Miya David in salmo chutenue.
5
Miya Diosi, la pánaminca meráde!Padeseinato tsantinanunca meráde!
2 Lachi Diosi, lachi Miya joto ticatiya panhanan cuwaniquina!
Nubesiri rocaimin joanae.
3 Miya Diosi, quepenanan la pánaminca nu meráchunae.
Junto quepenanan nube cuenta queyanae.
Junto aman nu niyaque manpamin jonunca la méranae.
4 Nu Diosi patsa joto, seitonca munaiton joe.
Jutsa quiminlari nube numanan pechuno podeilaituchunae.
5 Aman fe joyoeque tenca caminlanan nuchi cale rano podeilaituchunae.
Seiton quiminlaca nu pa joe.
6 Junsi nene paminlaca casticaquimin joe.
Encanaminlaca, junsi toteminlaca Miya Diosi wantaino podeiton joe.
7 Laca mantimini nu duque laquirato, nuchi yabi wino podeisa carichunae.
Junto nuca duque respetaito, nuchi cale telenhimin joyoe nuchi sen ya nanchi tenca cato quirato.
8 Miya Diosi, laca pa jominlari duque pasuwaminla joe.
Junnan nube ti quino jonunca ayudaisa panhanayoe.
Junsi nuchi minuse seque nenachunnan panhanayoe.
9 Junto aman laca pa jominlari seiton tenca joto, ticatiya tsa patuminla joe.
Yala paca fiquiri seiton jonan, menaranun foro manforoica junbi nechi cuwenta joe.
Junsi amico cuwenta pánatonan, titiya cachiqueri paminla joe.
10 Diosi, yalaca casticaquede!
Yala seiton quichun tenpanasa, yala tenpaca junca se losa caritude!
Nube contra joto, duque seiton quica jolajoe; junnan yalaca telaquepode!
11 Aman tsan josanan, nuca tennato cuidaisa timinlari duque son jonola joe.
Numasitiya pansi, son canta quinola joe nu yalaca cuidaimin jonan.
Nuca laquiraminlari nuchi tenchi son jolajochunae.
12 Miya Diosi, nu seque nenaminlabe sen jochunae.
Yalaca duque seque cuidaimin joe.