15 —Israelítalachi Miya Diosica se tilatisa! tinue. Yari lachi apa Davibe paca junca jera quinue. Diosi itsantica jominue tinue: 16 Lachi israelita tsachilaca Egíptobi nechi manlaricayale nechi, la nun pueblocanantiya wentetucayoe tica jominue tinue yape jun pueblobi Diosichi ya quito Diosichi ya joe tilatisa. Tsan jotonan Davica wentecayoe tica jominue tinue yape yari lachi israelita tsachilaca mantamin josa.

17 Junni Salomón capánato, itsantinue:

—Lachi apa David Diosichi ya quino munaraminue tinue yape israelítalari jun yabi yalachi Miya Diosica se tilatisa. 18 Tsan josanan Miya Diosiri lachi apa Davibe pato, yachi tenchi ya quino munarano duque se joe tica jominue tinue. 19 Juntonan nuri yachi tenchi ya quituchunae. Na tano joe. Junni ya nari nuchi na patsa joto Diosichi ya quichunae tica jominue tinue.

20 Junni amana Miya Diosi titiya queyanae tica junca jera quica joe. Matu lachi apa David mantá taminca amana laman tayoe. Junsi lanan ya cuwenta israelítalaca mantanayoe. Junsi israelítalachi Miya Diosichi ya quisa caricayoe. 21 Aman junsi jun yabinan man posto Diosichi cajonca tsorenun posto quisa cariyoe. Junni jun cajonbi Miya Diosi trato pila quica jun poe tinue. Jun trato chiquilachi matu tatalaca Egíptobi nechi manlarinato pila quisa carica jominue.

22 Junni Salomón tsanque jera patobi, Miya Diosichi ticatiya cuwanun mesa cachi wiruinue. Junte jerale israelítala layaito quiranaminlanue. Junsi Salomón yachi tedeca yoquido minu jalitato, 23 itsanque rocainue:

—Israelítalachi Miya Diosi, nu cuwenta Diosi tinantiya itoe nin jamochi nin tótenan. Jera tencachi nube mantaiminlabe nu sen joe. Nu trato quito, yalaca laquirato, yalachi tenchi jera quimin joe. 24 Junsi nu lachi apa Davibe paca jominca jera quinue. Yari nuchi mantate nenamin jonan, nu paca jominca jera quinue.

25 Junni aman israelítalachi Miya Diosi, lachi apa Daviri nube mantaimin jonan, nu yabe itsantinue: Yachi alicala seque nenalaranari, nuchi cale David cuwentanan seque jolajonari, numasitiya yachi alicalacari israelítalachi miyala josa cariyanae tinue. 26 Junto israelítalachi Miya Diosi, la nube tsanque panhanayoe: nu lachi apa Davibe paca junca jera quina! Ya nube seque mantaimin jominue tinue.

27 Junni Diosi, nuri in toteri rano podeitue. To michi ayancan itoe. Jamochi duque ayancan josanan, junbinan michi ayancan itoe nu junbi chuno podeisa. Junni tsan jonari, ¿la ya quicabi niyaito jera wichun? tinue. 28 Junni lachi Miya Diosi, amana nube panhanaminca merása tenjae. La nube mantaimin jonan, junca jera quisa tenjae tinue. 29 Junni in yaca quepen, malon quiranasa tenjae. In ya nuchi ya joe. Nu In yabi chuanae ticae. La nube mantaimin joto, tsanque panhanayoe. 30 Junni labe weyan israelítalabe in yabi nube rocailainasa, chiquilaca merána! Jamochi nu chunun postobi nechi chiquilaca meráto, chiquilachi jutsaca jera piyarina! tinue.