Isaíchi alicari seque mantamin jono jonunca
11
Isaí, miya Davichi apa, chide butu cuwenta joe. Junni yachi alica manca, butubi mansuca jun cuwenta jochunae. 2 Jun tsachichibi Miya Diosichi Tenca patsa rachunae; duque min, tenca tan, junsi sonban suwachunae. Ya tsachiri mantamin ito, duque mirato, Miya Diosica respetaito jelerachunae. 3 Miya Diosica seque, son tito respetaichunae.Jamoleri quirato patuchunae. Mo tsa pánanunca miito pachun, epele meráto patuchunae. 4 Pansile epe tsachilari tsa palaquinanan, yalaca isaito seque quichunae. Yachi tobi poperela chuminlaca isaito pachunae. Duque sonba pachunae; yachi fiquiri seiton tsachilaca silichi asota quinanun cuwenta jochunae. Seiton tsachilacari furipocachiri totechunae. 5 Numasitiya tsacasiri pachunae. Senlacasiri fe losa carichunae.
6 Jun materi lobori opisa náca niyaquenantiya seiton quituto, man junni jochunae; luquelabe chibo nabe niyanantiya ituto man junni jolajochunae; junsi wala nabe luquelabe tsachila tanun uyan animalilabe man parejori nenalarachunae. Jerale animalila min joto, nalala tannenano podeintsancari min jolajochunae. 7 Wala na ayanbe osobe amico jolajonan, yalachi nalalanan man jasainin ilaichunae. Luquela wala cuwenta lapa fichunae. 8 Tsachi nalala pini foro quelole tensaano podeilaichunae; junsi pini forobi tede ereno podeilaichunae. 9 Jerale Diosichi sen postote seiton quilaquituchunae. Lamari jeralete pi joe; jun tsanquenan jerale tote Miya Diosica miralarachunae.
10 Jun materi ya tsachi, Isaíchi alica, miya jochunae. Yari poden jonan, jeralela quiralaquichunae. Nuwiri uyan tobi nechi yaca quirabi jalaichunae. Yari tsanque mantá tato, duque seque mantachunae. 11 Jun materi Miya Diosi tsachilaca miisa carichunae yari duque poden joyoeque. Yachi tsachilaca yalachi toca manjalaisa carichunae. Duque uyanchi nuwiri tólaca tanjica junlanan mantanjachunae. Asíriabi nechi, Egíptobi nechi, Pátrobi nechi, Etiopíabi nechi, Elanbi nechi, Sináribi nechi, Hamátibi nechi junsi lamari becochi duque uyan tólabi nechi jera manjalaisa carichunae.