Diosi tsachilabe sen jono jonunca
65
Miya Diosi itsantie: Laca miichique tenfetuminlabenan quiraiyanae. Laca neyatumin jominlari laca felaichunae. Labe rocaitumin jominlabenan pato, inte rayoe tiyanae tie. 2 Junnasa israelítalaca numasitiya ayudaichun tinasanan, laca merátuchi timin uyan tenca pun tsachila jolajoe tie.17 Junsi Miya Diosi itsantie: Quiralaquede! Casan yoquido, junsi casan to queyanae. Jerale matu jomin cosalaca pansilaichunae; monantiya yaca mantenhilaituchunae tie. 18 Jerusalenbi chuminlaca pansi jolajosa cariyanae. Junte chuminlaca son tisa cariyanae. Junto nulari la quinaminca quirato, numatotiya son tito polelaichunae. 19 La patsanan Jerusalén tenchi son tiyanae. Lachi tsachilachi tenchi son tiyanae. Jun Jerusalenbi monantiya warelaquituchunae. Monantiya wepanato atilatituchunae.
20 Junte nalalari casan naica jun puyalaituchunae; unicalanan puyano wata michi ituminnan puyalaituchunae. Patsa wata tan puyaca jonari, nalalannan puyae tilatichunae. Patsa wata fetunari, yuca quica jun joto moora puyaca jonhoe latichunae.
21 Junni tsachila ya quilaquitori, yalanan jun yabi chularachunae. Uba sili waquelaquitori, yalanan uba filaquichunae. 22 Amanari ya quimin tsachi puyanari, manca tsachi jun yabi chudimin joe. Manca tsachi uba waqueto puyanari, manca tsachi uba fimin joe. Jun materi tsan itochunae. Lachi tsachila chide pele cuwenta duque sonnalarachunae. La wenteca junlari titiya waqueto, yalanan filaquichunae. 23 La Miya Diosi lachi matu tsachilabe duque sen jomanyoe. Junto yalachi alicalabenan jun tsanquenan seque queyanae. Epenan trabajaquilaquituchunae. Yalachi nalalari yuca quica junla itochunae.