—¿Ti quichun israelítalaca jisa caricaino junhun? ¿Ti quichun chiquilachi tenchi trabajaquinoca purasa quiracaino junhun? tilatinue.

6 Junni Faraonni tsantisi mantanue quera quinun caroca we selaquisa. Junto yachi soldadolaca tanjito, israelítalaca bene tanjilainue. 7 Sota patsa fe sen caroca calaquinue; junsi jera Egíptobi caro jomincanan. Caro cura mantamin manca jominue. 8 Junto Miya Diosi Faraonca merátuchi timin suwaca jominue yape israelítalaca bene tanjiniisa, yalari Miya Diosichi sonbabe sonbaito locala josanan. 9 Jerale Egipto soldadolari, weyanla carochi, weyanla caluchi jito, weyanla nedechi jito, israelítalaca bene tanjilainue. Junto lamari pi fiquile, Piairó quelole, Baalzefón catenle, chuminlaca bene ilainue.

10 Junni israelítalari Faraonbe yachi soldadolabe quelote jalainaminca quirato, duque jele ilainue. Junto Miya Diosica ayudaisa otito rocailainue. 11 Junsi aman Moisebe itsanlatinue:

—¿Egíptobi menano podeituntsan jominun? tilatinue. ¿Jun tenchi Egíptobi nechi tanjayun? yape tilanantiya chutunun tote puyalaisa. ¿Ti quichun tsanquinayun? tilatinue. ¿Ti quichun Egíptobi nechi lariyun? tilatinue. 12 Egíptobi tsanan itsantinaminla joanue tilatinue: Egíptolachi tenchi trabajaquisa quiraniquede! tinaminlayoe. Egíptolachi tenchi trabajaquino fe sen jono jomin jonhoe tilatinue tilanantiya chutunun tobi puyanoca.

13 Juntonan Moiseri beco pato itsantinue:

—Jeleratulajona! tinue. Sonba tenca manhilaide! tinue. Junto seque tenca calaquede! Amana Miya Diosi nulaca se larichun niyan quechinanunca quiranilaquina! Amanale nechi nula quiranun egíptolaca natiya manquiralaquituchunae tinue. 14 Junni aman nulari jeleralaratuna! Miya Diosi nulachi tenchi quicaachunae tinue.

15 Junni tsantinunsi, Miya Diosiri Moisebe itsantinue: Labe panhano itoe tinue nulaca ayudaisa. Israelítalaca jiniisa mantade! tinue. Numa ayudaino joyoeque pacayoe. 16 Junto nuri nuchi tolaca jalitato mipade! tinue. Junto lamarica quitsale fun suwade! yape israelítalari jun funse poleno podeilaisa. 17 La Diosi egíptolaca merátumin suwachinayoe tinue yape nulaca bene tanjilaisa. Junto aman Faraonchi soldadolaca, caroca, calulaca ticatiya jera casticaquito micuwachinayoe tinue yape la sonban Diosi joeque tenhilaisa. 18 Faraonchi soldadolaca sonba casticaquinunbi, aman egíptolari miralarachunae tinue la Miya Diosi jonunca.

19 Junni tsantinunsi, Diosichi anjeli, junsi nin, israelítalachi caquele jominan jun postote nechi loto, yalachi benechi manchudinue. 20 Junni ya nin Egipto soldadolachi, junsi israelítalachi quitsale manjominue. Egíptolachi nan tala nemen jominue. Juntonan israelítalachi nan talari tsenaminue. Jun nemen jonan, egíptolari israelítalaca man quepen entero beneino podeilaitunue.

21 Junni Moiseri lamari nan tala yachi tedeca jalitanue. Jun tsanquinunsi, Miya Diosi man quepen entero yo lanun nan tala nechi sonban wu erenue. Tsanquito, Miya Diosi lamari quitsate fun to suwanue. 22 Junnan israelítalari fun tose polelainue. Pi palu nanchi du ica jominue manca tsa nan tala, manca jala nan tala. 23 Junni Faraonchi calula, carola, calubi jimin soldadola titiya, israelítalaca bene jilainue lamari quitsa fecári. 24 Quepenanan Miya Diosi Egipto soldadolaca ninle nechi quirato, yalaca tenca jera palaisa carinue. 25 Junto yalachi caro torincalaca jera larito, yalaca duque problema suwanue. Junto egíptolari itsanlatinue:

—Israelítalachile nechi sujilaisa! tilatinue. Miya Diosi chiquilachi contra joto, israelítala tenchi quicaanae tilatinue.

26 Tsan josanan, Miya Diosi Moisebe itsantinue: Nuchi tedeca lamari nan tala jalitade! tinue yape lamari manjato Egipto soldadolaca, yalachi caro, calulaca pi jera doque casa. 27 Junni Moisés tedeca lamari nan tala jalitanunsile, jun quiranari tseinasa lamari casale jomin cuwenta manhinue. Egíptola sujilaichinasa, lamari yalaca jera doque canue. Tsanque Miya Diosi egíptolaca lamaribi jadawoto totenue. 28 Lamari casale jonun cuwenta manhito, Egipto soldadolaca jera doque canue. Soldadola israelítalaca bene tanjito lamari quitsate jinaminlaca, yalachi caro, calulaca, ticatiya lamari jera doque canue. Faraonchi soldadola mancatiya son puraitulajonue. 29 Juntonan israelítalari lamari fuica junse poleca jominlanue. Lamari tsa nan tala man du, jala nan tala man duica junse poleca jominlanue.

30 Jun mate Miya Diosi israelítalaca egíptolachibi nechi se larinue. Junto israelítalari Egipto soldadola puyaca junla lamari fiquile tsominlaca quiralaquinue. 31 Israelítalari Miya Diosi egíptolaca sonba casticaquica jonunca quirato, Miya Diosica duque jele tito respetailainue. Junsi yachi mantate pamin Moisécanan tennaminlanue.