Junni la Jeremías junte wiruito, Miya Diosi itsanque pacaca israelítalabe jera polariyoe:

Seque nenato, sen cosa quilaquede! tinae. Tsanquilaquinari, nulaca in tobi cachularasa cariyanae. 4 Weyanlari itsantiminla joe: Inte Jerusalente Miya Diosichi ya jonari, padeseicaituchunae timinla joe. Tsantiminlaca quereitulajona! Yari nene joe. 5 Seque nenato, sen cosa quintsan joe. Nene pacaanoca puralaquede! 6 Uyan to tsachilacanan nene pato, seiton quitulajona! Apa iton nalalacanan, junsi biudalacanan seiton quitulajona! Inte tinantiya seiton quitumin tsachilaca totenoca deilaide! Epe diosi joe tinunlacanan se tino puralaquede! (Yalaca se tinaminnan, nulanan padeseiminla joe.) Tsanque seiton quinoca puralaquinari, 7 inte cachularasa cariyanae. In tori nulachi matu tatalachi tsanle cuwaca jun to joe tinae.

8 Junsi la Jeremías israelítalaca Diosichi tenchi payinato, in fiquicanan payoe. Diosi itsantinae tiyoe: Nulari nene fiqui, seitonuncari quereito tennaminla joe tinae. 9 Nulanan tarinminla joe; toten, uyanchi sonaca can, nene pan, quiminla joe. Baal tinun moldechi cale insienso lucuca nin pominla joe. Tennatuntsan epe diosilaca se timinla joe.

10 Jun jera seiton cosa quetobi, inte lachi yabi wito, lachi cate wiruiminla joe. Nulari inte lachi yabi rato, tinantiya seiton itochunaeque tenca caminla joe. La munaratunun seiton cosa quilaquinatonan, seiton itucaichunaeque tennalarae. 11 Nulari lachi yaca tarinnun ya cuwenta suwacala joe. La Miya Diosi nulachi jutsaca jera quiranayoe tinayoe.

12 Matu numari Silo puebloca wenteca jomanyoe yape junte lachi ya josa. Juntonan israelita tsachilari jun postote jutsa quilaquinue. Junnan lachi tsachilaca casticaquicayoe. Ya postoca quirabi jilaide! niyaque yalachi jutsa tenchi yucapiyarica jonunca miibi. 13 Lari nulaca duque ne pacayoe seque nenalarasa. Juntonan nulari merátuminla joe; nin tulantuminla joe. La Miya Diosi tsanque pánayoe. 14 Junni meralaquede! Lari in yaca nulachi, junsi nulachi matu tatalachi cuwaca jomanyoe yape inte laca se tilatisa. Nulari inte rato niyaquenantiya seiton itochunaeque tenca talarae. Juntonan tsanque itoe. Sílobi lachi yaca yucapiyarisa caricayoe. Intenan lachi yaca jun tsannan quino joyoe.

15 Aman Israel tinun tobi chumin jomin israelítalaca tenca calaquede! Yalari israelítala jolajosanan, yalaca casticaquiyoe. Yalaca yalachi tobi nechi tanjisa cariyoe. Junni nulachi jutsaca puratulajonari, nulaca inte nechi jun tsannan queyanae tinae. Miya Diosi la Jeremíaca mantaca jominhe yape israelítalabe yachi fiquica tsanque jera pasa.