Diosichi yaca jerato, fiesta quilaquinunca
6
16 Israelítalari Diosichi yaca jera quetobi, yala tala wa fiesta quilaquinue. Patelela, lebitala, junsi uyan weyanla yalachi toca manjaca junlabe duque son tito fiesta quilaquinue Diosichi yaca manquilaquiyoe tito. 17 Jun fiesta mate duque animalilaca totelaquinue Diosichi epe cuwato. Itsanque Diosichi cuwalaquinue: Patsa nala nalan wala, palu patsa unila opisa, junsi junpalu patsa opisa na. Junsi chunca paluca chibo toteto cuwalaquinue yape Diosi yalachi jutsaca perdonaisa. Chunca palu bolon israelítala jominlanue; junni bolon cura chibo manca cuwalaquinue chunca paluca chibo.18 Jun jera tsanquetobi, patelelaca chican cura bolon suwalaquinue yape ya bolonlari Diosichi yabi turno cura Diosichi tenchi titiya quilaquisa. Lebitalaca jun tsannan quilaquinue yape yalari patelelaca ayudailaisa. Tsanto, patelelabe lebitalabe Jerusalenbi Diosichi tenchi quinaminlanue Diosichi Pilabi chununca. Moisés niyaque chuteca junca, jun tsannan quinaminlanue.
19 Junsi yalachi toca manjaca junla wa ma fiesta quilaquinue. Jun fiesta quino pebi chunca junpalu ma josa ya fiesta quilaquinue. 20 Patelela, junsi lebitalari jera mantsaleca jominlanue; tsanqueri wari Diosichi cosalaca quelo fentsan ilainue. Casa mate patelelari jeralelachi tenchi opisa náca toteto cuwalaquinue. Yalachi tenchinan tsanlaquinue, junsi weyan patelelachi tenchi, junsi uyan bare tobi nechi manjaca junlachi tenchinan tsanlaquinue.
21 Yalachi toca manjaca jun israelítalari casa ma fiestate ano filaquinue. Junsi duque israelítalari bare toca jica iton jominlanue; yalari israelita itonlachi seiton costunbre pecaya jominlanue tsa Diosica tennatuno. Junnasa weyanlari ya seiton costunbreca telaquepoto, man weyan israelítalabe yalachi Miya Diosica pese tinaminlanue. Yalanan jun casa ma fiestate ano pefilaquinue. 22 Siete ma fecári fiesta quilaquinue. Junni jun fiesta malate lebadura iton bibuca finaminlanue. Lebadura pun bibuca natiya fitulajonue. Junni aman Diosi Persia miyaca israelítalaca laquirasa carica jominue. Junni jun laquirato, yalachi Diosichi ya quilaquinasa peayudaica jominue. Junni jun tenchi duque son tito fiesta quilaquinue.