Corechi naola in salmo chutelaquinue.
44
Diosi, nu matu mate niyan quimin jonunca meracalayoe.Chiquilachi tatalari matu nu niyan quimin jonunca pacalae.
2 Nuca merátumin tsachi bolonlaca nunan casticaquica joe.
Yalaca in tobi nechi jera quepoca joe.
Junto nunan chiquilachi matu tatalaca inte chularasa tanjaca jominue.
3 Chiquilachi matu tatalari quera quito fe loca jominlanue.
Juntonan yalachi sonbachi, yalachi espadachi fe lotuca jominlanue.
Nu yalaca fe losa carica jominue.
Yalari in toca josolelaquitunue; nu nuchi sonbachi josoleto cuwanue.
Duque mantá tan joto, nu yalabe parejo pejominue.
Junnan yala fe lolainue; yalaca laquirato tsanque fe losa carinue.
20 Diosi, nu mirae chiquilari nuca pansitucala joeque.
Nuca pansicala jomanpari, nu ura mirano jomin jonhoe.
Nuca puratulajoyoe.
Nuca purato, epe diosi joe tinunca se tilatimanpari,
21 Nu ura tenhito, chiquilabe ¿Ti quichun tsanlaquiyun? tino jomin jonhoe.
Aman nuri chiquilachi tencabi niyaque tenca cananunca ura mirae.
22 Tsan josanan, chiquila nuchi tsachila jonun tenchi numasitiya totainonan jolajoyoe.
Junni seitonlaberi chiquilari yalachiri totenun opisala cuwenta jolajoyoe.
23 Junni Miya Diosi, ¿niyaito catson tsoyun?
Wari mansonhide!
Junsi natiya chiquilachite nechi tsanle joqueituna!
24 ¿Junsi niya jonan tsainayun?
¿Niyaito chiquilaca pansiyun?
Junsi chiquila duque padeseinanunca tenhitumin tsanni joe.
25 Aman duque luito padeseica jun jolajoyoe.
Duque padeseilainayoe tobi quepoito tsomin cuwenta.
26 Juntonan Diosi, wiruito ayudaibi jade!
Duque laquirato chiquilaca se laride!