Miya David in salmo chutenue.
19
Yoquidoca quirato miintsan joe Diosi poden joto sen jonunca.Junsi yoquidoca quirato miralarayoe Diosi quica jonunca.
2 Aman manca ma jerainunsi, manca mamam joe.
Junsi man quepen jerainunsi, man quepenman joe.
Itsan cosalaca quirato miilaiyoe Diosi tsanquica jonunca.
3 Aman Diosi fiquichi patusanan, ya micarica fiqui mera itosanan,
4 Yachi fiqui jerale tote mera joe.
Junsi aman fe nuwiri tobitiya Diosi quicaca quirato, Diosi joeque miintsan joe.
Aman Diosi yoquidoca yochi ya cuwenta quica joe.
5 Quepenanan son quiraimin joe; tsachi manca casan casalaito yachi tamochi nechi lanun cuwenta lamin joe.
Yori yoquidose son tito sujimin joe tsachi manca carerabi sujinun cuwenta.
6 Aman yori fechi nechi quiraito, yoquidose poleto pelechi manpiyapolemin joe.
Junsi pata quito, ticatiya jera loba suwamin joe.
7 Miya Diosichi mantári tsara sen joe.
Junsi tencaca casan mansuwamin joe.
Miya Diosi micarica jun fiquica seque tennantsan joe.
Tinantiya miiton tsachilaca min suwamin joe.
8 Miya Diosi mantaca junni sen joe.
Yaca meránan, tencaca son tenjasa carimin joe.
Miya Diosica meráminlari sen minuseri nenalarachunae.
Miya Diosichi mantári yalachi cacachi tenchi tseno cuwenta joe.
9 Miya Diosica jelerato respetaino duque se joe. Numatotiya tsanque jelerato nenato polentsan joe.
Aman Miya Diosichi mantaca meráminlari ti tsa jonunca miralarachunae. Tsarasi fiquisiri joe.
10 Yachi mantári duque sen oroca fe munarantsan joe.
Junsi pinban china pica fe sen joe.
11 La Diosibe mantaimin joto, yachi mantabe duque miimin joyoe.
Yaca meráminlari duque senca talarachunae.
12 Monantiya tencachique jutsaca tenhituminla joe.
Miya Diosi, lanan lachi jutsaca miitoyoe; juntonan perdonaide!
13 La nube mantaimin jonan, fe joyoeque tenca tan itosa caride!
Laca cuidaide! fe joyoeque tenca tan itochun.
Nu seque cuidainari, falta iton tsachi joichunae.
Junsi nuca paito nenatuichunae.
14 Miya Diosi, sen fiquicari pano muquee yape nu sen fiqui pamin joe tisa.
Junsi nu sen joe tinuncari tenca cano muquee.
Nusiri laca cuidaito se larimin joe.