, miyari labe itsantie:

—Nube nasi panhachinayoe; junto nuca tsa manpasa munarayoe tie luratuto.

15 Junni la Jeremías miyabe itsantiyoe:

—Seitochunae. Tsa panari, nuri laca totechunae; nasi payinari, merátuchunae. Jun tenchi la tsa panari seitochunae tiyoe.

16 Junni la tsantinunsi miyari nosa pato, Diosichi cate juraquito pánayoe tito, itsantie:

—Chiquilaca sonnasa carimin Miya Diosichi cate juraquinayoe tie totetuanaeque, junsi totechi timinlachinan cuwapotuanaeque.

17 Junni miya tsantinan, lari itsantiyoe:

—Jera quino poden Miya Diosi, israelítalachi Diosi, itsantinae: ¿Babilonia to miya chiquilabe quicaachun soldadolaca ereca joco? Junni nuri Babilonia soldadolaca mantaminlachi we cuwapoitori, puyatuchunae tinae. Nu, junsi nuchi familialanan, puyalaituchunae. Junsi Babilonia soldadola Jerusalén pueblocanan nin polaquituchunae. 18 Babilonia soldadolachi cuwapoilaitunari, yala jalaito, in puebloca cato nin polaquichunae tinae. Junni nuri sujino podeituchunae tinae.

Miya Diosi miya Sedequíaca lachise tsanque pae.