—Israelítalari chiquila titiya tanunca josolelaquechinae tinue wala pajabi jinato jera fide fide jimanhe, jun cuwenta.

Junnan Balac, moabítalachi miyari 5 Balaanca jasa fiqui erenue. Yari yachi tsachilachi tobi, Petor pueblobi, chuminue Eufrates pi quelote. Junni miya Balari Balaanbe itsanque fiqui erenue: Duque tsachila Egíptobi nechi loto jacala joe; amana yalari chiquilachi tobi chularae. Tsaina chiquilachi cate chularae tinue.

6 Junni nu Balaam wewe jato, ya tsachilaca yuca quito cuwade! Yalari chiquilaca duque fe sonban jolajoe. Juntonan nu yuca quito cuwanari, pansile fe loto chiquilachi tobi nechi manlarito ereno podeicaichunae. Junni la mirayoe tinue nu Balaam mocatiya bendesiquinari, o yuca quinari, jun tsannan imin joeque. Tsanque miya Balac Balaánchica fiqui erenue.

7 Junni moabita mantaminlabe madianita mantaminlabe tsanque Balaanbe pabi jilainue. Junto duque cala titiya tanjilainue israelítalaca yuca quica tenchi pacara quichun. Junni Balaánchibi féto, miya Balac fiqui erecaca jera palaquinue. 8 Junni Balaanni beco pato itsantinue:

—Amana quepen inte catsolaide! tinue. Ayuna nanchi Miya Diosi niyan tinatiya manpánae tinue.

Junni panhabi jaminlari jun quepente junte catsolainue. 9 Junni Diosiri jun quepente Balaanbe quiraito itsanque panue:

—¿Ya tsachila ti quichun nuchica jacala jun? tinue.

10 Junni Balaanni Diosibe manpato itsantinue:

—Balac ereca jun jolajoe. Yari moabítalachi miya joe Zipórichi nao. 11 Aman israelita tsachila Egíptobi nechi locala joe latie tinue. Junto jeralela yalachi tote chularae. Miya Balac laca we jisa munarae yape israelítalaca yuca quito cuwasa. Junnan miya Balari quera quicaato fe loto, yachi tobi nechi jera manlarierechun tsantinae tinue.

12 Junni Miya Diosiri yaca meráto, Balaanbe itsantinue:

—Yalabe pejitude! tinue. Junsi Egíptobi nechi loca jun tsachilacanan yuca quitude! La patsanan yalaca bendesiquicayoe tinue.

13 Junni ayuna nanchi Balaam cupato, panhabi jaca jun tsachilabe itsantinue:

—Nulachi toca manjilaide! Miya Diosi laca nulabe pejisa mantatue tinue.

14 Junni moabítalaca mantaminlari yalachi toca manjilaito, miya Balabe itsanque manpalaquinue:

—Balaam chiquilabe pejatuchi tie latinue.

15 Juntonan miya Balac peleituto, uyan mantaminlacaman erenue fe duque, junsi fe mantá tanlaca yape Balaanni jasa. 16 Junni yalari féto, Balaanbe itsanlatinue:

—Miya Balac, Zipórichi nao, fiqui ereto nube itsanque palaquisa tinae tilatinue: Niya josatiya yachica janiide! 17 Yari nuca seque facarito, seque pánae tinae. Jeralelachi cale pato itsantiyanae tinae: Duque min pone joe tiyanae tinae. Junto nuri ti quisa tinatiya, yari queyanae tinae; junto janiito ya tsachilaca yuca quito cuwade! tinae latinue. Miya Balac tsanque pasa eree tilatinue.

18 Junni Balaanni yaca meráto, yalabe itsantinue:

—Miya Balac yachi yaca, duque oro, cala punca, lachi cuwanasatiya, lari lachi Miya Diosi mantatunari ya tsachilaca niyanantiya quino podeino itoyoe. Yuca quino munaratotiya, natiya yuca quino podeitiyoe Miya Diosica jelerato. 19 Juntonan amana quepente inte catsolaide! Junto aman in nete Miya Diosi niyan tinatiya miintsan jochunae tinue.

20 Junni Miya Diosiri Balaanbe quepente quiraito itsantinue:

—Junni ya tsachila nuca tanjichun jacala jonari, yalabe pejino muquinari, pejiniide! tinue. Juntonan junbi féto la mantacacari pana! tinue.

21 Junni Balaanni ayuna nanchi wiruito, yachi buroca montura quito, burobi chudito moabita mantaminlabe pejinue. 22 Peyun palucaca petanjinaminue. Junni Miya Diosiri Balaanca painue ya jitusa munaranunca miratonan jiniinae tito. Junto yachi anjelica erenue yape Balaam jinanun minute poresa. 23 Junni burori Miya Diosichi anjelica minute espada tan wiruraminca quiranue. Junto minu dechica polenue. Junnan Balaanni buroca chidechi misuto, minubi manlarinue.

24 Junni wanbile ya anjeli duque dilapun minute wiruinue. Junte uba wita jonan, minu catenpe queloca su serica jominue. 25 Junni jun nete burori anjelica quirato, su serica dequelose polechi tito, Balaanchi nedeca nasi marasaisa carinue. Junnan buroca manan misunue. 26 Juntonan Miya Diosichi anjeliri caquenan jito, fe dilapunte wiruinue tsanle poletuntsante. 27 Aman jun nete buro poleno podeituto, tobi tsodinue. Junnan Balaam paito, chidechi duque misunue. 28 Jun óratenan Miya Diosiri buroca pasa carinue tsachila cuwenta. Junnan buro Balaanbe pato itsantinue:

—¿Ti quichun misunayun? tinue. Nuca natiya seiton quitiyoe. In nebe peman ne misunae tinue.

29 Junnan Balaanni buroca paito itsantinue:

—¿Ti quichun laca lucarinayun? La espada tedebi tamanpari, tsainanan toteno jomin joinhie tinue.

30 Junnan buro pato itsantinue:

—Nu numasitiya chudinun buro joyoe. Nu mirae numasinantiya tsantumanyoeque.

Junnan Balaanni tsa joe tinue. 31 Junnan aman Miya Diosiri Balaáncanan yachi anjeli espada tan minute wiruraminca quirano podeisa carinue. Junca Balaanni quirato, perdonaide! tito, tobi mutsainue. 32 Junnan Miya Diosichi anjeliri yabe itsantinue:

—¿Ti quichun nuchi buroca peman ne misuyun? tinue. La minute poreinayoe tinue. Miya Baláchica jisa munaratiyoe tinue. 33 Burori laca quirato, dechica polee tinue. Jun dechica poletumanpari, nuca toteno jomin joinhie tinue. Juntonan burocari toteno itono jomin joinhie tinue.

34 Junnan Balaam Miya Diosichi anjelibe itsantinue:

—Jutsa quica joyoe. Nu minute poreinaeque miitomanyoe. Junto miya Baláchica jino seitonari, inte nechi lachi yaca manjiniiyanae tinue.

35 Juntonan Miya Diosichi anjeliri itsantinue:

—Ya tsachilabe pejino podeino joe. Juntonan Diosi pasa caricacari pana! tinue.

Tsanque Balaam miya Balac ereca jun tsachilabe pejinue.