Josueca Moisés tenchi mantamin suwanunca
27
12 Junni duque wata polenunbi, Miya Diosi Moisebe itsantinue: Nu Abarim mumun dubi lona! tinue. Junbi nechi la israelítalachi cuwaca jun toca quirana! tinue. 13 Junni nuri ya toca quiratobi, jun dubi puyano joe tinue. Nuchi aco Aarón tsanhica joe; amana nunan tsanhino joe. 14 Zin tinun tote israelítalari laca pailainasa, nube Aaronbe laca merátucalae. Tsachila pi panhalaquinasa, la nulaca pi cuwasa cariyoe. Junni pi larilaquetobi, laca pi cuwae titulajoe; nulari pi cuwalaquinayoe tilatie. Jun tenchi nula puyato, la cuwaca jun tobi israelítalabe pewino itolajoe tinue. (Yari Meriba tinun pi lananun postoca pánaminue Cades quelote.)15 Junni Moiseri Miya Diosibe pato itsantinue:
16 —Miya Diosi, nu jeralelaca sonnasa carimin joe. Junto amana nunan lachi tenchi mantamin wentede! yape la puyanunbi israelítalaca mantasa. Nu wentede! 17 yape nuchi tsachilaca seque mantamin josa, junsi nunchi jino jonunca micuwamin josa. Tsantunari, nuchi tsachilari monantiya cuidaica iton opisa topiyaca cuwenta jolajochunae tinue.
18 Junnan Miya Diosi Moisebe itsantinue:
—Josué, Nun tinunchi nao, yari lachi Tencaca pun nenamin joe tinue. Yaca jasa carito, yaca tedechi tale quito, 19 Eleazar patelechi cate, junsi jerale israelítalachi cate yaca mantamin suwade! tinue.
Junnan Moiseri jun tsannan quinue.