Miya David in salmo chutenue.
14
Aman tenca itonlari Diosica itoeque tenca cato, yalachi tencabi jera yucapiyacala joe.Junsi duque seiton quiminla joe; junto mancanantiya seque quimin itoe.
2 Miya Diosiri jamochi nechi quiranue tsa manca tsachi entendeimin jonunca.
Junsi tsa manca Diosica neyamin jonunca quiranue.
3 Juntonan jeralela seiton minusesiri jicala joe.
Jeralela jun tsannan jolajoe; mancanantiya sen quimin itoe, nin mancanantiya.
4 Seiton quiminlari entendeituminla joe.
Jana tsachila bibuca casi finun cuwenta, yalari lachi tsachilachi cosalaca josoleniquiminla joe.
Junsi Miya Diosibe rocaituminla joe.
5 Junto aman yalari Diosi yaca meráto obedeseiminlabe peraeque tenhito, jelechi jowinpolaquichunae.
6 Junsi poperela sen cosa quichi tinaminlaca quirato, seitonlari yalaca seitonque pato lucariminla joe.
Juntonan Miya Diosiri poperelaca ayudaimin joe.
7 Junto Diosica Sion dubi nechi jasa tenjae yachi israelita tsachilaca se laribi.
Junsi Miya Diosi chiquila padeseinaminlaca jera seque ayudaichunae chiquilachi tenchi jera titiya seque patisa.
Aman tsanquino mate jerale israelítala, Jacóbochi alicala joto, duque pansi joto, son tilatichunae.